رەسەي پرەزيدەنتى ۆلاديمير ءپۋتيندى مازاقتايتىن ينتەرنەت مەمدەر وپپوزيسيا ءۇشىن قولايلى قارۋعا اينالدى. جاقىندا بيلىك ءپۋتيندى گەي تۇرىندە بەينەلەگەن سۋرەتكە تىيىم سالىپ، ونى «ءپۋتيننىڭ قولداۋشىلارىن دا قورلايتىن سۋرەت» دەپ اتادى دەپ حابارلايدى «قامشى» اقپاراتتىق اگەنتتىگى «ازاتتىق» راديوسىنا سىلتەمە جاساي وتىرىپ.

ۆلاديمير ءپۋتيندى سىناۋشىلار ونىڭ ءتۇرىن وزگەرتىپ ينتەرنەتكە سالعاندى جاقسى كورەدى، كوبىنە ونى ماچو ەتىپ كورسەتەدى. ءبىراق ءپۋتيننىڭ بەتىن ايەل ءتارىزدى بوياپ سالعان سۋرەت ونى گەي بولسا كەرەك دەگەن تۇسپالعا جەتەلەيدى. ءبىراق بۇل فوتوشوپتى جاساعان سىقاقشى قىسىمعا ۇشىراپ جاتىر.

رەسەي ءپۋتيننىڭ «بويانىپ العان» سۋرەتىن جاريالاۋعا رەسمي تىيىم سالدى، بيلىكتىڭ پىكىرىنشە وندا «پرەزيدەنت ستاندارتتى ەمەس سەكسۋالدىق باعىتتى ۇستانادى» دەگەن تۇسپال بار جانە سۋرەت گەيلەردى قورلايدى.

رەسەي ادىلەت مينيسترلىگى ناۋرىزدىڭ 30-ى كۇنى سۋرەتتى تىيىم سالىنعان «ەكسترەميستىك ماتەريالدار» تىزىمىنە قوستى، 2016 جىلى مامىردا تۆەر قالاسىنىڭ سوتى سونداي شەشىم شىعارعان ەدى. ءپۋتيننىڭ سۋرەتىن «ۆكونتاكتە» الەۋمەتتىك جەلىسىندە جاريالاعان الەكساندر سۆەتكوۆ ەسىمدى ادامعا «جەككورىنىش تۋدىردى» دەگەن ايىپپەن ءىس قوزعالدى.

سۆەتكوۆ «ۆكونتاكتە» جەلىسىنە جاريالاعان باسقا دا سۋرەتتەرى ءۇشىن ايىپتالىپ وتىر، ونىڭ ىشىندە ناسىلشىلدىك پەن ميگرانتتارعا قارسى ەكەنىن انىق بايقاتاتىن دۇنيەلەر بار. ءقازىر ونىڭ جەلىدەگى اككاۋنتى جابىلدى. تۆەر سوتىنىڭ شەشىمى دە، ادىلەت مينيسترلىگى دە سۆەتكوۆ جاريالاعان سۋرەتتەردىڭ ىشىندە «بويانعان ءپۋتيننىڭ» سۋرەتى قايسى ەكەنىن ناقتىلاپ ايتپايدى. سۆەتكوۆتىڭ ءوزى قىلمىستىق جاۋاپكەرشىلىكتەن بوساتىلدى، ءبىراق كەيىن پسيحياتريالىق اۋرۋحاناعا جاتقىزىلدى.

TJ Journal سايتىنىڭ جازۋىنشا (ادىلەت مينيسترلىگىنىڭ سۋرەتكە قاتىستى شەشىمى تۋرالى العاش جاريالاعان سايت)، ءپۋتيننىڭ ونداي سۋرەتتەرى ينتەرنەتتى تالاي جىلدان بەرى شارلاپ ءجۇر. ول سۋرەتتەردىڭ كەيبىرىندە پۋتين پرەمەر-مينيستر دميتريي مەدۆەديەۆپەن بىرگە سالىنعان، مەدۆەديەۆتى دە بوياندىرىپ قويعان.

تۆەر سوتىنىڭ شەشىمىن قايتالاعان ادىلەت مينيسترلىگى «تىيىم سالىنعان سۋرەتتەگى ادامنىڭ ءتۇرى پۋتينگە ۇقسايدى، بەتىندە بوياۋى بار – كىرپىگى مەن ەرنى بويالعان، اۆتور رەسەي پرەزيدەنتىنىڭ سەكسۋالدىق باعدارىن باسقاشا كورسەتپەك بولعان» دەپ مالىمدەگەن.

سۋرەتكە پۋتينگە داۋىس بەرگەن سايلاۋشىلاردى لگبت (لەسبي، گەي، بيسەكسۋال جانە ترانسگەندەر) وكىلدەرىمەن سالىستىرۋعا ۇقسايتىن تاقىرىپ قويىلعان - «ولاردىڭ سانى كوپ دەيدى، ول جاعىن مەن بىلمەيمىن» دەگەن جازۋ بار. تاقىرىپتاعى ءسوز گەيلەرگە قارسى قولدانىلاتىن ينتەرنەت-مەمگە ۇقسايدى.

شەشىم شىعارعان سوت پەن مينيسترلىك ءپۋتيننىڭ فوتوسىن قولدانۋ زاڭسىز با، الدە تاقىرىبى زاڭعا قايشى ما - ول جاعىن انىقتاپ كورسەتپەيدى. جەككورىنىشتى قوزدىرۋ جاعدايلارىن باقىلاپ وتىرعان قۇقىق قورعاۋشىلار مەن بەلسەندىلەردىڭ ايتۋى بويىنشا، رەسەي بيلىگى كەيىنگى كەزدە «ەكسترەميستىك» سانالاتىن ماتەريالدارعا توزبەيتىن بولعان.

رەسەي بيلىگىن سىناۋشىلار بيلىكتىڭ جەككورىنىشكە تولى ءناسىلشىل پىكىرلەردى عانا ەمەس، كونستيتۋسيامەن قورعالعان ساياسي پىكىرلەردى دە قۋدالايتىنىن ايتادى. پۋتين 2013 جىلى زاڭ ارقىلى كامالەت جاسقا تولماعاندار اراسىندا «ءداستۇرلى ەمەس سەكسۋالدىق قارىم-قاتىناستى ناسيحاتتاۋعا» تىيىم سالعان ەدى، سوندىقتان ونى ليبەرال قارسىلاستارى گوموفوب سانايدى.

پۋتين «گەيلەردى ناسيحاتتاۋعا قارسى» دەپ اتالىپ كەتكەن زاڭدى «بالالاردى قورعاۋ ءۇشىن قابىلداعانىن» ايتىپ، زاڭنىڭ «لگبت قۇقىقتارىن بۇزبايتىنىن» مالىمدەدى. قۇقىق قورعاۋشىلار «زاڭ لگبت وكىلدەرىنە قارسى زورلىق-زومبىلىقتى كۇشەيتتى» دەيدى. ال اسىرەۇلتشىلدار پۋتين مەن ونىڭ ۇكىمەتىن «ازشىلىق توپتارعا تىم ءتوزىمدى» دەپ ايىپتايدى.

كارل شرەكتىڭ ماقالاسىن اعىلشىن تىلىنەن اۋدارعان – دينارا ءالىمجان.