ءماجىلىستىڭ اگرارلىق ماسەلەلەر كوميتەتىنىڭ ۇيىمداستىرۋىمەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى جوباسىنىڭ تۇساۋكەسەرى بولدى. بۇل تۋرالى Qamhsy.kz ءماجىلىس ۇيىنە سىلتەمە جاساپ حابارلايدى. ونىڭ جۇمىسىنا پالاتا ءتوراعاسىنىڭ ورىنباسارى ۆلاديمير بوجكو مەن اتالعان كوميتەت ءتوراعاسى ساپارحان وماروۆ سونداي-اق پارلامەنتشىلەر، مەملەكەتتىك ورگاندار مەن ازاماتتىق قوعام وكىلدەرى مەن اۋىل شارۋاشىلىق ءونىمىن وندىرۋشىلەر، ساراپشىلار قاتىستى.

اۋىل شارۋاشىلىعى ۆيسە-مينيسترى ەرلان نىسانبايەۆ دەپۋتاتتىق كورپۋستى زاڭ جوباسىنىڭ نەگىزگى ەرەجەلەرىمەن تانىستىردى.

ءمينيستردىڭ ورىنباسارى «جەر سالاسىندا تۋىنداعان سۇراقتار بويىنشا ارنايى كوميسسيا جۇمىس جاسادى. قوعامدىق پىكىر تۋعىزعان ماسەلەلەر جونىنەن موراتوريي مەرزىمى 5 جىلعا ۇزارتىلىپ جەر كودەكسىنىڭ 24، 37، 97 جانە 101- باپتارىنا اۋىل شارۋاشىلىعى جەرلەرىن قازاقستاندىقتارعا جەكە مەنشىككە، شەتەلدىكتەرگە جالعا بەرۋدى توقتاتا تۇراتىن وزگەرىستەر ەنگىزىلدى.

كوميسسيا مۇشەلەرىمەن حالىقتىڭ پىكىرى ەسكەرىلە وتىرىپ جەردى قازاقستاندىقتارعا جالعا بەرۋ ينستيتۋتىن ودان ءارى جەتىلدىرۋ قاجەتتىلىگى تۋرالى شەشىم قابىلدانعان بولاتىن»،- دەپ ماجىلىسكە ۇسىنىلىپ وتىرعان زاڭ جوباسى وسى ماسەلەلەردى قامتيتىنىن مالىمدەدى.

«سونىمەن كوميسسيا كەلەسى شەشىمدەردى قابىلدادى:

1. اۋىل شارۋاشىلىعى جەرلەرىن قازاقستاندىقتارعا جالعا بەرۋ ينستيتۋتىن ساقتاۋ جانە ونى جەتىلدىرۋ؛

2. جالعا بەرىلەتىن اۋىل شارۋاشىلىعى جەرلەرىنىڭ شەكتى مولشەرىن بەلگىلەۋ؛

3. شەكارا ماڭىنان اۋىل شارۋاشىلىعى جەرلەرىن بەرۋدە قويىلاتىن تالاپتاردى كۇشەيتۋ؛

4. حالىققا قاجەتتى جايىلىم جەرلەردى انىقتاۋ.

جەر رەفورماسى جونىندەگى كوميسسيانىڭ ۇسىنىسى نەگىزىندە اۋىل شارۋاشىلىعى مينيسترلىگىمەن ونىڭ جانىنان قۇرىلعان جۇمىس توبىنىڭ ۇسىنىستارى مەن ەسكەرتۋلەرى ەسكەرىلە وتىرىپ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنىڭ تۇجىرىمداماسى مەن جوباسى ازىرلەندى.

زاڭ جوباسىمەن اۋىل شارۋاشىلىعى جەرلەرىن قازاقستاندىقتارعا جالعا بەرۋ ينستيتۋتىن ساقتاي وتىرىپ، ولاردى كونكۋرستىق نەگىزدە بەرۋدىڭ جەكە ءتارتىبىن بەلگىلەۋ كوزدەلگەن.

كونكۋرستىڭ ايقىندىلىعى ءۇشىن كونكۋرستىق كوميسسيانىڭ قۇرامىنا كوميسسيا مۇشەلەرىنىڭ كەمىندە 50%-ىن قوعامدىق كەڭەستەر مەن ۇيىمداردىڭ وكىلدەرىن قوسۋ كوزدەلگەن.

كونكۋرستىڭ جاريالىلىعى مەن وعان بارلىق قاتىسۋشىلارىنىڭ قولجەتىمدىلىگىن قامتاماسىز ەتۋ ماقساتىندا جاڭا ءتارتىپ كونكۋرس وتكىزىلەتىندىگى تۋرالى حابارلاندىرۋ ب ا ق مەن اشم، اكىمدىكتەردىڭ رەسمي ينتەرنەت-رەسۋرستارىندا ورنالاستىرۋدى، سونىمەن قاتار، ءبىر ۋاقىتتا بارلىق اۋدان اكىمدىكتەرىنە رەسمي سايتتارى مەن اقپاراتتىق قابىرعالارىندا ورنالاستىرۋدى كوزدەيتىن بولادى. اتالعان نورماعا سايكەس، اۋىل شارۋاشىلىعى جەرلەرى كونكۋرستىق كوميسسيامەن، ارنايى تىزىلىمگە سايكەس جۇرگىزىلەدى.

اتالعان ءتىزىلىم اۋداننىڭ جەر قاتىناستارى بولىمدەرىمەن قۇرىلىپ، مىندەتتى تۇردە قوعامدىق كەڭەستەر، ۇلتتىق كاسىپكەرلەر پالاتاسى جانە قوعامدىق ۇيىمدارمەن كەلىسىلىپ، اۋدان اكىمدىگىمەن بەكىتىلەدى.

كونكۋرستىڭ وتكىزىلۋىنىڭ اشىقتىعىن قامتاماسىز ماقساتىندا كونكۋرستىق قوعامدىق كەڭەس پەن ۇيىمداردىڭ وكىلدەرىنەن قۇرۋ قاراستىرىلعان.

بۇل رەتتە، كونكۋرستىق كوميسسيانىڭ قۇرامى جەرگىلىكتى وكىلدى ورگاندارمەن بەكىتىلەتىن بولادى»،- دەپ ناقتىلاپ ءتۇسىندىرىپ ءوتتى.

مەملەكەتتىك شەكارانىڭ شەكارا بەلدەۋى شەگىندە ورنالاسقان اۋىل شارۋاشىلىعى جەرلەرى جەكە مەنشىككە دە، جەر پايدالانۋعا دا بەرىلمەيدى.

اتالعان اۋماقتاردا اۋىل شارۋاشىلىعى جەر ۋچاسكەلەرىن جەرگىلىكتى حالىقتىڭ قاجەتتىلىگى ءۇشىن پايدالانۋعا عانا (جايىلىم، شابىندىق رەتىندە جانە ت.ب.) رۇقسات بەرىلەدى.

جەكە اۋلا مالىن جايۋ ءۇشىن قاجەتتى جايىلىم جەرلەردىڭ جەتىسپەۋشىلىك ماسەلەسىن شەشۋ ءۇشىن زاڭ جوباسىمەن ەلدى مەكەندەر اينالاسىندا جەكە اۋلا مالىن ۇستاۋ بويىنشا حالىقتىڭ مۇقتاجىنا قاجەتتى جايىلىمدار اۋداندارىن انىقتاۋ بويىنشا نورما قاراستىرىلعان.

اتالعان اۋماقتاردا قازاقستان رەسپۋبليكاسىنىڭ جەكە جانە زاڭدى تۇلعالارىنا جەر پايدالانۋعا بەرۋگە تىيىم سالىناتىن بولادى.

بۇدان باسقا، قازىرگى ۋاقىتتا جايىلىمداردىڭ كوپ بولىگى جەكە مەنشىكتە جانە جەر پايدالانۋدا ەكەنىن ەسكەرە وتىرىپ، اكىمدەرگە ولاردى حالىقتىڭ جايىلىم جەرلەرگە دەگەن قاجەتتىلىگىن مەملەكەت مۇقتاجىنا ەنگىزۋ جولىمەن الىپ قويۋ مۇمكىندىگى بەرىلەتىن بولادى»،- دەدى ۆيسە-مينيستر.

ۇسىنىلىپ وتىرعان زاڭ جوباسى:

- اۋىل شارۋاشىلىعى جەرلەرىن جالعا بەرۋ ينستيتۋتىن جەتىلدىرۋ؛

- جەرلەردى پايدالانۋ مەن قورعاۋدى مەملەكەتتىك باقىلاۋدى كۇشەيتۋ؛

- مەملەكەت مۇقتاجى ءۇشىن جەر ۋچاسكەلەرىن ماجبۇرلەپ الىپ قويۋ ماسەلەلەرىن رەتتەيدى.

ءوز كەزەگىندە، دەپۋتاتتار مەن شاقىرىلعاندار جەر زاڭناماسىن قولدانۋ پراكتيكاسىنداعى، سونداي-اق ۇكىمەت ۇسىنعان زاڭ جوباسىنا قاتىستى نەگىزگى وزەكتى ماسەلەلەردى كوتەردى.

ناتيجەسىندە، زاڭ جوباسىمەن ودان ءارى جۇمىس بارىسىندا قوسىمشا قاراۋعا جانە زەرتتەۋگە تۇساۋكەسەردى وتكىزۋ بارىسىندا جۇمىس توبىنىڭ مۇشەلەرى مەن وتىرىسقا قاتىسۋشىلار ايتقان كوپتەگەن ۇسىنىستار، ەسكەرتۋلەر جانە تىلەكتەر جىبەرىلدى.

ەندى تانىستىرىلعان زاڭ جوباسى ءماجىلىس دەپۋتاتى بەرىك وسپانوۆتىڭ جەتەكشىلىگىندەگى جۇمىس توبىندا تالقىلاناتىن بولادى.