بەيبىتشىلىك سالاسىنداعى نوبەل سىيلىعىنىڭ لاۋرەاتى مالالا يۋسۋفزاي بۇۇ-نىڭ ەڭ جاس بەيبىتشىلىك ەلشىسى اتاندى،-دەپ حابارلايدى قامشى اقپاراتتىق اگەنتتىگى ازاتتىق راديوسىنا سىلتەمە جاساي وتىرىپ.

پاكىستاندىق 19 جاستاعى بەلسەندىنى بەيبىتشىلىك ەلشىسى ەتىپ تاعايىنداۋ سالتاناتى بۇۇ-نىڭ نيۋ-يوركتەگى شتاب-پاتەرىندە ءوتتى. سالتاناتتى شاراعا بۇۇ باس حاتشىسى قاتىستى. "سەن قاھارمان عانا ەمەس، وتە قايسار ءارى جومارت ادامسىڭ" دەدى گۋتەررەش مالالاعا. مالالا وعان "ءبىز قىزدارعا ءبىلىم بەرسەك قوعامدى وزگەرتەمىز. مەنىڭ ءۇمىتىم مول جانە قىزداردى وزدەرىن كورسەتۋگە، ءوز كۇشتەرىنە سەنۋگە شاقىرامىن" دەدى.

مالالا 2012 جىلى پاكىستاندا ءوزى وقىپ جۇرگەن مەكتەپ اۆتوبۋسىنا جاسالعان شابۋىلدا باسىنا وق ءتيىپ، جارالانعان. شابۋىلدى مالالانىڭ قىزدارعا ءبىلىم بەرۋ كامپانياسىنا قارسى تاليبتەر جاساعان. مالالا شابۋىلدان اۋىر جارالانعان، ءبىراق ۇلىبريتانيادا ەمدەلىپ، امان قالدى. ءقازىر سول ەلدە تۇرىپ جاتىر. وزىنە قاستاندىق جاسالعالى بەرى ول الەمدى ارالاپ، قىزداردىڭ ءبىلىم الۋىنا مۇمكىندىك بەرۋگە شاقىرىپ كەلەدى. 2014 جىلى ول بەيبىتشىلىك سالاسىنداعى نوبەل سىيلىعىن يەلەندى.