قازاقستاننىڭ رەسەيدەگى ەلشىسى شەتەلدىك ارىپتەستەرىن قابىلدادى.
قازاقستان رەسپۋبليكاسىنىڭ رەسەي فەدەراسياسىنداعى توتەنشە جانە وكىلەتتى ەلشىسى يمانعالي تاسماعامبەتوۆ 5 ساۋىردە رەسەيدەگى بوسنيا جانە گەرسەگوۆينا ەلشىسى مۋستافا مۋەزينوۆيچ پەن ەكۆاتوريالدى گۆينەيا ەلشىسى حوسە ەسونو ميچۋ اكەنگانى قابىلدادى، - دەپ حابارلايدى "قامشى" اقپاراتتىق اگەنتتىگى قازاقستاننىڭ رەسەيدەگى ەلشىلىگىنە سىلتەمە جاساپ.
مۋستافا مۋەزينوۆيچپەن كەزدەسۋ كەزىندە ەكى جاقتى ينۆەستيسيالىق ىقپالداستىق ماسەلەسى تالقىلاندى.
نەگىزگى تاقىرىپ ەنەرگەتيكا سالاسىنداعى ىنتىماقتاستىقتى دامىتۋ بولدى.
تاراپتاردىڭ ەكى جاقتى بايلانىستاردى بەلسەنە جۇرگىزۋگە جانە ەكى مەملەكەتتىڭ حالىقارالىق ارەناداعى قاتىناستارىن كەڭەيتۋگە ءازىر ەكەندىگى اتالدى.
قازاقستان ەلشىسى قوناقتى قازاقستانداعى الەۋمەتتىك-ەكونوميكالىق جاڭعىرتۋدىڭ بارىسىمەن تانىستىردى، سونداي-اق، ەۋرازيالىق ينتەگراسيانىڭ وزەكتى اسپەكتىلەرىن باياندادى.
قازاقستان مەن ەكۆاتورلىق گۆينەيا اراسىنداعى ديپلوماتيالىق قاتىناستاردىڭ دامۋى ماسەلەلەرى توتەنشە جانە وكىلەتتى ەلشى حوسە ەسونو ميچا اكەنگامەن كەزدەسۋدە تالقىلاندى. اتاپ ايتقاندا، ونىڭ قازاقستانداعى ءوز ەلىنىڭ ديپلوماتيالىق وكىلدىگىنىڭ باسشىلىعىنا كەلىسۋ شارالارى بويىنشا جۇمىس باستالدى. سونداي-اق، ديپلوماتتار ساۋدا-ەكونوميكالىق قاتىناستاردى بەلسەندى جۇرگىزۋ جانە ەكۆاتورلىق گۆينەيانىڭ ۇكىمەتتىك دەلەگاسياسىنىڭ قازاقستانعا ءىس-ساپارىن ۇيىمداستىرۋ اسپەكتىلەرىن تالقىلادى.
قازاقستان ەلشىسى ءوز تاراپىنان "ەكسپو-2017" حالىقارالىق مامانداندىرىلعان كورمەسىنە قاتىسۋعا شاقىردى.
يمانعالي تاسماعامبەتوۆ 2017 جىلدىڭ 3 اقپانىندا قازاقستاننىڭ رەسەيدەگى ەلشىسى بولىپ تاعايىندالدى. نۇرسۇلتان نازاربايەۆ بۇل تاعايىنداۋ تاسماعامبەتوۆتىڭ ءوز سۇرانىسىمەن بولعاندىعىن ايتقان ەدى.
