بۇگىن، 14 ساۋىردە رەسەي سىرتقى ىستەر مينيسترلىگى ماسكەۋ مەملەكەتتىك حالىقاراالىق قاتىناستار ينستيتۋتىندا «كاسپيي ديالوگى-2017» ەكونوميكالىق فورۋمى ءوتتى.
فورۋمنىڭ اشىلۋىندا قازاقستان رەسپۋبليكاسىنىڭ رەسەي فەدەراسياسىنداعى توتەنشە جانە وكىلەتتى ەلشىسى يمانعالي تاسماعامبەتوۆ ءسوز سويلەپ، فورۋمدى وتكىزۋدىڭ ون جىلدىق تاريحى بۇل تەك الەمدىك نەمەسە ايماقتىق گەوساياسي جانە اسكەري-ساياسي مۇددەلەردىڭ ۇشتاسۋى عانا ەمەس، سونىمەن قاتار شىعىس پەن باتىستى جالعايتىن ۇلى جىبەك جولى قۇرلىقارالىق باعىتتار تۇيىسەتىن ماڭىزدى حاب ەكەندىگىن اتاپ ءوتتى. مۇندا عالامنىڭ اۋقىمدى تابيعي جانە بيولوگيالىق بايلىعى جيناقتالعان.
"ءبىزدىڭ ورتاق ماقساتىمىز – كاسپيي تەڭىزىنىڭ باي رەسۋرستىق الەۋەتىن ءتيىمدى يگەرۋ، ونىڭ ەرەكشە ەكوجۇيەسىن دامىتۋ جانە بولاشاق ۇرپاق ءۇشىن ساقتاۋدى قامتاماسىز ەتۋ"، – دەپ اتاپ ءوتتى ەلشى.
"كاسپيي تەڭىزىنىڭ قۇقىقتىق مارتەبەسى جونىندەگى كونۆەنسيانىڭ نەگىزىندە تۇتاس قۇقىقتىق-كەلىسىمدەر بازاسىن قۇرۋ ماڭىزدى ماسەلە رەتىندە ساقتالىپ وتىر"، – دەدى يمانعالي تاسماعامبەتوۆ.

ءوز كەزەگىندە، رف پرەزيدەنتىنىڭ رەسەي مەن تمد ەلدەرى اراسىنداعى شەكارانى دەليميتاسيالاۋ مەن دەماركاسيالاۋ سۇراقتارى بويىنشا تەڭ ءتوراعاسى، رف ءسىم ارنايى تاپسىرمالارى بويىنشا ەلشىسى يگور براچيكوۆ، كاسپيي تەڭىزىنىڭ قۇقىقتىق دارەجەسىن ايعاقتايتىن كونۆەنسيا بىتۋگە جاقىن ەكەنىن ءمالىم ەتتى.
سونداي-اق ول، 2014 جىلى استراحاندا وتكەن 4ء-شى كاسپيي سامميتىندە كاسپيي ەلدەرىنىڭ باسشىلارى ايتارلىقتاي ءبىر مامىلەگە كەلگەندىگىن جانە سونىڭ ارقاسىندا كاسپيي تەڭىزى كونۆەنسياسىنىڭ سۇلباسى قالانعانىن ەرەكشە اتاپ ءوتتى. ەلشىنىڭ ايتۋىنشا، ول كەزدە قويىلعان تالاپ تا ناقتى بولاتىن. وتكەنى وندا كەلەر سامميتكە دەيىن وسى قۇجات تولىعىمەن اياقتالۋى شارت دەلىنگەن ەدى.
فورۋمعا تمد جانە كاسپيي ماڭى ەلدەرىنىڭ مەملەكەتتىك ورگان وكىلدەرى، رف فەدەرالدىق جينالىسىنىڭ دەپۋتاتتارى، شەتەلدىك ەلشىلەر، عالىمدار مەن ساراپشىلار قاتىستى.
فورۋم قاتىسۋشىلارى كومىرسۋلار مەن مينەرالدى شيكىزاتتاردى ءوندىرۋ جانە ونى شەتەل نارىعىنا تاسىمالداۋدى ۇيىمداستىرۋ سالاسىندا ىنتىماقتاسۋ فورمالارىن دامىتۋ، ەكولوگيا، ەلەكتروەنەرگيا، كولىك ينفراقۇرىلىمىنىڭ قۇرىلىسى، حيميالىق ونەركاسىپ، ماشينا قۇراستىرۋ، مەتاللۋرگيا، قارجى سەكتورى، ساقتاندىرۋ جانە اۋىل شارۋاشىلىعى سالاسىندا بىرلەسكەن جوبالاردى جۇزەگە اسىرۋ ماسەلەلەرىنتالقىلادى.