استانادا ماڭعىستاۋ وبلىسىنداعى Oil Construction Company كاسىپورنى جۇمىسشىلارى كاسىپوداعىنىڭ ەڭبەك قاۋىپسىزدىگى ينسپەكتورى نۇربەك قۇشاقبايەۆقا سوت ۇكىمى شىقتى. بۇل تۋرالى ازاتتىق حابارلادى. 

استانانىڭ الماتى اۋدانىنىڭ №2 سوتىنا Oil Construction Company (OCC) كاسىپورنى جۇمىسشىلارى كاسىپوداعىنىڭ ەڭبەك قاۋىپسىزدىگى ينسپەكتورى نۇربەك قۇشاقبايەۆقا قاتىستى سوت ۇكىمىن تىڭداۋعا ونداعان بەلسەندىلەر - سوتتالۋشىنىڭ جاقتاستارى كەلدى.

"قازاقستان رەسپبۋليكاسى اتىنان" دەپ باستالاتىن ۇكىمدى وقىعان سۋديا ماڭعىستاۋ وبلىسىنداعى Oil Construction Company (OCC) كاسىپورنى جۇمىسشىلارى كاسىپوداعىنىڭ ەڭبەك قاۋىپسىزدىگى بويىنشا ينسپەكتورى، 1982 جىلى تۋعان نۇربەك قۇشاقبايەۆتىڭ قىلمىستىق كودەكستىڭ 402-باپتىڭ 2-بولىگى ("زاڭسىز ەرەۋىلگە قاتىسۋدى جالعاستىرۋعا ارانداتۋ") بويىنشا "قىلمىس جاسادى" دەپ تانىلعانىن، ەكى جارىم جىلعا باس بوستاندىعىنان ايىرىلاتىنىن مالىمدەدى. سۋديا ۇكىمىندە قۇشاقبايەۆتىڭ بۇرىن سوتتالماعانى، ۇيلەنگەنى، كامەلەت جاسقا تولماعان ءبىر بالاسىنىڭ بار ەكەنى ايتىلدى. سوت شەشىمىندە قۇشاقبايەۆتىڭ جازاسىن جالپى رەجيمدەگى كولونيادا وتەيتىنى، جازا مەرزىمى ونىڭ قاماۋعا الىنعان (2017 جىلعى قاڭتاردىڭ 20-سى - رەد.) كۇنىنەن باستاپ ەسەپتەلەتىنى جازىلعان.

ەكى جارىم جىل باس بوستاندىعىنان ايىرۋدان بولەك، سوت ۇكىمى بويىنشا قۇشاقبايەۆقا ەكى جىل مەرزىمگە قوعامدىق قىزمەت اتقارۋعا تىيىم سالىندى. سۋديا ۇكىمنىڭ "جابىرلەنۋشى تاراپ Techno Trading كومپانياسى تالاپ ەتكەن 25 ميلليون 199 مىڭ 717 تەڭگە "ماتەريالدىق شىعىندى" نۇربەك قۇشاقبايەۆتان ءوندىرۋ" تۋرالى بولىگىن وقىپ جاتقاندا سوتقا كەلگەن ازاماتتار بۇل سومانىڭ تىم قوماقتى ەكەنىنە نارازىلىق بىلدىرگەن.

نۇربەك قۇشاقبايەۆ 2017 جىلى قاڭتار ايىندا - مۇنايشىلاردىڭ اشتىق اكسياسى ءوتىپ جاتقان كەزدە ۇستالعان. ول كەزدە اقتاۋدا ماڭعىستاۋ وبلىسىنداعى قالامقاس جانە جەتىباي مۇناي كەنىشتەرىندە ىستەيتىن Oil Construction Company (وسس) مەكەمەسىنىڭ بىرنەشە ءجۇز جۇمىسشىسى تاۋەلسىز كاسىپوداقتار كونفەدەراسياسىنىڭ ادىلەت مينيسترلىگى ارىزىمەن جابىلۋىنا قارسى اشتىق جاريالاپ جاتقان.

قۇشاقبايەۆپەن بىرگە وسس كاسىپوداعى ءتوراعاسى ءامين ەلەۋسىنوۆ تە ۇستالعان. ءامين ەلەۋسىنوۆكە قىلمىستىق كودەكستىڭ 189-بابىنىڭ 4-بولىگى بويىنشا («سەنىپ تاپسىرىلعان بوتەن مۇلىكتى يەمدەنۋ نەمەسە تالان-تاراجعا سالۋ») ايىپتار تاعىلعان. ەلەۋسىنوۆتىڭ سوتى ءالى باستالعان جوق.

وسس كومپانياسىندا ەكى كاسىپوداق ۇيىمى بار. 2011 جىلى كومپانيا جۇمىسشىلارى كاسىپورىنداعى كاسىپوداق ۇيىمى قۇقىقتارىمىزدى قورعامايدى دەگەن ۋاجبەن تاۋەلسىز كاسىپوداق ۇيىمىن قۇرىپ، وعان جەتەكشىلىككە ءامين ەلەۋسىنوۆتى سايلاعان.

كەيىن اشتىق اكسياسىنا قاتىسقان 63 مۇنايشىعا ازاماتتىق جانە اكىمشىلىك سوت ارقىلى 20-دان 50-گە دەيىنگى ايلىق ەسەپتىك كورسەتكىشكە تەڭ (1 اەك – 2269 تەڭگە) ايىپپۇل سالىنىپ، سوت جالپى سوماسى 3 ميلليون 854 مىڭ 870 تەڭگە شىعىندى وتەۋدى مىندەتتەگەن.

حالىقارالىق كاسىپوداقتار كونفەدەراسياسى قازاقستان بيلىگىنەن وسس كومپانياسى كاسىپوداعى ليدەرلەرى ءامين ەلەۋسىنوۆ مەن نۇربەك قۇشاقبايەۆتى قۋدالاۋدى دوعارىپ، ەكەۋىنە بوستاندىق بەرۋدى تالاپ ەتكەن.

Human Rights Watch حالىقارالىق قۇقىق قورعاۋ ۇيىمى قازاقستاننىڭ سەرىكتەستەرىن، ونىڭ ىشىندە ەۋروپا وداعى مەن اقش-تى ەلەۋسىنوۆ پەن قۇشاقبايەۆتى بوساتۋ ءۇشىن استاناعا ىقپال ەتۋگە شاقىرعان.