ءماجىلىس دەپۋتاتى ازات پەرۋاشيەۆ «نۇرلى جەر» مەملەكەتتىك باعدارلاماسى بويىنشا جاتاقحانا سالۋعا ۇسىنىس تاستاعان بولاتىن. سوعان بايلانىستى، قوعام قايراتكەرى مۇحتار تايجان ءوز پىكىرىن ءبىلدىردى دەپ حابارلايدى «قامشى» اقپاراتتىق اگەنتتىگى.

مۇحتار تايجان ءوز سوزىندە: "بۇل "شەشىمدى" ۇسىنعان ادام الدىمەن ءوزى ۇلگى كورسەتسىن. اس ءۇيى مەن جۋىناتىن بولمەسى جوق جاتاقحاناعا ءوزى ءبىرىنشى كوشىپ بارسىن. وسى ۇسىنىستىڭ شىنايىلىعىنا سول كەزدە كوزىمىز جەتەدى"، - دەدى.

دەپۋتاتتىڭ اتالعان ۇسىنىسىنا ەكس-ارىپتەسى مۇحتار تىنىكەيەۆ تە ءوزىنىڭ فەيسبۋك پاراقشاسىندا پىكىر ءبىلدىردى: «قاراعاندى قالاسىندا ءالى كۇنگە دەيىن ستالين-حرۋششيەۆ ۋاقىتىنان قالعان ۋاقىتشا تۇرعىن ۇيلەردە حالىق كۇنەلتىپ ءجۇر. ۋاقىتشادان اسقان تۇراقتىلىق جوق! ەشقانداي جاعدايدا بۇلاي جاساۋعا بولمايدى!»

ەكس-دەپۋتات قازاقستاندىقتارعا تۇرعىن ءۇي بويىنشا كومەكتەسۋدىڭ ءتيىمدى جولىن ۇسىندى:
«ەگەر حالىققا تۇرعىن ءۇي ماسەلەسى بويىنشا كومەكتەسكىمىز كەلسە، ولارعا بايلانىس جۇيەلەرى قوسىلعان 10 سوتتىق جەردەن ءبولىپ بەرەيىك. ءبىر كوممەرسيالىق ۇيگە ەكى-ۇش الەۋمەتتىك ۇيلەر سالىنبايىنشا اكىمشىلىككە ەليتالىق تۇرعىن ءۇي كەشەندەرىن سالۋعا جەر بەرۋگە تىيىم سالۋىمىز كەرەك».

 ەستەرىڭىزگە سالا كەتەيىك، "جۋىنۋ بولمەسى مەن اس ءۇيسىز سالىنعان تۇرعىن ءۇي 40 پايىزعا ارزانعا تۇسەدى. وسىلايشا، 2021 جىلعا دەيىن «نۇرلى جەر» باعدارلاماسى بويىنشا جالعا بەرىلەتىن 35 مىڭ پاتەر ەمەس، 49 مىڭ پاتەر سالۋعا بولادى. بۇل پاتەرلەرگە حالىقتىڭ مۇقتاج بولىگىن، ونىڭ ىشىندە، اۋىل جاستارىن قونىستاندىرۋعا بولادى"، -  دەگەن بولاتىن ا.پەرۋاشيەۆ.