ورال قالاسىندا ادام شوشىرلىق قىلمىس ورىن العان، دەپ جازادى «قامشى» اقپاراتتىق اگەنتتىگى.

كتك ارناسىنىڭ حابارلاۋىنشا، اۋىل شارۋاشىلىعى مينيسترلىگىنىڭ اۋماقتىق ينسپەكتورى مەن  ءبولىم باسشىسى اراق ءىشىپ وتىرىپ سوزگە كەلىپ قالادى. ارتىنشا شەنەۋنىك باسشىسىن تاياققا جىعىپ، ءولتىرىپ قويعان. باتىس قازاقستان وبلىستىق مەملەكەتتىك ينسپەكسيانىڭ ءبولىم باستىعىنىڭ سوققىدان كوزجۇمعانى كورىنىپ تۇرسا دا ءىس  «باسشىنىڭ ءوزى ولدىمەن» جابىلعان. سوت ساراپتاماسىنداعىلار شەنەۋنىكتىڭ تاياقتان ەمەس جۇرەك تالماسىنان قايتىس بولعانىن ايتادى. بۇعان نارازىلىق تانىتقان  مارقۇمنىڭ تۋىستارى مايىتكە ەكسگۋماسيا جاساتىپ، ونىڭ كىسى قولىنان قازا تاپقانىن دالەلدەگەن.

-العاشقىدا ءىس توقتاتىلدى. كەيىن «ءوز ولىمىمەن ءولدى» دەپ مۇلدەم جاۋىپ تاستادى. ول قالاي ءوزى ولەدى؟ تۇرىنەن كورىنىپ تۇر عوي، تاياق جەگەن. ونى تىلەك حيممەدەنوۆ جاۋىزدىقپەن ۇرىپ ولتىرگەن، – دەيدى مارقۇمنىڭ جارى دينا تولەگەنوۆا.

كۇدىكتى تىلەك حيممەدەنوۆ  – اگروونەركاسىپتىك كەشەندەگى مەملەكەتتىك ينسپەكسيا كوميتەتىنىڭ يسپەكتورى. مارقۇمنىڭ تۋىستارى ءدال وسى قىزمەتكەرگە كۇدىك كەلتىرىپ وتىر. ءتىپتى تاباندارىنان تاۋسىلىپ ءجۇرىپ دالەلدەپ تە بەرگەن. ول ءۇشىن ءمايتتى قايتا قازىپ الىپ،  استانالىق دارىگەرلەرگە تەكسەرتكەن. ولار مارقۇمنىڭ جۇرەك تالماسىنان ەمەس، تۇنشىعىپ ولگەنىن انىقتاعان.      

-قىلمىس ورنىندا تۇسىرىلگەن سۋرەتتەر بار. بەتىن ادام تانىماستاي ەتىپ ۇرعان. ونى دالەدەۋ ءۇشىن ەكسگۋماسيا جاساتۋعا ءماجبۇر بولدىق. ەندى ونى بايلاپ قويىپ ولتىرگەن دەگەن كۇدىگىمىز بار، – دەيدى مارقۇمنىڭ اپكەسى مايسۇلۋ تولەگەنوۆا.

و باستا قاتىسى جوق دەلىنگەن كۇدىكتى ەندى «باستىعىم وزىمە تاپ بەردى» دەپ سوتتا اقتالۋدا. ايتۋىنشا، سول كۇنى ەكەۋى جۇمىستان بىرگە شىعىپ، ءبىراز اقتان العان. ءسويتىپ ارادا ەرەگىس شىعىپ، سوڭى باس ينسپەكتوردىڭ ولىمىمەن اياقتالعان. الايدا، مارقۇمنىڭ مۇرنىن بەت قىلعانىنا قاراماستان، كۇدىكتى «جەڭىل جاراقات» بابىمەن قۇتىلماقشى ەكەن. دەسە دە، بۇعان ەشقاشان جول بەرمەيمىز دەپ بەكىنگەن مارقۇمنىڭ جاقىندارى، سوتتان كەمى 15 جىل ۇكىم كەسۋدى سۇراپ وتىر.