قازاقستاندىق دەپۋتاتتاردىڭ جالاقىسى ءوستى دەپ حابارلايدى sn.kz. 

اقپارات تاراتۋشىلاردىڭ كەلتىرگەن دەرەگىنە ساي 1 ناۋرىزدان باستاپ ءماجىلىس دەپۋتاتتارىنىڭ ايلىق-جالاقىسى 30 پايىزعا ارتقان.

بۇل اقپاراتتى دەپۋتاتتار باقىتبەك سماعۇلوۆ پەن ەكاتەرينا نيكيتينسكايا دا راستاعان.

"ءيا، جالاقىمىز ءوستى. ءبىز بۇعان دەيىن ۇكىمەت مۇشەلەرىنەن از ايلىق الاتىنبىز. سوندىقتان بۇل ماسەلەنى كوتەرگەن بولاتىنبىز. ويتكەنى، حالىقارالىق تاجىريبەدە دەپۋتاتتار ەڭ جوعارى ساياسي قىزمەتكەرلەردىڭ ءبىرى بولىپ ەسەپتەلەدى. ءبىزدىڭ جالاقىمىز كوممەرسيالىق جۇيەدەگى سەكىلدى ەمەس، مەملەكەتتىك قىزمەتتەگى جۇەيدەگىدەي ۇستەمەمەن بەرىلەدى"، - دەيدى ەكاتەرينا نيكيتينسكايا.

ازىرگە دەپۋتاتتاردىڭ جالاقىسى قانشا پايىزعا وسكەنى ناقتى بەلگىلى ەمەس، كەيبىر دەرەكتەردە 30 پايىز، وزگەلەرىندە 50 پايىز دەپ كورسەتىلگەن.

ءماجىلىس دەپۋتاتتارىنىڭ ءبارى بىردەي جالاقى المايدى ەكەن. ولارعا جۇمىس ىستەيتىن كوميتەتتەرىنە بايلانىستى ءارتۇرلى ۇستەمەلەر تولەنەدى. جالپى العاندا، ماجىلىسمەندەردىڭ ورتاشا جالاقىسى بۇعان دەيىن 500 مىڭ تەڭگەنى قۇراپ كەلگەن.