بايقوڭىر ايلاعىندا نەگىزگى عارىش كەمەسىنە اينالۋى ءتيىس قازاقستان مەن رەسەيدىڭ بىرلەسكەن «سۇڭقار» زىمىرانى 2024 جىلى قۇراستىرىلىپ بىتەدى.
بۇل تۋرالى inform.kz «يزۆەستيا» باسىلىمىنا سىلتەمە جاساپ حابارلايدى.
«روسكوسموس» مەملەكەتتىك كورپوراسياسى ۇسىنعان جوبا سيپاتتاماسىندا اتاپ كورسەتىلگەنىندەي، عارىش كەمەسىن سىناۋ 2024 جىلى باستالماق. ال 2025 جىلى «سۇڭقار» كوممەرسيالىق پايدالانۋعا بەرىلەدى. وسىدان سوڭ، «روسكوموس» گەپتيلمەن ۇشىرىلاتىن پروتون-م راكەتالارىن قولدانۋدى دوعارادى. قازاقستاندىق سەرىكتەستەر كورپوراسيانىڭ ۇسىنىسىنا كەلىسىمىن بەرىپ وتىر، دەپ حابارلادى باسىلىمعا «قازعارىش» اگەنتتىگىنە جاقىن دەرەككوزدەردىڭ ءبىرى.
دەگەنمەن جاڭا راكەتانىڭ ۇشىرىلۋىنا قاجەتتى جاڭا ينفراقۇرىلىمنىڭ قۇرىلىسىنا قاتىستى ساۋالدار ءالى دە وزەكتى.
«قاراجات جاعى نەگىزىنەن قازاقستان تاراپىنان بولعاندىقتان، بۇل ماسەلەنىڭ قارجىلىق جاعى تالقىلانۋدا. ەسەپتەۋ جۇمىستارى جۇرگىزىلۋدە. ءبىراق يدەيا دەڭگەيىندە بۇل بىزگە ۇنايدى»، - دەپ كەلتىرەدى دەرەككوزدىڭ ءسوزىن باسىلىم.
قازاقستان مەن رەسەي ەكولوگيالىق تازا «بايتەرەك» زىمىران-تاسىعىشىن ۇشىرۋ بويىنشا جۇمىستاردى اتقارىپ كەلەدى. بۇرىن حابارلانعانىنداي، «روسكوسموس» «بايتەرەك» كەشەنىنىڭ جاڭا فورماتتاعى ارىپتەستىگىن دامىتۋدى ۇسىندى. رەسەي تاراپى قازاقستان ءۇشىن «زەنيت» زىمىرانىنىڭ بارلىق جاقسى قىرلارىن الاتىن جاڭا ەكولوگيالىق تازا زىمىران قۇراستىرىپ بەرەدى. ال قازاقستان جاعى زىمىران ۇشىرىلاتىن ينفراقۇرىلىمىن دايىنداۋى ءتيىس. باسىلىم مالىمەتتەرى بويىنشا، راكەتانىڭ قۇرىلىسىنا قاجەتتى قارجى 2016-2025 جىلدارعا ارنالعان فەدەرالدىق عارىش باعدارلاماسى اياسىندا بولىنەدى. راكەتانىڭ قۇرىلىسىن سامارالىق «پروگرەسس» عارىش ورتالىعى جۇرگىزەدى. وعان حرۋنيچيەۆ ورتالىعى مەن ماكەيەۆ اتىنداعى زىمىران ورتالىعى قولداۋ كورسەتپەك.
