قىزدار ۋنيۆەرسيتەتىنىڭ ستۋدەنتتىك «جان سارايى» تەاترى ونەرسۇيەر قاۋىم نازارىنا «قارا شەكپەن» اتتى قويىلىمدى ۇسىندى دەپ حابارلايدى "قامشى"اقپاراتتىق اگەنتتىگى.
سپەكتاكل وسەتيالىق دراماتۋرگ گەورگيي حۋگايەۆتىڭ «قارا شەكپەن» پەساسى نەگىزىندە ساحنالاندى. قويىلىمدى جاس رەجيسسەرلار داۋلەت اريپوۆ پەن مەرحات جونۋسوۆ قويدى. قويىلىمنىڭ ۇزاقتىعى – 1 ساعات. ايتا كەتەيىك، ستۋدەنتتىك «جان سارايى» تەاترىنىڭ اكتەرلەرى وقۋ ورىننىڭ «ونەر جانە مادەنيەت» فاكۋلتەتى «مادەني-تىنىعۋ جۇمىسى» ماماندىعىنىڭ 1-2 كۋرس ستۋدەنتتەرىنەن قۇرالعان.
گ.حۋگايەۆتىڭ اتالمىش پەساسى كوپتەگەن ەلدەردىڭ ساحناسىندا قويىلعان. ەرتەگى رەتىندە دە، ءافسانا رەتىندە دە ۇسىنىلعان. شىعارمانىڭ كەيىپكەرلەرى جابايى اڭ-قۇس پەن ءۇي جانۋارلارى. تۋىندىنىڭ باستى ماقساتى – جان-جانۋارلاردىڭ بەينەلەرى ارقىلى ادام بويىنداعى ءارتۇرلى كەمشىلىكتەردى كورسەتۋ، وي سالۋ، ادامنىڭ شىنايى بەت پەردەسىن اشىپ كورسەتۋ. «قارا شەكپەن» – ماحاببات پەن دوستىق، ادالدىق پەن ساتقىندىق توعىسقان فيلوسوفيالىق ءافسانا. سپەكتاكل ءومىردىڭ اق پەن قاراسىن، ادالدىق پەن ارامدىقتى، جاقسىلىق پەن جاماندىقتىڭ بىتىسپەس كۇرەسىن قويىلىمنىڭ باستى كەيىپكەرلەر: تۇزار-يت، كوكجال-قاسقىر، قانشىق، دانىشپان-قارعا، قوسۇرەي-قويان، سىلاڭ-تۇلكى، ءاتشابار-شيبورى، ءۇي جانۋارلارى ەسەك، تەكە، قويلار مەن قوزى ارقىلى كورەرمەنگە جەتكىزە بىلگەن. ادام كەيپىن حايۋان ارقىلى ساتيرالىق تۇردە جاسىرۋ - ەزوپتىق ءادىستى قولدانىپ، بۇگىنگى تۇلكiدەي قۇبىلعان زاماننىڭ اششى شىندىعىن ءتۇرلى وبرازدار ارقىلى جەتكىزگەن. مىسالى، قارعا ارقالى بايسالدىلىقتى، قاسقىر ارقىلى زۇلىمدىق پەن ايلانى، توبەت ارقىلى سەنىمدىلىك پەن ادالدىقتى، ەسەك-قىرسىقتىقتى، تۇلكى ارقىلى قۋلىق پەن ەكىجۇزدىلىكتى، تەكە ارقىلى بيلىكقۇمارلىلىق سىندى ادام بويىنداعى قاسيەتتەردى كورسەتە بىلگەن.
«رولدەردى ويناۋشىلار ستۋدەنتتەر بولسا دا، اكتەرلار ويىنى جوعارى دەڭگەيدە ۇسىنىلىپ، وزىندىك ەرەكشەلىگىمەن كورەرمەندەردى باۋراي الدى. ەڭ باستىسى كورەرمەنگە جەتكەندىگى. بىزگە دە، زالدا وتىرعان بارشا كورەرمەنگە اسەر ەتتى. رەجيسسەردىڭ ايتاتىن ويى اشىلدى. مەنىڭ وزىمە قويان، قارعا، ءشيبورىنى سومداعان اكتەرلەردىڭ ءرولى كوڭىلىمنەن شىقتى. نەگىزىنەن، بۇل قويىلىمنىڭ ايتار ويى تەرەڭ. قازىرگى زاماندا وزەكتى تاقىرىپتاردىڭ ءبىرى. «جان سارايى» تەاترىنا تەك ساتتىلىك تىلەيمىن. رەپەرتۋارلارى تاربيەلىك ءمانى زور قويىلىمدارعا تولى بولسىن!»، دەدى قويىلىمنان كەيىنگى اسەرىمەن بولىسكەن ت.جۇرگەنوۆ اتىنداعى ونەر كوللەدجىنىڭ، «اكتەر شەبەرلىگى» ماماندىعىنىڭ وقىتۋشىسى، اكتەر ايدوس اۋەسبايەۆ.
ادامي قاسيەتتەر مەن قۇندىلىقتاردى العا تارتقان قويىلىمنىڭ جاستارعا ايتارى كوپ، وي سالاتىن، يدەياسى تەرەڭ، تاربيەلىك ءمانى زور زاماناۋي سپەكتال. وسىنداي قۇندى دۇنيەنى ۇسىنىپ وتىرعان جاس دارىنداردان قۇرالعان تەاتر ۇجىمىنىڭ قاشاندا ءوز كورەرمەنى بولاتىنى ءسوزسىز.
