ءتۇسىرىلىم وسى جىلدىڭ قازانىندا باستالىپ، 2018 جىلدىڭ جەلتوقسانىندا پرەمەراسى وتەدى دەپ جوسپارلانۋدا. جوبا اۆتورلارى – ءاليا نازاربايەۆا مەن تيمۋر جاقسىلىقوۆ.
مادەنيەت جانە سپورت مينيسترلىگىنىڭ تاپسىرىسىمەن ش. ايمانوۆ اتىنداعى قازاقفيلم «ساتايفيلم» كومپانياسىمەن بىرىگىپ ساقتاردىڭ پاتشايىمى – ۇلى توميريس جايىندا تاريحي ءفيلمنىڭ جۇمىستارىنا كىرىسىپ كەتتى.
ءفيلمنىڭ سيۋجەتى ءبىزدىڭ ەرامىزعا دەيىنگى VI عاسىرداعى توميريس پاتشايىم باسقارعان ساقتار تايپاسى جايىندا وربىمەك. ناقتىراق ايتقاندا، توميريس پاتشايىمنىڭ ۇلى دالانى جاۋلاۋ ماقساتىندا پارسى پاتشاسى كير ىى-گە قارسى تويتارىس بەرىپ، جانىن العانى سۋرەتتەلەدى.
«حالىقتار اراسىنداعى جورىقتاردىڭ ىشىندەگى ەڭ ۇلكەنى وسى بولدى» دەپ جازعان تاريحتىڭ اتاسى گەرادوت.
«توميريس جايىندا فيلم ءتۇسىرۋ يدەياسى ءاليا نازاربايەۆانىكى. «اناعا اپارار جول» جوباسى بويىنشا جۇمىس ىستەگەننەن كەيىن، ونىڭ ۇسىنعان كەلەسى جوباسى بويىنشا جۇمىسقا ۇلكەن جاۋاپكەرشىلىكپەن كىرىسپەكپىن. ءبىز سەناريي جازۋ، جوبانىڭ ناقتى جوسپارى، ءتۇسىرىلىم توبىن قالىپتاستىرۋ، تاريحي دەرەكتەردى ىزدەنۋ سىندى دايىندىق جۇمىستارىنا كىرىسىپ كەتتىك»، دەيدى اتالمىش كارتينانىڭ رەجيسسەرى اقان ساتايەۆ.
جاقىن ارادا رەسپۋبليكالىق كاستينگ جاريالاناتىن بولادى. اكتەرلەردەن تالاپ ەتىلەتىن دۇنيەلەر: اتپەن شابا الۋ، ساداقپەن اتۋ، سونداي-اق اسكەري قابىلەتى دە بولۋى ءتيىس. ءتۇسىرىلىم 2017 جىلدىڭ قازان ايىندا باستالادى، ال، 2018 جىلدىڭ جەلتوقسانىندا كورەرمەن نازارىنا ۇسىنىلادى. تاريحي جوبانىڭ اۆتورلارى – ءاليا نازاربايەۆا مەن تيمۋر جاقسىلىقوۆ.
توميريس جايىندا فيلم حالىققا ۇلكەن قىزىعۋشىلىق تۋدىراتىنىنا اقان ساتايەۆ سەنىمدى.
