شاكەن ايمانوۆ اتىنداعى «قازاقفيلم» اق جارىققا شىعارعان «قۇنانباي» جانە «جاڭعاق تال» فيلمدەرى ءساۋىردىڭ 19-ى مەن 21ء-ى ارالىعىندا قىتايدىڭ استاناسىندا حالىقارالىق بەيجىڭ كينوفەستيۆالىنىڭ (Beijing International Film Festival) «پانوراما» باعدارلاماسىندا كورسەتىلەدى، - دەپ حابارلايدى «قامشى» اقپاراتتىق اگەنتتىگى «قازاقفيلم» اق باسپا ءسوز قىزمەتىنە سىلتەمە جاساپ.

«ءفيلمنىڭ فەستيۆلدى تاعدىرى جالعاسىن تاۋىپ جاتقانىنا وتە قۋانىشتىمىن. كارتينانىڭ جەلىسى مەيىرىمگە تولى، سوندىقتان دا قىتايلىق كورەرمەندەردىڭ كوڭىلىنەن شىعاتىنىنا سەنىمدىمىن»، - دەدى «جاڭعاق تال» ءفيلمىنىڭ رەجيسسەرى ەرلان نۇرماعامبەتوۆ.

ەستەرىڭىزگە سالا كەتسەك، كىشىگىرىم اۋىل ءومىرى بەينەلەنگەن «جاڭعاق تال» ءفيلمى وڭتۇستىك كورەياداعى پۋسان فەستيۆالىندە الەمدىك پرەمەراسىن وتكىزىپ، وندا New Currents («جاڭا اعىم») سەكسياسى اياسىندا باس جۇلدەنى يەمدەنگەن بولاتىن. سونىمەن قاتار، اتالمىش كارتينا ۆەزۋلدەگى ازيا كينولارى 22ء-ى حالىقارالىق كينوفەستيۆالىنىڭ نەگىزگى بايقاۋىندا كورسەتىلىپ (فرانسيا، 2016 جىل)، ەكى بىردەي جۇلدەگە - حالىقارالىق قازىلاردىڭ ارناۋلى جۇلدەسىنە جانە كينو سىنشىلارىنىڭ ارناۋلى جۇلدەسىنە يە بولدى.

«وسىدان بىرنەشە جىل بۇرىن مارقۇم تالاسبەك اسەمقۇلوۆ ەكەۋىمىز «ءبىرجان سال» ءفيلمىن كورسەتۋ ءۇشىن قىتايعا ارنايى بارىپ ەدىك. كورسەتىلىمگە 500-گە جۋىق حالىق قاتىستى، ولاردىڭ اراسىندا قازاقتار دا بولدى. ءفيلمدى وتە جاقسى قابىلدادى. «قۇنانباي» ءفيلمى دە قىتايلىق كورەرمەندەرگە ۇنايدى دەگەن ويدامىن»، - دەدى «قۇنانباي» ءفيلمىنىڭ رەجيسسەرى دوسحان جولجاقسىنوۆ.

ۇلى ويشىل ابايدىڭ اكەسى - قۇنانباي وسكەنباي ۇلىنىڭ ءومىرى جايلى باياندايتىن تاريحي تۋىندى ەلىمىز بويىنشا پروكاتقا 2015 جىلى شىعىپ، كورەرمەننىڭ كوزايىمىنا اينالعان بولاتىن. ءفيلمدى ق ر پرەزيدەنتى ن.ءا.نازاربايەۆت تا، مەملەكەت تە جوعارى باعالادى. ەلباسى ق ر تاۋەلسىزدىك كۇنىن تويلاۋ قارساڭىندا 2016 جىلدىڭ ادەبيەت پەن ونەر سالاسى بويىنشا مەملەكەتتىك سىيلىقتى ءفيلمنىڭ ءتۇسىرۋ توبىنا ۇلەستىردى. جارلىققا سايكەس پرەميا رەجيسسەر - دوسحان جولجاقسىنوۆقا، قويۋشى سۋرەتشى - رۋستام ودينايەۆقا، سونىمەن قاتار اكتەرلەر - نۋرسيفات سالىقوۆاعا جانە ايدوس بەكتەمىرگە بەرىلدى.

سونىمەن قاتار، العاشقى ۇلتتىق «تۇلپار» كينوپرەمياسىندا ءفيلمنىڭ اۆتورلارى ۇزدىك اتانىپ، «ۇزدىك ەر ادام ءرولى»، «ۇزدىك قويۋشى سۋرەتشى»، «ۇزدىك كومپوزيتور»، «ۇزدىك سەناريي» اتالىمدار بويىنشا ءتورت بىردەي جۇلدەگە قول جەتكىزدى. ودان بولەك، ۋفادا وتكەن III حالىقارالىق ۇلتتىق جانە ەتنيكالىق كينو «كۇمىس اقبوزات» فەستيۆالىندە ءامىر ءابدىرازاقوۆ اتىنداعى «ۇلتتىق رۋح» جۇلدەسىن يەلەنگەن.

بەيجىڭ حالىقارالىق كينوفەستيۆالى قىتايدىڭ بايلانىس، راديو، كينەماتوگرافيا جانە تەلەارنالار باس باسقارماسى جانە پەكيننىڭ مۋنيسيپاليتەت حالىق ۇكىمەتى، سونداي-اق قىتايدىڭ كينو جونىندەگى باسقارماسىنىڭ ۇيىمداستىرۋىمەن وتكىزىلەدى. بايقاۋ ۇيىمداستىرۋشىلارىنىڭ ايتۋىنا قاراعاندا، پەكين فەستيۆالى جىلدان جىلعا دامىپ، بۇگىندە ازيادا ءوتىپ جاتقان كينوفەستيۆالدەردىڭ الدىندا تۇر. بيىل بايقاۋعا 90 ەلدەن 1000-عا جۋىق كينوتۋىندىلار قاتىسىپ وتىر. ولاردىڭ ىشىنەن نەگىزگى باعدارلاماعا 15 فيلم ىرىكتەلىپ الىنعان.

كونكۋرستىق بايقاۋعا ۇسىنىلعان فيلمدەردىڭ ۇزدىگىن بەلگىلى دات رەجيسسەرى بيلل اۆگۋستتىڭ باسشىلىعىمەن حالىقارالىق قازىلار القاسى انىقتايتىن بولادى.