انا بولۋ – ءار قىزدىڭ ماڭدايىنا جازىلعان ۇلكەن ب ا ق. الايدا، مۇنداي باقىتقا قول جەتكىزە الماي جۇرگەن قانشاما قىز-كەلىنشەكتەرىمىز بار. دەگەنمەن، اقشاڭ بولسا، ءبارىنىڭ دە شەشىمىن تابۋعا بولادى. بالالار ۇيىنەن جەتىم بالانى اسىراپ الادى، نە بولماسا قۇرساق انالاردى ىزدەۋگە كوشەدى. وندايدا وزگە وتباسىنا بالا تۋىپ بەرەمىن دەگەن انالار كەزەكتە تۇرادى، تەك اقشاسىن بەرسەڭىز بولدى، دەپ حابارلايدى «قامشى» اقپاراتتىق اگەنتتىگى.

كتك ارناسىنىڭ مالىمەتىنشە، ەلىمىزدە اقشا ءۇشىن وزگەنىڭ پەرزەنتىن 9 اي قۇرساعىندا كوتەرەتىن ايەلدەر كوبەيىپ كەلەدى. قۇرساق انالار بۇل قىزمەتتى 5 ميلليون تەڭگەگە دەيىن باعالايتىن بولعان. كوبى مۇنداي ارەكەتكە قارجىدان قىسىلعاندىقتان بارادى ەكەن. دەسە دە، ولاردىڭ ءبارى قۇرساق انا بولىپ، وڭاي پايداعا كەنەلە المايدى. ويتكەنى، ەلىمىزدە بۇل ادىسكە زاڭمەن رۇقسات ەتىلگەنىمەن، قويىلاتىن تالاپ قاتاڭ. ال ءدىن بويىنشا قۇرساقتى جالعا بەرۋگە مۇلدەم تىيىم سالىنعان.

الماتىلىق ءمولدىر – 3 بالانىڭ اناسى. الايدا ونىڭ قۇرساعىنان 5 بىردەي شاقالاق شىققان. تەك بىلتىر دۇنيەگە كەلگەن ەگىزدەردى ول ءوز پەرزەنتى رەتىندە سانامايدى. ويتكەنى ولاردى باسقا وتباسىعا سۋرروگات ادىسىمەن تۋىپ بەرىپتى.

ءمولدىر، قۇرساق انا:

-جالعىز كۇيەۋىم عانا جۇمىس ىستەدى. مەن دە جۇمىس ىستەدىم. جالاقى از. سول ءۇشىن دە وسىنداي جاعدايعا باردىم.

ەكو ادىسىمەن ۇرىعى ءمولدىردىڭ جاتىرىنا سالىنعان ەرلى-زايىپتىلار قۇرساق انانى كەرەك-جاراقتىڭ بارىمەن قامتاماسىز ەتكەن. جاتىرىن جالعا بەرگەن ايەل اي سايىنعى تولەمنەن بولەك، 3 ميلليون تەڭگە الىپتى.

ءمولدىر، قۇرساق انا:

-امان-ەسەن سول كىسىلەردىڭ بالاسىن تۋىپ بەردىم، سۇراعانىمدى بەردى. سونىمەن جاقسى قوشتاستىق.

سويتسەك، ەلىمىزدە قۇرساق انا بولۋعا قۇشتار ايەلدەر كوپ ەكەن. عالامتوردا سونداي حابارلاندىرۋدان كوز سۇرىنەدى. مۇندا قۇرساق انا بولعىسى كەلەتىندەر دە، ونى ىزدەگەندەر دە جەتكىلىكتى.

«جاسىم 24-تە. قۇرساق انا بولامىن. ماعان شۇعىل تۇردە اقشا كەرەك».

«مەنىڭ قۇرساق انا بولعىم كەلەدى. شارتىم – استانادان 2 بولمەلى پاتەر».

دەگەنمەن، دارىگەرلەر وز-وزىنە جارناما جاساعانداردىڭ ءبارى قۇرساق انا بولا المايتىنىن ايتادى. ەلىمىزدە بۇل ادىسكە رۇقسات ەتىلسە دە، ونىڭ قاتاڭ تالاپتارى بار.

سالتانات بايقوشقاروۆا، رەپرودۋكتولوگ-ەمبريولوگ:

-جازعانداردىڭ ءبارى سۋرروگاتتى انا بولا المايدى. ويتكەنى، دەنساۋلىعى كوتەرمەۋى مۇمكىن. دارىگەرلەردىڭ تەكسەرىسىنەن وتكەننەن كەيىن بەلگىلى بولادى.

بۇعان قوسا، قۇرساق انانىڭ كەمى 1 بالاسى بولۋى شارت. كۇيەۋىنىڭ رۇقساتى دا اسا ماڭىزدى. ءارى مۇمكىندىك تەك 35-جاسقا دەيىنگى ايەلدەرگە عانا بەرىلەدى. ءبىراق ەندى ءوز تۋىستارىنا قۇرساق انا بولعىسى كەلەتىندەردىڭ جاسىن ۇزارتۋ ماسەلەسى قوزعالىپ جاتىر.

زاۋرەش امانجولوۆا، ءماجىلىس دەپۋتاتى:

-جان-جاقتى عىلىمي دارەجەدە دالەلدەۋ كەرەك.  كەلەسى جولى مۇمكىن 40 دەپ ايتارمىز. وسىلاي ايتۋ ءۇشىن، جوعارى دەڭگەيدە دالەلدەنگەن مەديسينالىق تەكسەرۋلەر قاجەت.

ال ءدىني تۇرعىدا قۇرساقتى جالعا بەرۋگە مۇلدەم تىيىم سالىنعان.

باۋىرجان ءابدۋالى، قازاقستان مۇسىلماندارى ءدىني باسقارماسى شاريعات جانە ءپاتۋا ءبولىمىنىڭ مامانى:

-شاريعاتىمىزدا ءبىرىنشى تەكتى ساقتاۋعا ءمان بەرەدى. قۇرساق انانىڭ گەنەتيكالىق سيپاتتارى دا كەيىن سول بالاعا ءوتىپ كەتەدى. سوندىقتان دا، بۇل جەردە تەكتىڭ ارالاسۋىنا سالدارى، سەبەپتەرى بار. سوندىقتان، وعان شاريعاتىمىز تىيىم سالادى.

ءتىپتى بۇل جاعداي داۋ-دامايعا اكەپ سوعۋى مۇمكىن دەيدى ءدىندارلار. ماسەلەن، قۇرساق انانىڭ ءسابيدى بەرۋدەن اينىپ قالۋى، نەمەسە كەرىسىنشە ءوز اتا-اناسى ودان باس تارتۋى ىقتيمال. دەگەنمەن، ءبىزدىڭ زاڭ بويىنشا نارەستە بىردەن بيولوگيالىق اتا-انانىڭ تەگىن الادى. ال جىلىنا وسى ادىسپەن ەلىمىزدەگى ءبىر كلينيكانىڭ وزىندە ورتا ەسەپپەن 10 جۇپ پەرزەنت سۇيەدى ەكەن.