2016 جىلى قازاقستاندا مەملەكەتتىك ءتىلدى مەڭگەرگەن حالىق ۇلەسى 82 پايىزدى قۇرادى. بۇل تۋرالى ق ر پرەمەر-مينيسترى باقىتجان ساعىنتايەۆتىڭ توراعالىعىمەن وتكەن ۇكىمەت وتىرىسى بارىسىندا مادەنيەت جانە سپورت ءمينيسترى ارىستانبەك مۇحامەدي ۇلى باياندادى، دەپ حابارلايدى primeminister.kz​

مينيستر 2014 جىلى مەملەكەتتىك ءتىلدى مەڭگەرگەن حالىق ۇلەسى 72،1%-دى قۇراسا، 2015 جىلى 76،3%-عا جەتكەنىن ايتىپ ءوتتى. قازىرگى تاڭدا «قازتەست» جۇيەسى نەگىزىندە قازاق ءتىلىن ءبىلۋ دەڭگەيىن انىقتاۋ جىل سايىن ارتۋدا. 2016 جىلى تەستىلەۋدەن وتكەندەردىڭ جالپى سانى – 73 732 ادامدى، ونىڭ ىشىندە مەملەكەتتىك قىزمەتشىلەر سانى شامامەن 40 000 ادامدى (53،5%) قۇراعان. 

«مەملەكەتتىك باعدارلاما اياسىندا 2014-2016 جىلدار ارالىعىندا وقۋ-ادىستەمەلىك قۇرالدار، الەم ادەبيەتى كلاسسيكتەرىنىڭ شىعارمالارى، تانىمدىق، عىلىمي-پۋبليسيستيكالىق، بالالارعا ارنالعان كىتاپتار جانە ت.ب. قوسا العاندا، بارلىعى شامامەن 88 باسپا جوباسى جارىق كوردى. ونىڭ ىشىندە وزگە تىلدەردە شىعارىلعان جوبالار سانى – 24. سونىمەن قاتار مەملەكەتتىك ءتىلدى ۇيرەتۋدىڭ جاڭا ادىستەمەلەرى «قازاق ءسوزى» وقۋ قۇرالدارى ازىرلەندى»، - دەدى ا. مۇحامەدي ۇلى.

وتكەن جىلدىڭ قورىتىندىسى بويىنشا ورتالىق جانە جەرگىلىكتى اتقارۋشى ورگاندارداعى مەملەكەتتىك تىلدەگى قۇجات اينالىمىنىڭ ۇلەسى 91%-دى قۇرادى. سونىمەن قاتار، ەلىمىزدە 87 ايماقتىق قازاق ءتىلىن وقىتۋ ورتالىقتارى جۇمىس جاسايدى.

«دەگەنمەن، ستاتيستيكالىق-ەسەپ جانە قارجىلىق قۇجاتتامالاردىڭ مەملەكەتتىك تىلگە اۋىسپاۋ فاكتىلەرى بار»، - دەدى مينيستر.

ەسكە سالا كەتەيىك، قازاقستاندا ءتىل ساياساتى «قازاقستان رەسپۋبليكاسىنداعى ءتىل تۋرالى» زاڭىنا، تىلدەردى قولدانۋ مەن دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىنا سايكەس جۇزەگە اسىرىلادى.

بۇگىنگى تاڭدا باعدارلامانىڭ ەكىنشى كەزەڭىن جۇزەگە اسىرۋ جۇمىستارى اياقتالدى.