ورتا سالماقتا WBO تۇجىرىمى بويىنشا ۇلىبريتانيالىق بوكسشى بيللي دجو سوندەرستىڭ پروموۋتەرى فرەنك ۋوررەن گەنناديي گولوۆكيننىڭ جاراقات الىپ قالۋىنا بايلانىستى كەلىسسوزدەر سوزىلىپ كەتكەنىن مالىمدەدى، - دەپ حابارلايدى vesti.kz پورتالى.
"بىزگە گولوۆكيننىڭ جاراقات الىپ قالعانىن ايتتى. مۇنىڭ نەگە الىپ كەلەتىنىن كورەيىك. وسى جەكپە-جەكتى ۇيىمداستىرۋ ءۇشىن ءبىز قولدان كەلگەننىڭ بارلىعىن جاسادىق. بيللي ونىمەن جۇدىرىقتاسۋعا لايىقتى. ءبيلليدىڭ قالتاسىندا ءاردايىم قالامى دايىن جۇرەدى. ول كەز كەلگەن بوكسشىمەن جۇدىرىقتاسۋعا كەلىسىمىن بەرەدى. قازىرگى ۋاقىتتا بارلىعى سوزىلىپ كەتتى"، - دەدى ۋوررەن. 
ايتا كەتەيىك، گەنناديي گولوۆكين ورتا سالماقتا WBA (Super)، IBO، WBC جانە IBF تۇجىرىمدارى بويىنشا الەم چەمپيونى جانە وعان وسى سالماق دارەجەسىندە بارلىق بەلبەۋلەردىڭ باسىن قوسۋ ءۇشىن تەك سوندەرستىڭ WBO تيتۋلى جەتىسپەيدى. ينسايدەرلىك اقپارات بويىنشا، ب ا ق بەتتەرىندە گولوۆكين - سوندەرس جەكپە-جەگى استانادا 17 ماۋسىمدا EXPO-2017 حالىقارالىق كورمەسى كۇندەرى وتەتىنى حابارلاندى. قازاقستاندىق بوكسشى مەن مەكسيكالىق ساۋل "كانەلو" الۆارەس اراسىنداعى جەكپە-جەك قىركۇيەكتە وتەدى دەپ بولجانادى، الايدا كەلىسسوزدەر ءالى دە ءجۇرىپ جاتىر.