جەردى پايدالانۋ جونىندەگى مىندەتتەمەلەر مەن جاۋاپكەرشىلىك كۇشەيتىلەدى، دەپ حابارلايدى «قامشى» اقپاراتتىق اگەنتتىگى.
بۇل تۋرالى پارلامەنت ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرۋ بارىسىندا اۋىل شارۋاشىلىعى ۆيسە-مينيسترى ەرلان نىسانبايەۆ ءمالىم ەتتى.
قازاقپاراتتىڭ مالىمەتىنشە، ەرلان نىسانبايەۆ بىلاي دەگەن:
«اۋىل شارۋاشىلىعى جەرلەرى ءتيىمدى پايدالانىلۋى جونىندەگى مىندەتتەمەلەردى ورىنداۋ بويىنشا ءبىرىڭعاي تالاپتاردى بەلگىلەۋ ماقساتىندا جەر ۋچاسكەسىن جالعا بەرۋ شارتىنىڭ ۇلگىلىك نىسانى بەكىتىلەدى. جالعا بەرۋدىڭ ۇلگىلىك شارتىندا جالعا الۋشىنىڭ جەردى پايدالانۋ جونىندەگى مىندەتتەمەلەرى مەن جاۋاپكەرشىلىگىن كۇشەيتۋ كوزدەلگەن. بۇل رەتتە شارتتا جالعا الۋشىنىڭ كونكۋرستىق ۇسىنىستا كورسەتكەن مىندەتتەمەلەرى مەن العا قويىلعان نيەتى قامتىلاتىن بولادى. جەردى پايدالانۋ مەن قورعاۋعا مەملەكەتتىك باقىلاۋدى كۇشەيتۋ ماقساتىندا زاڭ جوباسىمەن اۋداندىق اتقارۋ ورگانداردىڭ قۇزىرەتىنە اۋىل شارۋاشىلىعى جەرلەرىنىڭ ءتيىمدى پايدالانىلۋى مەن قورعالۋىنا مەملەكەتتىك باقىلاۋ ۇلگىلەرى قاراستىرىلادى».
ونىڭ سوزىنە قاراعاندا، اۋىل شارۋاشىلىعى جەرلەرىنىڭ ۇلكەن كولەمدە ءبىر قولعا بەرىلۋىن بولدىرماۋ ماقساتىندا زاڭ جوباسىندا ءار وبلىستىڭ اۋدانىنىڭ شەگىندە قازاقستاندىقتارعا بەرىلۋى مۇمكىن ەڭ جوعارى مولشەرىن بەلگىلەۋ كوزدەلگەن. بۇل رەتتە اۋىل شارۋاشىلىعى جەرلەرىن ەلىمىز بويىنشا شەكتى مولشەردەن اساتىن كولەمدە ءبىر قولعا وتۋىنە جول بەرىلمەيدى.
«اۋىل شارۋاشىلىعى مينيسترلىگى قازىرگى ۋاقىتتا ءتيىستى ەسەپتەۋ ادىستەمەسىن ازىرلەۋدە، وندا ەلىمىزدىڭ ءاربىر ءوڭىرىنىڭ جاعدايى مەن ەرەكشەلىگى ەسكەرىلۋدە. بۇدان باسقا، زاڭ جوباسىندا شەكارالىق بەلدەۋ جانە شەكارا اۋماعىندا ورنالاسقان جەر تەلىمدەرىن شەتەلدىكتەرگە، ازاماتتىعى جوق ادامدارعا، قازاقستان رەسپۋبليكاسىنىڭ شەتەلدىكتەرمەن نەكەدە تۇرعان ازاماتتارىنا نەمەسە شەتەلدىك زاڭدى تۇلعالارعا، سونداي-اق قازاقستان رەسپۋبليكاسىنىڭ شەتەلدىكتەر قاتىساتىن زاڭدى تۇلعالارىنا بەرۋگە تىيىم سالىنادى. مەملەكەتتىك شەكارالىق بەلدەۋىندە ورنالاسقان اۋىل شارۋاشىلىعى جەرلەرىن جەكەمەنشىككە دە، جەر پايدالانۋعا دا بەرىلمەيدى. اتالعان اۋماقتاردا اۋىل شارۋاشىلىعى جەرلەرىن جەرگىلىك حالىقتىڭ مۇقتاجدىقتارىنا جايىلىم، شابىندىق رەتىندە پايدالانۋعا رۇقسات ەتىلەدى. مەملەكەتتىك شەكارا اۋماعىندا ورنالاسقان اۋىل شراۋالىعى جەرلەرى تەك قازاقستاننىڭ ازاماتتارىنا جانە زاڭدى تۇلعالارىنا ۋاقىتشا جەر پايدالانۋ قۇقىعىنا بەرىلەدى»،-دەدى نىسانبايەۆ.
