الماتى وبلىسىندا 4 كۇن بويى ءىز-تۇسسىز جوعالعان بالا ءمان-جايدى بايانداپ بەردى. ول قىستاققا ءوزى اداسپاي بارعانىن ايتتى، دەپ حابارلايدى قازاقپارات

7 جاستاعى ءابىلقايىردىڭ سوزىنشە، ول قىستاققا جەتۋ ءۇشىن جاياۋ ءجۇرىپ، سۋدى دا كەشكەن.

«بارعىم كەلدى. سول جاققا باردىم، ول جاقتا اعالار بار ەكەن. ەرلان، اندرەي دەگەن. بىرەۋى ورىس، بىرەۋى قازاق. سول جاقتا ءجۇردىم. مال بار ەكەن»،- دەيدى جەتكىنشەك.

بالانىڭ ايتۋىنا قاراعاندا، ول بۇل ايماقتا بۇرىن بولماعان. تاۋعا شىعىپ، جان-جاعىنا كوز جۇگىرتىپ، ارتىنشا قىستاقتى كورىپ، سول جەرگە بەت العانعا ۇقسايدى.

ءقازىر 4 كۇن بويى ىزدەۋدە بولعان ءابىلقايىر سەيىتجانۇلىنا ارنايى سوت-مەديسينالىق ساراپتاما تاعايىندالعان جانە بالانى ينتەرناتقا وتكىزۋ جايى دا تالقىلانىپ جاتىر. سەبەبى، ونىڭ اناسى جانىندا ەمەس. ال اكەسى جالدانىپ جۇمىس جاسايتىن كورىنەدى.

بۇعان دەيىن حابارلاعانىمىزداي، بالانىڭ جوعالعاندىعى جونىندە حابار الاكول اۋداندىق ءىىب قابانباي اۋىلىنداعى بولىمشەسىنە ءاشىم اۋىلىنىڭ تۇرعىنى حابار بەرگەن. الاكولدىڭ پوليسەيلەرىن اياعىنان تىك تۇرعىزعان بالاقاي ءاشىم اۋىلىنان 3 شاقىرىمداي جەردە ورنالاسقان قىستاقتان تابىلدى.

4 كۇن بويى جوعالعان ۇلدى ىزدەستىرۋگە اۋىل تۇرعىندارى، مەكتەپتە ىستەيتىن جۇمىسشىلار، اسكەري قىزمەتكەرلەر مەن 200-گە جۋىق ەرىكتىلەر ءبىر كىسىدەي ات سالىسقان.