قىزىلوردا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ جابىق سوت وتىرىسىندا 43 جاستاعى سوتتالۋشى، پەداگوگ ق.ب.ء-تىڭ قىلمىستىق ءىسى قارالدى. ق ر قك-نىڭ 121-بابىنىڭ 4-بولىگىمەن ايىپتالعان قىزىلوردا قالاسىنىڭ تۇرعىنى پەداگوگيكالىق قىزمەتپەن جانە كامەلەتكە تولماعاندارمەن جۇمىس ىستەۋگە بايلانىستى قىزمەتتەردى اتقارۋ قۇقىعىنان ءومىر بويىنا ايىرىلا وتىرىپ، 15 جىلعا سوتتالدى. بۇل تۋرالى قازاقپارات مەملەكەتتىك ايىپتاۋشى-پروسەسس پروكۋرورى سايا تەمىربەكوۆاعا سىلتەمە جاساي وتىرىپ حابارلادى.

سوتتالعان ق.ب 11 جاستاعى قىزدىڭ دارمەنسىز كۇيىن پايدالانىپ، كۇش قولدانىپ، بىرنەشە رەت سەكسۋالدىق سيپاتتاعى زورلىق-زومبىلىق ىس-ارەكەتتەرىن جاساعان.

اتاپ ايتقاندا،  سوتتالعان 2015 جىلدىڭ جەلتوقسان ايىندا جانە 2017 جىلدىڭ 1 قاڭتارىندا تۋعان ءىنىسىنىڭ ۇيىنە قىدىرىپ كەلىپ، ءىنىسىنىڭ 11 جاسار قىزىنا كۇش قولدانىپ، تابيعي ەمەس نىساندا جىنىستىق قاتىناس جاساپ، جىنىستىق قۇمارلىعىن قاناعاتتاندىرعان. جابىرلەنۋشى  جاسىنا سايكەس، سوتتالۋشىعا قارسىلىق كورسەتە الماعان.

اۋزىنان انا ءسۇتى كەپپەگەن بالانى زورلاۋ - ناعىز ازعىندىق. مۇنداي قىلمىس جاساعانداردى مەملەكەت اياۋسىز جازالايدى - 20 جىلعا دەيىن نەمەسە ءومىر بويىنا باس بوستاندىعىنان ايىرادى. ولاردىڭ جازاسى جەڭىلدەتىلمەيدى. سوتتالعاندار مەرزىمىنەن بۇرىن بوساتىلمايدى، ولارعا راقىمشىلىق جاساۋ تۋرالى زاڭ قولدانىلمايدى، ەشقانداي پروسەستىك كەلىسىم جاسالمايدى. سوتتالعاندار جازا مەرزىمىن تولىق وتەيدى.

ايتا كەتەيىك، ستاتيستيكا بويىنشا، الەمدە 2 مينۋت سايىن 1 بالا جىنىستىق زورلىق-زومبىلىق كورەدى. ءاربىر ءۇشىنشى قىز 18-گە تولعانشا وسىنداي جىنىستىق تيىسۋگە ۇشىرايدى ەكەن.