قازاقستاننىڭ Cىرتقى ىستەر مينيسترلىگى سيريا توڭىرەگىندەگى جانجالدىڭ ورشەۋىنە "قاتتى الاڭدايتىنىن" ءبىلدىردى. قازاقستان بيلىگى سيريالىق ۇكىمەت پەن وپپوزيسيا كۇشتەرىن جەنيەۆا جانە استانا كەلىسسوزدەرى بارىسىندا قابىلدانعان ءبىتىم شارتتارىن ورىنداۋعا جانە كەلىسسوزدەردى جالعاستىرۋعا شاقىردى. بۇل تۋرالى سىرتقى ىستەر مينيسترلىگىنىڭ سايتىندا ارنايى مالىمدەمە ءىلىندى.
7 ساۋىردە اقش 59 قاناتتى زىمىرانمەن سيرياداعى اۋە بازاسىن اتقىلادى. امەريكالىق بيلىكتىڭ مالىمدەۋىنشە، حان-شەيحۋن قالاسىنا تاستالعان حيميالىق قارۋ ءدال وسى اۋە بازاسىندا دايىندالعان. اقش ارەكەتىن گەرمانيا، فرانسيا جانە ۇلىبريتانيا قولدادى. سيريالىق وپپوزيسيا دا بۇل شابۋىلدى ءجون كوردى.
"قازاقستان رەسپۋبليكاسىنىڭ سىرتقى ىستەر مينيسترلىگى سيرياداعى شيەلەنىستىڭ ورشۋىنە وراي اسا الاڭدۋاشىلىعىن بىلدىرەدى.
قازاقستان جاپپاي قىرىپ-جويۋ قارۋىنىڭ كەز-كەلگەن قولدانۋىن امورالدى، ادامگەرشىلىككە جات جانە ادامشىلىق قاعيداتتارىنا قايشى ارەكەت رەتىندە ۇزىلدى-كەسىلدى ايىپتايدى. بۇل فاكتى بويىنشا كىنالىلەردى جاۋاپقا تارتۋ ءۇشىن بۇۇ اياسىندا حالىقارالىق جان-جاقتى وبەكتيۆتى جانە ءادىل تەرگەۋ جۇرگىزۋدى قاعيداتتى تۇردە ماڭىزدى دەپ سانايمىز.
قاقتىعىستىڭ ودان ءارى ءورشۋى جانە تاراپتار ۇستانىمدارىنىڭ قاتاڭدانۋى حالىقارالىق قوعامداستىقتىڭ تەرروريستىك قاۋىپكە قارسى كۇرەس بويىنشا بۇرىن قول جەتكىزگەن بارلىق، ونىڭ ىشىندە جەنيەۆا جانە استانا پروسەستەرى شەڭبەرىندەگى ۋاعدالاستىقتارعا ءقاۋىپ توندىرەدى جانە سيريا جەرىندە بارلىعىن قامتيتىن بەيبىتشىلىك پەن كەلىسىمگە جەتۋ پەرسپەكتيۆاسىن الىستاتادى.
سيريا اراب رەسپۋبليكاسىنىڭ ۇكىمەتى مەن قارۋلى وپپوزيسيالىق توپتار اراسىندا 2016 جىلعى 30 جەلتوقساندا كۇشىنە ەنگەن سوعىس ارەكەتتەرىن دوعارۋ رەجيمىن ساقتاۋدىڭ جانە نىعايتۋدىڭ ماڭىزدىلىعىن اتاپ وتەمىز. استانا پروسەسىنىڭ كەپىلدىك بەرۋشى ەلدەرىن شيەلەنىستىڭ ودان ءارى ءورشۋىنىڭ الدىن الۋ ءۇشىن وزدەرىنىڭ بار كۇش-جىگەرلەرىن جۇمساۋعا شاقىرامىز.
قازاقستان سيرياارالىق قاقتىعىستى تەك بەيبىت جولمەن، ديالوگ جانە تاتۋلاسۋ ارقىلى شەشۋ مۇمكىن دەگەن ۇستانىمىنا بەرىك جانە بارلىق مۇددەلى تاراپتاردىڭ قاتىسۋىمەن استانا پروسەسى شەڭبەرىندە سيريا ۇكىمەتى مەن وپپوزيسيالىق توپتار اراسىندا تاتۋلاسۋدى ساقتاۋ بويىنشا تىكەلەي كەلىسسوزدەردى جالعاستىرۋعا شاقىرادى"، - دەلىنگەن ءسىم مالىمدەمەسىندە.
بيىل استانادا سيرياداعى جانجالدى رەتتەۋگە ارنالعان كەلىسسوزدەردىڭ بىرنەشە راۋندى ءوتتى. وعان رەسەي، تۇركيا جانە يران دەلەگاسيالارى قاتىستى. جەنيەۆا قالاسىندا دا بۇۇ باستاماسىمەن جەكەلەگەن كەلىسسوزدەر ءجۇرىپ جاتىر.
سيريالىق بيلىكتىڭ مالىمەتى بويىنشا، 7 ساۋىردە سيرياداعى اۋە بازاسىن شابۋىلداۋ كەزىندە التى اسكەر قىزمەتكەرى مەن توعىز بەيبىت تۇرعىن قازا تاپقان.
