رەسەي مەملەكەتتىك دۋماسىنىڭ دەپۋتاتى ۆيتاليي ميلونوۆ 10 ساۋىردە دۋما قاراۋىنا "الەۋمەتتىك جەلىلەر قىزمەتىن قۇقىقتىق رەتتەۋ تۋرالى" زاڭ جوباسىن ۇسىندى. جوبادا 14 جاسقا دەيىنگى بالالارعا "ازاماتتىعى قانداي ەكەنىنە قاراماستان" الەۋمەتتىك جەلىلەردى قولدانۋعا تىيىم سالۋ قاراستىرىلعان، دەپ حابارلايدى ازاتتىق.

ميلونوۆتىڭ باستاماسى بويىنشا، قولدانۋشىنىڭ جاسىن انىقتاۋ ءۇشىن الەۋمەتتىك جەلىلەرگە جەكە باسىن كۋالاندىراتىن قۇجات ارقىلى تىركەۋ كەرەك. بۇدان وزگە، قولدانۋشىلار تىركەلۋ كەزىندە ويدان شىعارىلعان اتتاردى پايدالانا المايدى. سونىمەن قاتار، زاڭ جوباسىندا الەۋمەتتىك جەلىلەردە قولدانۋشىنىڭ رۇقساتىنسىز وعان قاتىستى جازبالاردىڭ سكرينشوتىن تاراتۋعا دا تىيىم سالىنباق.

زاڭ جوباسىنىڭ اۆتورى الەۋمەتتىك جەلىلەردى رۇقسات ەتىلمەگەن ميتينگىلەر مەن شەرۋلەردى ۇيىمداستىرۋعا پايدالانۋعا دا تىيىم سالۋدى ۇسىنادى. دەپۋتات سونىمەن بىرگە بيۋدجەتتىك مەكەمەلەردە دە الەۋمەتتىك جەلىلەردى پايدالانۋعا تىيىم سالماققا نيەتتى.

بۇگىن بۇدان بۇرىن بۇكىلرەسەيلىك قوعامدىق پىكىردى زەرتتەۋ ورتالىعى (ۆسيوم) الەۋمەتتىك جەلىنى پايدالانۋعا قاتىستى جۇرگىزگەن ساۋالناماسىنىڭ قورىتىندىسىن جاريالاعان. ونىڭ ناتيجەلەرى بويىنشا، ساۋالناماعا جاۋاپ بەرگەندەردىڭ 52 پايىزى الەۋمەتتىك جەلىلەرگە جەكە باسىن كۋالاندىراتىن قۇجاتپەن تىركەلۋگە قارسى شىققان. دەگەنمەن، ساۋالناماعا قاتىسقانداردىڭ 62 پايىزى 14 جاسقا دەيىنگى بالالاردىڭ الەۋمەتتىك جەلىلەردى قولدانۋىنا تىيىم سالۋدى قولداپ شىققان.