ۇرانىمىز الاش بولاتىن، الاش دەسە اتتانۋعا دايىن تۇراتىن ەدىك... بيىل الاش ورداعا 100 جىل تولىپ وتىر. ءيسى قازاق ءۇشىن الاششىل ازاماتتاردىڭ ورنى بولەك ەكەنىن ءتۇسىندىرۋدىڭ قاجەتى جوق. سول سەبەپتى دە «قامشى» اقپاراتتىق اگەنتتىگى مەملەكەتتىك، ۇلتتىق ماڭىزعا يە الاش قوزعالىسىنىڭ مەرەيتويىن جوعارى دەڭگەيدە اتاپ ءوتۋدى جوسپارلاعان بولاتىن. كونفەرەنسيا، دوڭگەلەك ستول دەگەننەن، بىلايشا ايتقاندا اۋىز جىبىرلاتۋدان جۇرت شارشاعاندىقتان ناقتى ىسكە كوشىپ، سونىڭ وزىندە قۇر تويلاپ، مال شاشپاي، حالىققا پايدالى بولسىن دەگەن نيەتپەن  نەگىزگى 5 ءىس-شارانى وتكىزۋدى ۇيعارعان ەدىك: الاش ازاماتتارى رۋحىنا قۇران باعىشتاپ اس بەرۋ؛ 100 اعاش ەگۋ؛ 100 جەتىم بالانى كيىندىرىپ، ويىنشىق جانە وقۋ قۇرالىمەن قامتاماسىز ەتۋ؛ 100 ستۋدەنتكە ستيپەنديا تاعايىنداۋ؛  الاش مۇراسىن زەرتتەگەن 10 قايراتكەرگە مەرەكەلىك مەدال تابىستاپ، سىي-قۇرمەت كورسەتۋ؛

قازاق ءتىلدى باق-قا جار سالىپ، احاڭنىڭ ءمۇراجاي-ۇيىنىڭ الدىنا كيىز ۇيلەر تىگىپ، ءان ايتىپ، جىر وقىپ، الاش ازاماتتارىن ەسكە سالىپ، ولاردىڭ رۋحىنا ارناپ قۇران باعىشتاپ، اس بەردىك. 500 ادامنىڭ باسىن قوسقان اسقا الاشتانۋشى مامبەت قويگەلدى «مۇنداي اس بۇرىن-سوڭدى بەرىلمەگەن ەدى» دەپ ريزاشىلىعىن ءبىلدىردى. ءبارىن ايت تا ءبىرىن ايت، جاقسىلاردىڭ باسىن قوسىپ، قازاقتىڭ ەڭسەسىن كوتەرىپ، استى رەسپۋبليكالىق دەڭگەيدە ۇيىمداستىرا العانىمىزبەن الاش قۇرمەتىنە 100 اعاش وتىرعىزۋعا كەلگەندە سايابىرسىپ قالدىق. ءىسىمىزدى ماقۇلداپ، يىعىمىزدان قاققاندار كوپ بولعانىمەن ناقتى ىس-ارەكەت جاساۋعا كەلگەندە كوبىسى ۇندەمەستىك تانىتتى. 100 اعاش وتىرعىزامىن دەگەن «قامشىعا» قالا اكىمدىگى جەر تەلىمىن دە بەردى. الماتى قالاسىنداعى بايتۇرسىنوۆ پەن جامبىل كوشەلەرىنىڭ قيىلىسىندا ورنالاسقان بايتۇرسىنوۆ ساياباعىنىڭ اۋماعىندا اعاش وتىرعۋزىعا رۇقسات الدىق. قالا ىشىندە جەمىس-جيدەك اعاشىن وتىرعىزۋعا رۇقسات ەتىلمەگەندىكتەن تاڭداۋىمىز «كۇل اعاشىنا(ياسەن)» ءتۇستى. بىلايشا ايتقاندا، ءبارى دايىن. اتادان مال قالعانشا، تال قالسىن دەمەۋشى مە ەدى، 100 اعاش ەگىلگەن جەردىڭ «الاش اللەياسىنا» اينالعانىن قالايتىن قازاقتىڭ سانى از بولىپ شىقتى. وكىنىشىمىزگە قاراي. «100 اعاش وتىرعىزۋعا تىزىمدەلۋ باستالدى» دەگەندە ەلۋدەن استام ادام قولداۋ كورسەتىپ، اتوي سالىپ، ماقالا استىندا «قولدايمىن، وتىرعىزامىن» دەپ پىكىر قالدىرعانىمەن، ەلۋدىڭ تەك ساۋساقپەن سانارلىعى عانا كورسەتىلگەن ەسەپشوتقا اعاشتىڭ اقشاسىن (ءبىر اعاشتىڭ قۇنى 10 000 تگ.) اۋداردى. ناۋرىزدىڭ سوڭى مەن ءساۋىردىڭ باسىندا اعاش ەگەمىز دەگەن جوسپارىمىزدىڭ جوعارىداعى سەبەپكە بايلانىستى كەشەۋىلدەدى. بۇدان ارتىق كۇتە الماعاندىقتان تاۋەكەلگە بەل بۋىپ، 15 ءساۋىر كۇنى الماتى قالاسىندا «الاش اللەياسىن» وتىرعىزباقشىمىز.

فەيسبۋكتە وتىرعان قازاق سىرت كوزگە نامىسشىل، ۇلتجاندى بولىپ كورىنەدى. قازاقتى قايرايتىن جالىندى جازبالار جازاتىن فەيسبۋكشىل ازاماتتار دا جەتەرلىك. بىرەر ساعاتتا عالامتور بەتىن شارلاپ كەتەتىن مىنا ماقالا فەيسبۋكتە دە كورىنبەي قالماسى انىق. ەندەشە فەيسبۋكتىڭ بەلسەندى 10 000 قولدانۋشىسى اراسىنان 100 الاششىل ازامات شىقپاۋى مۇمكىن ەمەس. ءسوز سۇيەگىنەن وتەتىن قازاق «الاش ءۇشىن اعاش وتىرعىزاتىن قازاق تابىلمادى» دەگەن سىنعا شىداي الماي، قولىنا كۇرەك الىپ، اعاش ەگۋگە بىلەك سىبانا كەلەدى دەگەن ۇمىتتەمىز. 1000 ءسوز ەمەس، قايتالاپ ايتايىق، ارتىمىزدان 1 اعاش قالسىن دەگەن اعايىندى قامشىگەرلەر 15 ءساۋىر كۇنى تاڭعى ساعات 09:00-دە الماتىداعى بايتۇرسىنوۆ ساياباعىندا كۇتەدى. 10 000 تەڭگەڭىزدى بەيسەنبى كۇنگە ياعني ءساۋىردىڭ 13-نە دەيىن مىنا ەسەپشوت نومىرىنە اۋدارىپ، بىزبەن بايلانىسقا ءتۇسۋىڭىز قاجەت.

«Center credit» بانكى

4667 2048 4780 1804

جسن: 960124400773 (ءدىلبار قادىرقۇل)

سوما: 10 000 تگ.

بارلىق سۇراق بويىنشا: 87017235500

باس رەداكتور: جازيرا بايدالى