نۇرسۇلتان نازاربايەۆ شۆەسيا كورولى XVI كارل گۋستاۆقا ستوكگولم قالاسىندا بولعان تەررورلىق اكتىگە بايلانىستى كوڭىل ايتۋ جەدەلحاتىن جولدادى، دەپ حابارلايدى "قامشى" اقپاراتتىق اگەنتتىگى اقوردا باسپا ءسوز قىزمەتىنە سىلتەمە جاساپ.
جەدەلحاتتا ستوكگولمدەگى تەررورلىق اكت سالدارىنان ادامداردىڭ قازا بولعانى تۋرالى حاباردى مەملەكەت باسشىسى زور كۇيزەلىسپەن قابىلداعانى ايتىلعان.
«ءبىز شۆەسيا حالقى مەن ۇكىمەتىنىڭ حالىقارالىق تەرروريزمگە قارسى تۇرۋ نيەتىن قولدايمىز.
قازا بولعانداردىڭ وتباسىلارى مەن جاقىندارىنا قازاقستان حالقىنىڭ جانە جەكە ءوزىمنىڭ اتىمنان كوڭىل ايتامىن. زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك بىلدىرەمىن»، – دەلىنگەن جەدەلحاتتا.
ەستەرىڭىزگە سالا كەتسەك، 7 ءساۋىر كۇنى ستوكگولمدە تەرراكت بولىپ، ناتيجەسىندە 4 ادام قازا تاۋىپ، 15 ادام جاراققاتتانعان بولاتىن. جۇك كولىگى جوعارى جىلدامدىقپەن دروتتنينگگاتان كوشەسىندە سەرۋەندەپ جۇرگەن بىرنەشە ادامدى قاعىپ وتكەن.
