ەستەرىڭىزگە سالا كەتەيىك، پاۆلودار وبلىسىنىڭ پوليسەيلەرى جۇك كولىگى مەن بالالار وتىرعان اۆتوبۋستىڭ سوقتىعىسۋىنا جول بەرمەدى. وقىس جاعداي پاۆلودار-استانا تاس جولىندا سپۋتنيك جانە پوگرانيچنيك اۋىلدارىنىڭ اراسىندا بولعان ەدى. اۆتوبۋستا 18 بالا مەن 4 تاربيەشى بولعان.

قازىرگى تاڭدا مۇرات نۇرسەيىتوۆ باياناۋىل اۋىلىندا ەم قابىلداپ جاتىر. دارىگەرلەردىڭ ايتۋىنشا، ءتارتىپ ساقشىسىنىڭ دەنساۋلىعىن وڭالتۋ ءۇشىن ءالى جارتى جىلداي ۋاقىت كەرەك.

«پاۆلودارلىق اق حالاتتى ابزال جاندار مەنى و دۇنيەدەن اكەلدى. ال استانالىق دارىگەرلەر ءومىر ءۇشىن كۇرەسۋ كەرەكتىگىن ۇيرەتتى. العىسىم شەكسىز. ولار بولماسا، ءقازىر سىزبەن ەمىن-ەركىن سويلەسىپ، تۋعان-تۋىسقاندارىمنىڭ ورتاسىندا وتىرماس ەدىم. ارمانىم سول، تەزىرەك ساۋىعىپ، قاتارعا ورالعىم كەلەدى»، - دەيدى مۇرات نۇرسەيىتوۆ.

سوڭى قايعىعا ۇلاسۋى مۇمكىن جانتۇرشىگەرلىك جول اپاتىن مۇرات قورقىنىشپەن ەسكە الادى.

«ب ا ق بولعان وقيعا مەنىڭ ەسىمدە جوق ەكەنىن جارىسا جازدى. بۇل شىندىققا جاناسپايدى. ەسىمنەن تانىپ قالعانىم راس، ءبىراق ءمان-جايدىڭ ءبارىن بىلەمىن. ءالى ەسىمدە، جول كوكتايعاق بولدى. ءبىز بالالارمەن باياناۋىلدان پاۆلودار قالاسىنا بارا جاتتىق. جولدا كەزدەسكەن جەڭىل كولىكتەر بىزگە جول بەرىپ وتىردى. بىزگە قارسى ءۇش جۇك كولىگى كەلە جاتتى، ءبىراق جول بەرەتىن ءتۇرى جوق. ولار بىزگە جارتى شاقىرىمداي قاشىقتىققا جاقىنداعان ساتتە، بىزگە كاماز-دىڭ اۆتوبۋسپەن سوقتىعىسپاۋى ءۇشىن ارەكەت ەتۋ كەرەك بولدى. باتىل شەشىم ساناۋلى سەكۋندتتاردىڭ ىشىندە قابىلداندى. ارىپتەسىمىز ەكەۋمىز قىزمەتتىك كولىگىمىزبەن سوققىنى وزىمىزگە الدىق»، - دەيدى مۇرات نۇرسەيىتوۆ.

قازىرگى ۋاقىتتا مۇرات دارىگەرلەردىڭ كەڭەسىمەن كوپ قوزعالمايدى. دەسە دە، سۇيىكتى جۇمىسىنا اسىق. جانىندا جارى اسەل بار. بۇگىندە ۇيدەگى شارۋاشىلىقتىڭ ءبارى جۇبايىنا جۇكتەلگەن.

«دارىگەرلەر دەنساۋلىعىمدى كۇتىپ، كوبىرەك تىنىعۋعا كەڭەس بەردى. تەزىرەك جۇمىسىما ورالسام ەكەن. مەن ومىرىمە اراشا بولعان دارىگەرلەردىڭ الدىندا باسىمدى يەمىن. شىنى كەرەك، ءبىر كۇنى وسىنداي جاعدايعا تاپ بولامىن دەپ ويلاپ كورمەپپىن. ەسىمنەن كەتەر ەمەس. 17 اقپاندا پاۆلودار قالالىق №1 اۋرۋحاناسىنىڭ جانساقتاۋ بولىمىنە ءتۇستىم. جاعدايىم وڭدى بولدى. دەنە جاراقاتتارىم كوپ بولعانىنا قاراماستان، ەسىمنەن تانعان جوقپىن. ءبىراق، ەكى كۇننەن سوڭ دەنساۋلىعىم ناشارلاپ كەتتى. كوماعا ءتۇسىپ، جاساندى دەمالۋ اپپاراتىنىڭ كومەگىمەن تىنىستاپپىن. ابىروي بولعاندا، مەنىڭ ءومىرىم ۇزدىك دارىگەرلەردىڭ قولىنا تاپسىرىلدى. ولار بولماسا، «بۇگىنگى جاعدايىم نە بولار ەدى؟ دەگەن ساۋال قويۋعا دا قورقامىن»، - دەيدى باتىر پوليسەي.

"مەن باتىر ەمەسپىن. تەك قانا قىزمەتتىك بورىشىمدى وتەدىم" دەيدى ول.

34 جاستاعى مۇرات 16 مامىردا استاناعا قارالۋعا اتتانادى. پوليسەي وپتيميستىك كوڭىل-كۇيدە، وڭالۋ پروسەسى تەز وتەتىنىنە سەنىمدى.

«وكىنىشكە قاراي، ازىرگە ءوزىم جۇرە المايمىن. قازىرگى ۋاقىتتا تۋعان-تۋىسقاندارىم قوناققا كەلىپ، حال-جاعدايىمدى ءبىلىپ تۇرادى. جۇرە باستاعان سوڭ، بالالارمەن كەزدەسكىم كەلەدى. ولار شاحمات تۋرنيرىندە ءبىرىنشى ورىندى قانجىعاسىنا بايلاپ، جەڭىستەرىن ماعان ارناپتى. قۋانىشتىمىن!» - دەيدى مۇرات نۇرسەيىتوۆ.