جىل باسىنان بەرى ءتورت ءجاسوسپىرىم ەرەسەك ادامداردان ءزابىر كوردى. ءبىر جاعدايدا وگەي اكە 10 جاستاعى قىزىنا ازعىندىق جاساعان. بۇل تۋرالى بۇگىن پروكۋرور، پوليسيا، ءبىلىم سالاسىنىڭ باسشىلارى مەن ماماندار قاتىسقان جيىندا ايتىلدى، دەپ حابارلايدى قازاقپارات
سوڭعى جىلدارى اقتوبەدە جاسوسپىرىمدەر قىلمىسى ەسەلەندى. وبلىستىق جەرگىلىكتى پوليسيا قىزمەتىنىڭ باستىعى قانات الييەۆتىڭ ايتۋىنشا، وتكەن جىلى كامەلەتكە تولماعاندار اراسىنداعى قىلمىس ءۇش ەسەگە ارتقان. ماسەلەن، وبلىس ورتالىعىندا 31 قىلمىس تىركەلىپ، 13 مەكتەپ وقۋشىسى جازالانعان. ۇرلىق، توناۋ، الاياقتىق، توبەلەسكە قاتىستى دەرەك بويىنشا كوللەدجدەردىڭ 27 وقۋشىسى تىركەۋگە الىندى.
جيىن كەزىندە وبلىستىق پروكۋراتۋرانىڭ 1 باسقارما باستىعى قانات ناحىمبەكوۆ يۋۆەنالدى پوليسيا قىزمەتىنىڭ ەكى ءىرى قاتەلىگىن تىزبەكتەدى. بىرىنشىدەن، شتات جەتىسپەيدى. ىشكى ىستەر مينيسترلىگى ءبىر ينسپەكتور 500 بالاعا جاۋاپتى دەپ بەكىتكەن. ال اقتوبەدە بار بولعانى 128 مەكتەپ ينسپەكتورى ەڭبەك ەتەدى. ءالى 92 ادام قاجەت.
«ينسپەكتورلار قوعامدىق جۇمىستارعا قاتىستىرىلىپ، ۋاقىت جوعالتادى. مەكتەپ وقۋشىلارى اراسىنداعى قىلمىستىڭ الدىن-الۋمەن اينالىسۋى ءتيىس ينسپەكتورلار ەرەسەكتىڭ ماردىمسىز زاڭ بۇزۋشىلىق دەرەكتەرىن تىركەپ، اكىمشىلىك جاۋاپكەرشىلىككە تارتىپ ءجۇر. كەيبىر الدىن-الۋ جۇمىستارى قاعاز جۇزىندە وتەدى. اقتوبە قالاسى مەن تەمىر، مارتوك، شالقار، قارعالى اۋداندارىنىڭ ينسپەكتورلارى قىلمىس جاساعان 5 ءجاسوسپىرىمدى تىركەۋگە الماعان. 6 ايدان 2 جاسقا دەيىنگى بالالارى بار جايسىز 18 وتباسىن باقىلاۋ جۇمىسى جۇرگىزىلمەگەن. وسىنىڭ ءبارى قىلمىستىق قۇقىق بۇزۋشىلىقتىڭ 3 پايىزعا ارتۋىنا سەبەپ بولدى»،- دەدى ق. ناحىمبەكوۆ. ونىڭ ايتۋىنشا، وڭىردە جاسوسپىرىمدەرگە ازعىندىق جاساۋ دەرەگى ازايماي تۇر. ماسەلەن، بيىل جىل باسىنان بەرى ءتورت ءجاسوسپىرىم ەرەسەكتەردىڭ ازعىندىعىنا دۋشار بولعان. «العا اۋدانىندا اناسىمەن بىرگە تۇراتىن ەر ادامنىڭ 10 جاستاعى قىزعا ازعىندىق جاساعانى انىقتالدى. بۇل تۋرالى وقۋشى قىزدىڭ تۋىسى حابارلاعان. ءقازىر كۇدىكتى قاماۋعا الىنىپ، تەرگەۋ باستالدى. الدىن-الۋ جۇمىستارى دۇرىس جۇرگىزىلسە، ۋچاسكەلىك ينسپەكتورلار، مەكتەپ اكىمشىلىگى مەن پسيحولوگتار مۇنداي وقيعانى كۇنى بۇرىن ءبىلىپ وتىرار ەدى. جاسوسپىرىمگە اتا-انالار دا جاۋاپتى»،- دەدى پروكۋرور.
ايتا كەتەيىك، جيىن كەزىندە وبلىستىق ءبىلىم باسقارماسىنىڭ باسشىسى ساۋلە ومىربەكوۆا ءتارتىبى ناشار بالالاردىڭ مىنەزىن تۇزەتۋ ءۇشىن قوعام قايراتكەرلەرى مەن اتاقتى سپورتشى، ونەر ادامدارىنىڭ كومەگىنە جۇگىنۋ ناتيجە بەردى دەپ وتىر. ولار بالالاردىڭ اتا-انالارىنا قاراعاندا وقۋشىلارعا جاقسى كوڭىل ءبولىپ، بەلگىلى ءبىر ۋاقىتىن ارنايدى ەكەن.
