كەزەكتى جەكپە-جەگىڭىزگە دايىندىق قالاي ءجۇرىپ جاتىر؟

جەكپە-جەككە از عانا ۋاقىت قالدى. تايلاندتا دايىندالىپ جۇرگەنىمە ءۇش اي بولدى. بارلىعى ءوزىمنىڭ جوسپارلاعانىمداي ءوتىپ جاتىر. كوپتەگەن ەۋروپادان يۋفس جانە باسقا دا مىقتى تۇجىرىمداردىڭ چەمپيوندارىمەن سپاررينگ جاساپ، كۇرەسىپ، بىرگە دايىندالىپ جاتىرمىن. جاتتىعۋ وتە كەرەمەت وتۋدە.

قارسىلاسىڭىزدى زەرتتەپ ۇلگەردىڭىز بە؟

موگومەدسايگيد الىبەكوۆتى بارىنشا زەرتتەدىم. قارسىلاسىم وسال ەمەس. ول  سەگىز جەكپە-جەك وتكىزىپ، بارلىق قارسىلاسىن ۋاقىتىنان بۇرىن جەڭگەن. FIGHT NIGHTS تۇجىرىمى بويىنشا چەمپيون.

ءسىزدىڭ گولوۆكين تۋرالى جازعان ينستاگرام جەلىسىندەگى جازباڭىز ۇلكەن شۋ تۋعىزدى. بۇل جارىس الدىندا وزىڭىزگە جاسالعان جارناما ما؟

بۇقارالىق اقپارات قۇرالدارىندا جانە حالىق اراسىندا مەنىڭ ءسوزىمدى جارناما رەتىندە قابىلداعاندارى كوپ بولدى. شىن مانىسىندە ول پيار ەمەس. سپورتشى رەتىندە ءبىز رينگكە شىعىپ كورگەنبىز. سوندىقتان،  كىمنىڭ قالاي ونەر كورسەتكەنى ايقىن كورىنىپ تۇرادى. انىقتاپ قاراساڭىز، جەكپە-جەكتىڭ تەڭ اياقتالعانىن بايقاۋعا بولادى. مەنىڭ ايتقانىم تەك شىندىق جانە ول مەنىڭ جەكە پىكىرىم. وتانداسى بولعاننان كەيىن گولوۆكيندى بارلىعى قولدايدى.

تورەشىلەر تەك اقشانى ويلاپ، كوپ اقشا تابۋدىڭ جولىن ىزدەمەي، شىن باعا بەرگەندە، جارىس  تەڭ اياقتالار ەدى.

ءسىز كوبىنە شەتەلدە دايىندالاسىز. بۇل ءوز ەلىمىزدە جاتتىعۋعا مۇمكىنشىلىكىڭ جوقتىعىنان با؟

كوبىنە شەتەلدە دايىندالاتىنىم راس. مما ءتۇرى، سپورت  كلۋبتارى  شەتەلدە جاقسى دامىعان. مەن ەلىمنىڭ نامىسىن قورعاپ، شەتەلدە قازاق ەلىنىڭ تۋىن كوتەرىپ جۇرگەندىكتەن جوعارى دارەجەلى سپورتشىلارمەن قاتار دايىندالۋىم كەرەك. قازاقستاندا ونداي سپورتشىلار از. سول سەبەپتى، شەبەرلىگىمدى ارتتىرۋ ءۇشىن شەت مەملەكەتتە جاتتىعامىن.

الداعى جوسپارىڭىزبەن بولىسسەڭىز؟

وسى جولى اللا قالاسا FIGHT NIGHTS تۇجىرىمى بويىنشا الەم چەمپيونى بولۋدى ماقسات تۇتتىم. ول مۇراتىما جەتكەننەن كەيىن كەلەسى جەكپە-جەگىمدى الماتى قالاسىندا، الماتى ارەنا زالىندا وتكىزسەم دەگەن جوسپارىم بار. بۇيىرتسا، ول جەكپە-جەكتى  «كازسپورت»، «بوەس تۆ»، «ماچ تۆ» تەلەارنالارىنان تىكەلەي ەفيردە كورسەتەدى. اللا قالاسا، جەڭىسكە جەتىپ جاتسام قولىما ميكروفوندى الىپ الداعى جوسپارىممەن بارشا حالىقپەن بولىسەمىن. تەك جاقسى جاڭالىق كۇتىڭىزدەر!