(سۇراق: ءسىز كورىپكەلگە سەنەسىز بە؟)
«جولىمدى اشتىرايىنشى» دەگەن ويمەن، اتاعى اسپانداپ، ايعا ءىلىنىپ قالعان كورىپكەل ايەلگە باردىم. كەزەگىم كەلگەن سوڭ كىردىم. كورىپكەل قولىمنىڭ تامىرىن ۇستاپ تۇرىپ: –ءسىز «توشنو» ەركەك ەكەنسىز... –دەدى. قۋانىپ كەتتىم. قالاي ءبىلىپ قويدى دەسەڭىزشى؟ مەن ەركەك ەكەنمىن عوي! ەي، جاراندار، ماعان قاراڭدار، مەن... مەن ەركەكپىن! –ءسىز ايەل ەمەسسىز... –دەدى ول تاعى دا. –شىنىمەن ايەل ەمەسپىن عوي؟ قالاي ءبىلىپ قويدىڭىز؟ كورىپكەلدىگىڭىز كەرەمەت ەكەن! –ماعان ءارۋاقتار سمس–پەن حات جىبەرىپ جاتىر... –راحمەت سىزگە اپاي! –كىندىگىڭىز بىرەۋ عانا... –قالاي بىلگىش ەدىڭىز! عاجاپ! –دەپ تاڭقالدىم! كويلەگىمنىڭ سىرتىنان قاراپ وتىرىپ–اق، قالاي ءبىلىپ قويدى دەسەڭىزشى! مۇنداي كورىپكەلدى ءبىرىنشى كورۋىم! قول سوعىپ قويىڭىزدار، مىرزالار! مەنىڭ كىندىگىم بىرەۋ عانا ەكەن! –ءسىز... ءسىز اكە–شەشەڭىزدەن تۋىلعانسىز... –«ينكۋباتور» ەمەسپىن عوي؟ –دەپ سۇرادىم مەن. –اكەڭىز ەمەس، شەشەڭىز تۋعان ءسىزدى... –عاجاپ! مەن مۇنى بىلمەي ءجۇر ەدىم... –ءسىز ادامسىز... –يا، يا، ادام ەمەس حايۋۋاندار كوپ قوي! رەسەي بانديتتەرى ۋكراين ساربازدارىنىڭ باستارىن كەسىپ، «پوسىلكامەن» اكە-شەشەلەرىنە جىبەرىپ جاتىر دەيدى... بۇل سوعىس– قانىشەرلىك، باسقىنشىلىق سوعىس بولدى عوي... –ءسىز ۇيلەنگەنسىز. –كەشىرىڭىز، ۇيلەنگەن جوق ەدىم... قىرىققا كەلىپ، ۇيلەنۋ ەسىمنەن شىعىپ كەتىپتى... –دەپ ايتسام، شىنىمەن سەنىپ قالماڭىز... –جولىمدى اشىپ بەرسەڭىز... –جولىڭىز جابىق ەكەن. ءقازىر ءسىز جۇرەتىن كوشەنى گاز مەكەمەسى قازىپ تاستاعان. ولار جولدى جاپقان سوڭ، سۋ مەكەمەسى قازىپ تاستايدى... –جوعا، ومىردە جولىم بولماي ءجۇر دەگەنىم عوي... –ومىردە دە تروتۋارمەن ءجۇرىڭىز. –جۇمىسقا تۇرامىن با؟ قاي جەرگە بارسام دا، اقشا سۇرايدى... –جۇمىسسىزسىز با؟ –يا. جۇمىسسىزبىن... –مۇنىڭ ءوزى جاقسى ماماندىق... جۇمىسسىز ءجۇرۋدىڭ ءوزى– جۇمىس... –ءبىر باسىم قاشان ەكەۋ بولادى ەكەن؟ –ەكى باستى ادامداردى سيام ەگىزدەرى دەيدى... ءسىز ولگەنشە وسى سۋ مي باسىڭىزبەن جۇرەسىز... –پەشەنەمە نە جازىلعان؟ –ولەڭ جازىلىپتى... مۇقاعالي ماقاتايەۆتىڭ «الپىستان اسىپ بارامىن» دەگەن ولەڭى... –«وتىزدان اسىپ بارامىن» دەگەن سياقتى ەدى... –ول ادام وسى ۋاقىتقا دەيىن الپىستان اسىپ، قاقپاس بولعان شىعار؟ –اپاي، قانشا جىل ءومىر سۇرەدى ەكەنمىن؟ –ايتەۋىر ءبىر كۇنى ولەسىز... كورىپكەلدىڭ كەرەمەتىنە تاڭ قالىپ، الاقانىنا مىڭ تەڭگە الپىس تيىن ۇستاتىپ، ۇيىنەن قۋانىپ شىقتىم. كەڭكەلەستەردەي كەرىلىپ تۇر ەدىم، اتاڭا نالەت دەسە، ءىشىپ العان با دەيمىن، ءبىر پوليسەيدىڭ ماشيناسى قۇيىنداتىپ كەلدى دە، قاعىپ كەتتى! «ايتەۋىر ءبىر كۇنى ولەسىز...» دەپ قالاي ءبىلىپ ايتقان ەدى دەسەڭىزشى! ال مەنىڭ ولگىم كەلمەيدى، مىرزالار...
(اۆتوردىڭ Facebook-تەگى پاراقشاسىنان)
