وڭتۇستىك قازاقستان وبلىسىندا نوسەر جاۋىن مەن تاۋداعى ەرىگەن قار سۋىنىڭ سالدارىنان ارىس وزەنىندەگى سۋ دەڭگەيى كۇرت كوتەرىلگەن. قىزىل سۋ كوپىر ەرنەۋىندەگى بەتون پليتالاردى شايىپ، «باتىس ەۋروپا – باتىس جۇڭگو» كولىك ءدالىزىنىڭ بىرنەشە جەرىن زاقىمدادى. «ءقاۋىپ كۇشەيگەندىكتەن، كۇرە جولدىڭ ورداباسى اۋدانىنداعى تۇسى جابىلىپ، كولىكتەر اينالما جولمەن ءجۇرىپ جاتىر» دەپ حابارلايدى توتەنشە جاعداي قىزمەتكەرلەرى. بۇل تۋرالى  «قامشى» پورتالى otyrar.kz-كە سىلتەمە جاساپ حابارلايدى.

مامانداردىڭ ايتۋىنشا، حالىقارالىق كولىك دالىزىندەگى كوپىر ءالى رەسمي قابىلدانباعان. كۇنى كەشەگى جاۋىننان بورالداي وزەنىندەگى سۋ دەڭگەيى بىردەن 40 سانتيمەترگە كوتەرىلگەن. سول سۋ ەندى ارىس وزەنى ارقىلى اعىپ جاتىر. 15 وزەن كەلىپ قۇياتىن ارىستىڭ بويىندا تاۋلىك بويى كەزەكشىلىك ۇيىمداستىرىلىپ، ءقاۋىپتى دەگەن جاعالاۋلار شەگەندەلىپ جاتىر. «ەلدى مەكەندەرگە ءقاۋىپ جوق» دەيدى ماماندار.

قازىرگى تاڭدا توتەنشە جاعداي دەپارتامەنتىنىڭ ماماندارى ارناسى بۇرىلعان وزەندەردىڭ ەلدىمەكەندەردى شايىپ كەتپەۋىن قاداعالاپ وتىر. وسى ماقساتتا ارىس وزەنى ساعاسىنداعى تەمىرلان ەلدىمەكەنى ماڭىنداعى دامبا نىعايتىلدى. جەرگىلىكتى اكىمدىكتىڭ ۇيىمداستىرۋىمەن جانە ءورت سوندىرۋشىلەردىڭ كومەگىمەن جاعالاۋعا قۇم-توپىراق تولتىرىلعان 3000 قاپ تاستالىپ، 150 مەتر جاعالاۋ نىعايتىلدى.