4 ساۋىردە سيريانىڭ سولتۇستىك-باتىسىنداعى يدليب پروۆينسياسىنىڭ كوتەرىلىسشىلەر باقىلايتىن حان-شەيحۋن قالاسىندا حيميالىق شابۋىل سالدارىنان قازا تاپقانداردىڭ سانى 72-گە دەيىن جەتتى – ونىڭ 20-سى بالالار، ال 17ء-سى ايەل ادامدار، دەپ حابارلادى "قامشى" اقپاراتتىق اگەنتتىگى بريتانيانىڭ ادام قۇقىقتارىن قورعاۋ جونىندەگى ورتالىعىنا سىلتەمە جاساي وتىرىپ.

قۇقىق قورعاۋشىلاردىڭ مالىمەتىنشە، بۇل ناقتى سان ەمەس، ءىز-تۇسسىز جوعالىپ كەتكەن ادامدار ءالى دە بار، ولار ءتىرى بولماي شىعۋى مۇمكىن.

سەيسەنبى كۇنى كۇندىز حان-شەيحۋن قالاسىندا بومبالاۋ بولعان ەدى. سيريا بەلسەندىلەرىنىڭ حابارلاۋىنشا، سيريانىڭ سولتۇستىك-باتىس بولىگىنە بومبالاعان سيريالىق اسكەرلەردىڭ ۇشاعى نەمەسە رەسەيلىك اۆياسيا. اۆيا سوققىسىنان كەيىن جەر بەتىندەگى ادامدار تۇنشىعا باستاعان.

كورگەندەردىڭ ايتۋىنشا، ادامدار تۇنشىققاننان قۇسىپ، اۋىزدارىنان كوبىك شىعىپ جاتتى. كەيبىرىنەن ءتىپتى قوزعالىس بايقالماعان.

وپپوزيسيا بەلسەندىلەرى ۇشاقتار زىمىراندارىن اۋىر حالدەگى ادامدار ەمدەلىپ جاتقان جەرگىلىكتى اۋرۋحاناعا قۇلاتقان دەيدى.

سيريا اسكەرى وزدەرىن حيميالىق شابۋىلعا قاتىسى جوق ەكەندەرىن العا تارتىپ وتىر. ال، رەسەي اسكەرى سيريا اۆيfسياسىنىڭ تەرروريستەردىڭ حيميالىق قارۋ جاراقتارى ساقتالعان ۇلكەن قويماسىنا سوققى جاساعانىن ايتادى.

بۇۇ-نىڭ اسكەري قىلمىستاردى تەرگەۋشى ماماندارى سيريانىڭ يدليب پروۆينسياسىنداعى بىرنەشە ادام قازا تاپقان ىقتيمال حيميالىق شابۋىلدى تەكسەرۋگە كىرىسكەن. بۇۇ-نىڭ سيريا بويىنشا ارنايى وكىلى ستاففان دە ميستۋرانىڭ حابارلاۋىنشا، بارلىق ايعاقتار شابۋىلدىڭ «حيميالىق شابۋىل بولعانىن جانە ونىڭ اۋەدەن جاسالعانىن» كورسەتىپ تۇر. بۇگىن بۇۇ قاۋىپسىزدىك كەڭەسى وقيعانى تالقىلاۋ ءۇشىن شۇعىل جيىن وتكىزەدى.

اقش پرەزيدەنتى دونالد ترامپ رەسمي مالىمدەمە جاساپ، شابۋىلدى «ايىپتايتىن جاعداي» دەپ اتادى جانە ونى «ەلەمەي قويا سالۋعا بولمايدى» دەپ مالىمدەدى. ول سيريا پرەزيدەنتى باشار اسادتىڭ «جەكسۇرىندىق قىلىعىنىڭ» جاۋاپكەرشىلىگىن ءوزى «السىزدىك تانىتتى جانە باتىل بولمادى» دەپ ايىپتاعان بۇرىنعى پرەزيدەنت باراك وبامانىڭ اكىمشىلىگىنە ارتقان.

اقش مەملەكەتتىك حاتشىسى رەكس تيللەرسون سيريا ۇكىمەتىنىڭ نەگىزگى وداقتاستارى ءارى سيرياداعى بىتىمگە كەپىل رەسەي مەن يراننىڭ يدليبتەگى شابۋىل ءۇشىن ۇلكەن مورالدىق جاۋاپكەرشىلىك ارقالايتىنىن مالىمدەدى. ول ماسكەۋ مەن تەگەراندى مۇنداي شابۋىلداردىڭ قايتالانباۋىنا ىقپال ەتۋگە شاقىردى.