جارتىلاي اۋىر سالماقتاعى WBA (Super)، WBO جانە IBF تۇجىرىمدارى بويىنشا الەم چەمپيونى، امەريكالىق اندرە ۋورد (31-0، 15 كو) ورتا سالماقتاعى WBA (Super)، IBO، WBC جانە IBF تۇجىرىمدارى بويىنشا الەم چەمپيونى، قازاقستاندىق بوكسشى گەنناديي گولوۆكينمەن (37-0، 33 كو) جەكپە-جەك وتكىزۋ ءۇشىن سالماق اۋىستىرمايتىنىن ايتتى ،-دەپ حابارلايدى قامشى اقپاراتتىق اگەنتتىگى vesti.kz باسىلىمىنا سىلتەمە جاساي وتىرىپ. 

بۇعان دەيىن امەريكالىق بوكسشىنىڭ باپكەرى ۆيردجيل حانتەر ەگەر گولوۆكين 168 فۋنتقا كوتەرىلسە، جەكپە-جەك وتكىزۋگە دايىن ەكەنىن ايتتى.  «ءبىز سالماعىمىزدى اۋىستىرامىز. سوندىقتان گولوۆكيننىڭ جەكپە-جەكتەن باس تارتاتىن باسقا سەبەبى بولمايتىن شىعار. ءبىز كوۆاليەۆپەن جەكپە-جەك وتكىزىپ بولعاننان كەيىن سالماعىمىزدى اۋىستىرامىز. سول ۋاقىتتا گولوۆكيننىڭ قاشىپ قۇتىلاتىن امالى بولمايدى»، – دەگەن ەدى باپكەر. 

ال قازاقستاندىق بوكسشىنىڭ پروموۋتەرى توم لەففلەر بولسا گولوۆكيننىڭ 168 فۋنتقا كوتەرىلىپ، ۋوردپەن كەزدەسۋى ابدەن ىقتيمال ەكەنىن ايتتى.  دەگەنمەن، اندرە بۇل الىپ-قاشپا اڭگىمەگە نۇكتە قويىپ، سالماق اۋىستىرمايتىنىن ايتتى.  «مەن 168 فۋنتقا تۇسپەيمىن. بۇل سالماقتا مەن بۇعان دەيىن ونەر كورسەتكەن ەدىم. حانتەردىڭ بۇل تۋرالى ايتقانىن ەستىدىم. ءبىراق مەن سالماق اۋىستىرمايمىن. مەن ونى باسقا سالماققا اۋىسارعا دەيىن ايتقان ەدىم. گولوۆكيننىڭ مەنىمەن جەكپە-جەك وتكىزەتىن مۇمكىندىگى بولدى. ءبىراق ول بىزگە بەيمالىم سەبەپكە بايلانىستى كەزدەسۋدەن باس تارتتى. ول جەكپە-جەكتى ەكى-ۇش جىلعا كەيىنگە شەگەرگىسى كەلدى. الايدا ءقازىر مەن سالماق اۋىستىرىپ قويدىم. سوندىقتان ەندى 168 فۋنتقا تۇسپەيمىن. ەگەر ول سالماعىن اۋىستىرىپ، مەنىمەن كەزدەسۋ وتكىزگىسى كەلەتىن بولسا، وندا اڭگىمە باسقاشا بولادى»، – دەپ كەلتىرەدى ۋوردتىڭ ءسوزىن BoxingScene.com پورتالى.