پرەزيدەنت بۇگىن تاڭەرتەڭ بىشكەككە ۇشىپ باردى دەپ حابارلايدى Qamshy.kz

بۇگىن بىشكەك قالاسىندا ەكى بىردەي ساياسي سالماعى باسىم جيىن وتەدى. ءبىرى جوعارى ەۋرازيالىق ەكونوميكالىق كەڭەستىڭ وتىرىسى، ەكىنشىسى ۇجىمدىق قاۋىپسىزدىك تۋرالى شارت ۇيىمى ەلدەرى باسشىلارىنىڭ باسقوسۋى. 

بۇل ەكى كەزدەسۋدىڭ جىلدا جايداق وتپەيتىنى امبەگە ايان. سول سەبەپتى قىرعىز رەسپۋبليكاسىنىڭ استاناسىندا ءورشىل جوسپارلار جاريالاناتىنى ءسوزسىز. كۇن تارتىبىندە كوپ ماسەلە كوتەرىلەدى.

كەشەلى بەرى قىرعىز ەلىندە قاربالاس. «ماناس» اۋەجايىندا قاۋىپسىزدىك شارالارى كۇشەيتىلىپ، ورتالىق كوشەلەردە كورىكتى كولىكتەردىڭ ءجۇرىسى كوبەيدى. 

الماسبەك اتامبايەۆ ارىپتەستەرىنە وسىلاي قۇرمەت كورسەتۋگە بەل بۋىپتى. قولدا بار مالىمەت بويىنشا ءبىرىنشى بولىپ بىشكەككە مولدوۆا پرەزيدەنتى جەتكەن. ءىزىن الا ارمەنيا، بەلارۋس، رەسەي، قازاقستان، تاجىكستان ەلدەرىنىڭ كوشباسشىلارى كەلدى. 

بۇگىن پرەزيدەنتتەر جوعارى ەۋرازيالىق ەكونوميكالىق كەڭەستىڭ وتكەنىن ەكشەپ، بولاشاعىنا باعدار جاسايدى. 

ساراپشىلاردىڭ ايتۋىنشا بۇل كەڭەس، ادەپكى اقىلداسۋدان بولەك بولادى. ويتكەنى ءقازىر نارىقتىڭ سىناعى مەن تەرروريزم – ەلدى بولماسىن الاڭداتىپ وتىر. سول سەبەپتى بۇل جولعى ايتىلار ءسوز بەن باستامالار ءورشىل بولاتىنى انىق. 

ماسەلەن، وداققا قىزىعۋشىلىق تانىتقان مولدوۆانىڭ ۇسىنىسى جان-جاقتى قارالىپ، رەسمي كيشينيەۆتى بايقاۋشى رەتىندە كىرىكتىرۋ جايى جوسپاردان تابىلۋى مۇمكىن. 

ونىمەن بىرگە ەۋرازيالىق ەكونوميكالىق وداق ەلدەرى مەن يران يسلام رەسپۋبليكاسى اراسىنداعى ەركىن ساۋدا اينالىمىن جەتىلدىرۋ تۋرالى دا كەلىسىم ءسوز بولماق. 

ال ۇجىمدىق قاۋىپسىزدىك تۋرالى شارت ۇيىمىنىڭ وتىرىسىندا تاراپتار جاڭا جاھاندىق سىن قاتەرلەرگە سىنىپ كەتپەۋدىڭ امالدارىن ىزدەپ، كۇن تارتىبىندە تۇرعان قاۋىپسىزدىك قالقانىن كۇشەيتۋ جايىن دا تالقىلاپ قالماق.