15 جاستاعى بالا قىسقىردى يتكە اينالدىرماق دەپ حابارلايدى almaty.tv. بەسىكتەن ءالى بەلى شىقپاعان بالا سەلەكسيالىق جۇمىسقا بەل شەشە كىرىسكەن. ءقازىردىڭ وزىندە ءتۇز تاعىسى مەن ءسىبىر لايكاسىنىڭ قوسىندىسىنان شىققان تۇقىمعا قىزىعۋشىلىق تانىتىپ جاتقاندار كوپ.

بۇل دارحان دالادا تىنىم تاپپاي جورتىپ جۇرەتىن ءتۇز تاعىسىنىڭ جاسى التىعا تولدى. ادامنىڭ بىتىسپەس جاۋى سانالعان بولتىرىك كوزىن اشقاننان باستاپ ەربولات مامىرحاننىڭ قولىندا ءوسىپ جاتىر. الايدا، يەسىنىڭ ءوزى كەيدە جانىنا جولاۋعا جۇرەكسىنەدى. سەبەبى قاسقىردى قانشا باقساڭدا تاۋعا قاراپ ۇليدى دەگەن ءسوز بار.

«بۇل تازا قاسقىر. بۇگىندە قولعا ۇيرەنگەن. اپتا سايىن شيكى ەت بەرىپ تۇرامىز. وزدەرىڭىز كورىپ تۇرعانداي جۋاس. يتكە دە جاقىنداتادى، ادامدى دا جاقىنداتادى»، - دەدى ءيتتىڭ تۇقىمىن اسىلداندىرۋشى ەربولات مامىرحان.

بۇل ءتورت كۇشىك قاسقىر تۇقىمداس. ون بەس جاسار ەربولات اسىلداندىرۋ جۇمىسى ءوز جەمىسىن بەرىپ جاتىر دەديى.

ءسىبىردىڭ لايكاسىن ءتۇز تاعىسىنا قوسىپ، سودان شاتىس تۇقىم الىپ، سونى تاعىدا يتپەن بۋدانداستىرماق. ءبىر قىزىعى، دورەگەي كۇشىكتەردىڭ قاندارى بولەك ەكەنىن بىردەن اڭعارۋعا بولادى.

«بۇل قاسقىر مەن ءسىبىر لايكاسىنىڭ قوسىندىسىنان شىققان تۇقىم. بۇنداي سەلەكسيالىق جۇمىس جاساۋ وڭاي شارۋا ەمەس. بۇعان دا ۋاقىت كەرەك. كوكسەرەكتىدە كورگەم، جاقسى بىلەمىن. ماعان ەلدىڭ ءبارى ايتادى «قاسقىر مەن ءيتتى بۋدانداستىرما، ادامعا شابادى» - دەپ. ءبىراق مەن ءوزىمنىڭ پىكىرىمنەن اۋىتقىمايمىن»، - دەدى ءيتتىڭ تۇقىمىن اسىلداندىرۋشى ەربولات مامىرحان.

ءسىبىر لايكاسى مەن قاسقىردىڭ قوسىندىسىنان شىققان كۇشىكتەرگە ەكى اي بولعان. تۇرلەرىنە ءۇڭىلىپ قاراساڭ ەكەۋى يتكە، ال مىنا ەكەۋى ءتۇزدىڭ تاعىسىنا ۇقسايدى. بۇلاردىڭ كەلەشەك تاعدىرى بەلگىسىز. مۇمكىن بىرەۋدىڭ قوراسىنداعى مالىن نەمەسە كۇركەسىندەگى تاۋىعىن جەر. ەڭ باستىسى ادامي قاسيەتتى جوعالتىپ، تابيعاتقا قارسى شىقپايىق.

يتپەن ءتۇز تاعىسىن بۋدانداستىرىپ سودان تۇقىم شىعارىپ جاتقان بۇل ازاماتتىڭ نەگىزگى ماقساتى جۇرەگى تۇكتى قازاقى توبەت شىعارسام دەيدى. ءبىراق وعان كەمىندە جيىرما جىل ۋاقىت كەتەتىنىن كورىنەدى.

كوكبورىنىڭ ۇرپاعى ەكەنىمىز كەشەگى تاريح بەتتەرىندە انىق جازىلعان. بۇگىندە اڭشىلار قاسقىردى قىرعيداي قىرىپ، تۇقىمدارىن جويىپ جاتسا، ەندى ءبىرى قولدا اسىرايدى. ءبىراق مەن ءۇشىن بۇل كوكجالدىڭ تاعدىرى وتە ايانىشتى. سەبەبى، قايتكەنمەندە دالا تاعىسى عوي.