سوت وقۋشىلاردىڭ قىلمىس بولعان ۋاقىتتا مەسسەندجەر ارقىلى جازىسىپ وتىرعاندارىن دالەلدەگەن WhatsApp كومپانياسىنىڭ اقپاراتىن قابىلدامادى.

تەكەلى قالاسىنىڭ ءۇش وقۋشىسى ءمۇعالىمدى سوققىعا جىققاندارى ءۇشىن زاڭ الدىندا جاۋاپ بەردى، دەپ حابارلايدى «قامشى» اقپاراتتىق اگەنتتىگى informburo.kz جاڭالىقتار قىزمەتىنە سىلتەمە جاساپ.

15 جاستاعى سۇندەت، 16 جاستاعى ەرجان ەسەنبەكوۆ، سونداي-اق، 15 جاستاعى سۇلەيمەن تىلەۋجانوۆ ءمۇعالىمدى سوققىعا جىعىپ، ودان قالماي توناعاندارى ءۇشىن باس بوستاندىعىنان ايىرۋ جونىندە ۇكىم شىعاردى.

«وقۋشىلاردىڭ ءبىرى كۇش قولدانۋ ارقىلى توناعانى ءۇشىن 1 جىلعا باس بوستاندىعىنان ايرىلدى. ال، قالعان ەكەۋى ءمۇعالىمنىڭ دەنساۋلىعىنا زيان كەلتىرگەندەرى ءۇشىن 5 جىلعا سوتتالدى» دەپ حابارلادى الماتى وبلىستىق سوتىنىڭ باسپا ءسوز حاتشىسى ايناش راحىمبايەۆا.

سوت ۇكىمى زاڭدى كۇشىنە ەنگەن جوق. جىگىتتەردىڭ قورعاۋشىلارى اتالعان ىسكە بايلانىستى قايتا قاراۋدى ۇسىندى. جىگىتتەردىڭ ءوزى سوت ۇكىمىن ادىلەتسىز دەپ تانىپ، قاتەلىكتىڭ قۇربانى بولعاندارىن العا تارتتى.

«ءبىز قىلمىس بولعان ۋاقىتتا Whats App جەلىسى ارقىلى سويلەسىپ جاتقانبىز. سول ءۇشىن اقش-تىڭ كاليفورنيا شتاتىنداعى قولداۋ قىزمەتىنە جۇگىندىك. پروسەسسكە الماتى قالاسىنان ارنايى مامانداردى شاقىردىق. ولار ءبىزدىڭ سول ۋاقىتتا ۇيدە وتىرعانىمزدى، سونداي-اق قىلمىس بولعان جەردەن ءبىزدىڭ ارا-قاشىقىتىمىزدىڭ ءبىرشاما الىس ەكەنىن دالەلدەدى. الايدا، سوتتا ول دالەلدەر قاراۋسىز قالدى»، دەپ پىكىرىن ءبىلدىرىدى ايىپتالۋشىلاردىڭ ءبىرى ەرجان ەسەنبەكوۆ.

«اراعا ءۇش اي سالىپ ىستە تاعى ءبىر كۋاگەر پايدا بولدى. ونىڭ ۇستىنە، سوتتا ول ەس-تۇسسىز جاتقان ءمۇعالىمدى دالادا قالدىرىپ، توناپ كەتكەن. ولار ءتۇننىڭ ىشىندە  بۇزاقىلاردىڭ ءتۇرىن كورگەن، الايدا تۇنگى 12-دە قالادا جارىقتى ءسوندىرىپ تاستايدى. ونى كۋاگەر دە، تۇرعىن ءۇي شارۋاشىلىق قىزمەتىنىڭ سالاسى دا دالەلدەپ وتىر» دەيدى قورعاۋشى تالعات جانبولاتوۆ.

سوققىعا جىعىلعان ءمۇعالىم بەردىبەك تۇرسىنبەك قانداي دا ءبىر دەرەك بەرۋدەن باس تارتتى. ونىڭ وكىلى باۋىرجان ءابدراسوۆ ايىپتالۋشىلار مەن ولاردىڭ قورعاۋشىلارىنىڭ ايتقان دەرەكتەرى نەگىزسىز دەيدى.

ونىمەن قوسا، وقۋشىلار وقيتىن مەكتەپ قىزمەتكەرلەرى دە، بىرگە وقيتىن سىنىپتاستارى دا وقۋشىلاردىڭ مۇنداي ارەكەتكە بارعاندارىنا سەنبەيدى، ارىز بەرۋگە دايىندالىپ وتىرعان كورىنەدى.

«ءبىز بالالاردىڭ كىنالى ەكەنىنە سەنبەيمىز. ولار بەلسەندى وقۋشىلار، ساباقتارىن دا جاقسى وقيدى، قالالىق، اۋداندىق ءىس-شارالاردىڭ بارىندە اتسالىسىپ جۇرەدى. قانداي دا ءبىر قىلمىسقا بارادى دەگەن وي نەگىزسىز. سوندىقتان، اتا-انالار، مەكتەپ مەكەمەسى، قورعاۋشىلار – ءبارىمىز بىرىگىپ ءىستى قايتا قاراۋعا تاپسىراتىن بولامىز» دەپ ايتتى مەكتەپ ديرەكتورى ەلميرا يمانبەردييەۆا.