سەمەيدىڭ 24 جاستاعى تۇرعىنى اقىرزاماننىڭ كەلگەنىن ايتادى. جاس كورىپكەل ارىستانبەكتىڭ كوزى قياندى كورەتىن ءتارىزدى. جاس جىگىت حازىرەتى پايعامبارىمىزدىڭ (س.ع.س.) حاديستەرىنە سۇيەنگەنىمەن، ونىڭ سوزىنە ەشكىم سەنبەي وتىر، دەپ حابارلايدى nur.kz پورتالى.

جاس جىگىت ءوز سوزىنە مىنانداي دالەلدەر كەلتىرەدى:

«اقىرزامان كەلىپ قويدى. مىسالى، وزدەرىن اللانىڭ ەلشىسىمىن دەيتىندەر ءجۇر ورتامىزدا. قوعامدا زينا جاساۋشىلار دا كوپ. بىزگە بىلىنبەگەنىمەن ايەلدەردىڭ سانى ەركەكتەردەن الدە قايدا ارتىپ بارادى. الەمدە ءزىلزالالار بولىپ جاتىر. وكىنىشكە وراي، جاستارىمىز اداسىپ كەتتى. ناعىز يسلامنىڭ قۇدىرەتىن سەزىنە الماي ءجۇر. ءبىزدىڭ ءدىنىمىز يسلامدى جىك-جىككە ءبولۋدى قۇپتامايدى. مۇسىلمان بالاسى مەيىرىمدىلىكتى، كىشپەيىلدىلىكتى جانى سۇيەدى. بىرەۋدى ادام ولتىرۋگە ۇگىتتەمەيدى. مۇنىڭ بارلىعى اقىرزاماننىڭ كىشى بەلگىلەرىنەن دە كەلتىرىلگەن. ەندى، ويلانىپ كورىڭىز، قيامەت جەتتى مە، جەتپەدى مە؟»، - دەيدى ارىستانبەك.

ونىڭ ايتۋىنشا، پاراقورلاردىڭ كوبەيۋى دە اقىرزاماننىڭ شارتى ەكەن. سونداي-اق، ادامدار اراسىندا ءتۇرلى جايتتار ورىن الا باستاعان. قۇراندى اشەكەيلەۋدىڭ سالدارىنان ارۋاقتار تىرىلگەن كورىنەدى.

«ول سىزگە كورىنبەيدى. مەن ءتۇرلى دىبىستار ەستيمىن. ارۋاقتاردىڭ جەر بەتىنە قايتا شىققانىن كورەمىن. ءقازىر ولار بىزبەن بىرگە ءومىر ءسۇرىپ جاتىر. نەگە دەيسىز عوي؟ سەبەبى، ءبىز تۋىستىق قاتىناستىڭ نە ەكەنىن ۇمىتىپ كەتتىك. ولار سوعان كۇڭىرەنەدى. اقىرزاماننىڭ كەلگەنىن سەزىپ جاتىر. توڭىرەكتە ءزاۋلىم ۇيلەر قاپتاپ تۇر. ايەلدەر باستىقتارىنىڭ قوينىندا جاتىر. بىرەۋگە سەنىپ، ەشتەڭە ايتا المايتىن زامان بولدى. ءبىرىمىزدى ءبىرىمىز الدايمىز»، - دەيدى ارىستانبەك.

سونداي-اق، ول قيامەت كۇننىڭ سوڭعى بەلگىسى داججالدىڭ دا جەتكەنىن ايتىپ وتىر. بۇگىندە، ءوزىن حالىققا قۇدايمىن دەپ تانىستىرا باستاعان. ادام بالاسىن ساناسىن ۋلاپ، اداستىرىپ ءجۇر ەكەن.

«ونىڭ جەڭىسكە جەتۋىنە ءسال عانا قالدى. سول مەزەتتە كۇن باتقان جەرىنەن قايتا شىعادى»، - دەيدى ارىستانبەك.