الماتى قالاسىنداعى جەكەمەنشىك اۋرۋحانالاردىڭ بىرىندە 26 جاستاعى ەر ادام كوز جۇمدى، دەپ حابارلايدى «قامشى» اقپاراتتىق اگەنتتىگى كتك تەلەارناسىنا سىلتەمە جاساپ.
الەكسەي ەسىمدى الماتى تۇرعىنى دارىگەرگە گايموريت اۋرۋىنان ەمدەلۋگە بارعان. قازا تاپقان ەر ادامنىڭ ايەلى كىنالى ادامداردى جازالاۋىن تالاپ ەتىپ وتىر. ونىڭ ايتۋىنشا، كۇيەۋى ەشقانداي دا اۋىر دەرتكە شالدىقپاعان، ومىرىنە ءتونىپ تۇرعان ءقاۋىپ جوق ەدى. تاۋەلسىز ەكسپەرتتەر ەر ادامدا انافيلاكتيكالىق شوك بولۋى مۇمكىن دەپ تۇسپالداپ وتىر.
26 جاستاعى الەكسەي گۋبەنكونى جەر قوينىنا تاپسىرعانىنا ءبىر ايدان استام ۋاقىت ءوتتى. الايدا، ايەلى ءالى كۇنگە دەيىن ونىڭ نەدەن كوز جۇمعانىن بىلمەيدى. 6 ناۋرىز كۇنى ەر ادام گايموريت اۋرۋىن ەمدەتۋگە قالالىق جەكەمەنشىك اۋرۋحانالاردىڭ بىرىنە بارعان، كەيىننەن بىرنەشە ساعات وتكەننەن سوڭ ۆيكتوريا كۇيەۋىنىڭ ولگەندىگى جايلى حابار الدى.
«مەنىڭ جارىممەن بىرگە ونىڭ دوسى دا بولعان. ءبىراق ول پروسەدۋرالىق كابينەتكە كىرمەي، سىرتتا كۇتىپ تۇرعان. ونىڭ ا تۋىنشا، مەنىڭ كۇيەۋىمدى الدىمەن جۋىندىرىپ، كەيىننەن پروسەدۋرالىق كابينەتكە الىپ كىرگەن. سول جەردە جاعدايى ناشارلاپتى»، - دەپ مالىمدەدى ۆيكتوريا گۋبەنكو.
ءولىم تۋرالى كۋالىكتە ەر ادام تۇنشىعىپ قالدى دەپ كورسەتىلگەن. الايدا، ناقتى سەبەبى ءالى بەلگىسىز. «امان-ساۋلىق» اتتى قوعامدىق قورىنىڭ ايتۋىنشا، دارىلىك پرەپاراتتاردان اللەرگياسى بار ادامداردا انافيلاكتيكالىق شوك كوپ بولادى، بۇل ەر ازامات تا سونداي جاعدايعا دۋشار بولعان.
ۆيكتوريا گۋبەنكو پوليسياعا ارىز جازىپ، دەنساۋلىق ساقتاۋ مينيسترلىگى مەن مەديسينالىق جانە فارماسيەۆتيكالىق جابدىقتاردى قاداعالاۋ كوميتەتىنىڭ كومەگىنە جۇگىنگەن. ءقازىر سولاردان جاۋاپ كۇتۋدە. دەنساۋلىعىنا ەشقاشان شاعىم كەلتىرمەگەن ەرىنىڭ اياق استى بۇلاي ءولىپ قالۋىنىڭ باسقا سەبەبى بار ەكەندىگىنە ول سەنىمدى بولىپ وتىر.
«مەنىڭ كۇيەۋىم ساپ-ساۋ قالپىندا ءجاي عانا گايموريتىن ەمدەتۋگە بارىپ، كەشكە جاقىن اياق استىنان قالاي ءولىپ كەتۋى مۇمكىن؟ ماعان وسىنىڭ ناقتى سەبەبىن تۇسىندىرگەندەرىن قالايمىن. بىرنەشە ساعات ەمەس، ءتىپتى، بىرەر مينۋتتاردان كەيىن كوز جۇمعان. مەن ادىلدىككە قول جەتكىزگىم كەلەدى. مەنىڭ كۇيەۋىمنىڭ ولىمىنە كىنالى ادامدار وزدەرىنە لايىقتى جازاسىن السا ەكەن دەيمىن»، - دەپ اعىنان جارىلدى ۆيكتوريا.
جەكەمەنشىك اۋرۋحانا قىزمەتكەرلەرى بۇل جاعدايعا قاتىستى پىكىر بىلدىرۋدەن باس تارتتى. سۋدمەدەكسپەرتيزانىڭ ناتيجەسىن بىلمەيىنشە، بۇل ىسكە قاتىستى قانداي دا ءبىر اقپارات بەرە المايتىندىقتارىن ايتتى.
اۋدارعان: نازەركە لابيحان
