ورتا سالماقتاعى WBA (Super)، IBO، WBC جانە IBF تۇجىرىمدارى بويىنشا الەم چەمپيونى گەنناديي گولوۆكيننىڭ (37-0، 33 كو) جاتتىقتىرۋشىسى ابەل سانچەس قازاقستاندىق بوكسشىنى سىنعا العان وسى سالماقتاعى WBO تۇجىرىمىنىڭ چەمپيونى بريتاندىق بوكسشى بيللي دجو سوندەرستىڭ (24-0، 12 كو) سوزدەرىنە جاۋاپ بەردى، دەپ حابارلايدى Vesti.kz
سوندەرس گولوۆكيننىڭ جەكە باسىنا ءتيىسىپ، ماسقارالايتىن جازۋ جازىلعان جەيدەنى كورسەتتى. بريتاندىق بوكسشى بۇل جەيدەنى كەزدەيسوق ءبىر ەر ادامنىڭ بەرگەنىن ايتادى. جەيدەنىڭ الدىڭعى جاعىندا بىلاي دەپ جازىلعان - "GGG - قورقاق بورات. سوندەرسپەن جەكپە-جەككە شىق". بۇل سوندەرستىڭ گولوۆكيننىڭ شامىنا ءبىرىنشى رەت ءتيىپ وتىرعان كەزى ەمەس. بۇعان دەيىن ول 2016 جىلى Borerat ويىنىنداعى ءسوز ارقىلى، وتانداسىمىزدى مازاق ەتكەن ەدى. 
"ءقازىر ول گولوۆكينمەن جەكپە-جەك وتكىزۋگە دايىن بولىپ قالىپتى. ال بۇعان دەيىن شە؟ گولوۆكين بۇعان دەيىن سوندرەسپەن جەكپە-جەك وتكىزۋگە دايىن بولعان كەزدە قايدا بولدى؟ ول كەزدە سوندەرس دايىن بولعان جوق. ەگەر جەكپە-جەك وتپەيتىن بولسا، وندا ول (سوندەرس) ءوز مۇمكىندىگىن جىبەرىپ الدى"، - دەپ كەلتىرەدى سانچەستىڭ ءسوزىن NYFights.com پورتالى. 
ال Badlefthook.com پورتالى مۇنداي مازاق ەتۋ ارەكەتتەرى گولوۆكيننىڭ كەلىسىمشارتقا تەزىرەك قول قويىپ جەكپە-جەككە شىعۋىنا ىقپال ەتەتىنىن جانە سوندەرسكە بۇل اۋىر ءتيۋى مۇمكىن ەكەنىن جازدى.
ايتا كەتەيىك، بەيرەسمي اقپارات بويىنشا، ب ا ق بەتتەرىندە گولوۆكين - سوندەرس جەكپە-جەگى استانادا 17 ماۋسىمدا EXPO-2017 حالىقارالىق كورمەسى كۇندەرى وتەتىنى حابارلاندى.