ستوكگولمدە بولعان تەراكتتىڭ سالدارىنان 4 ادام قازا تاپتى، ءبىر كۇدىكتى ۇستالدى، دەپ حابارلايدى قامشى اقپاراتتىق اگەنتتىگى ريا جاڭالىقتار قىزمەتىنە سىلتەمە جاساپ.

«4 ادام قازا تاپتى، 12 ادام جاراقاتتاندى، قىلمىسقا قاتىسى بار دەگەن ءبىر كۇدىكتى ۇستالدى»، دەپ جاۋاپ بەردى ستوكگولمدەگى پوليسەي قىزمەتكەرى لارس بيسترەم SVT تەلەارناسىنا بەرگەن سۇحباتىندا.

قالا پوليسەيى يان ەۆەنسسوننىڭ مالىمەتىنشە، كوشەدەگى توپ ادامدى قاعىپ وتكەن كولىك جۇرگىزۋشىسى تابىلماعان، تەك پوليسەي جۇرگىزۋشىگە ۇقسايتىن ادامدى تاپقان. ول ازىرشە باستى كۇدىكتى رەتىندە ۇستالىپ وتىر.

پرەسس-كونفەرەنسيا بارىسىندا پوليسەي تەراكت سالدارىنان 4 ادامنىڭ قازا تاۋىپ، 15 ادام جاراقات العانىن مالىمدەدى.

ايتا كەتەيىك، 7 ساۋىردە ستوكگولمدە تەراكت ورىن الدى. جۇك كولىگى جوعارى جىلدامدىقپەن دروتتنينگگاتان كوشەسىندە سەرۋەندەپ جۇرگەن بىرنەشە ادامدى قاعىپ ءوتتى. 550 مەتر ءجۇرىپ ءوتىپ، ارتىنشا Ahlens ساۋدا ۇيىنە كەلىپ سوعىلعان. تەرگەۋ ناتيجەسىندە جۇك كولىگىنىڭ Spendrups كومپانياسىنان ۇرلانعانى انىقتالدى.

شۆەسيا پرەمەر-مينيسترى ستەفان ليەۆەن ستوكگولم ورتالىعىندا جاياۋ جۇرگىنشىلەردى قاعۋ وقيعاسىن تەراكت دەپ باعالادى.