اقىن تالعات ەشەن ۇلى قازاقستان رەسپۋبليكاسى پرەزيدەنتى اكىمشىلىگىنىڭ ىشكى ساياسات ءبولىمى مەڭگەرۋشىسىنىڭ ورىنباسارى بولىپ تاعايىندالدى دەپ حابارلايدى Qamshy.kz. بۇل تۋرالى ساياساتتانۋشى ەرلان سايروۆ الەۋمەتتىك جەلىدە جازدى. 

تالعات ەشەن ۇلى 1974 جىلى 15 قازاندا شىعىس قازاقستان وبلىسى (بۇرىنعى سەمەي وبلىسى) اياكوز اۋدانى تارباعاتاي اۋىلىندا دۇنيەگە كەلگەن. 1991 جىلى تارباعاتاي اۋىلىنداعى وكتيابر ورتا مەكتەبىن ءتامامداعان سوڭ، 1991-1996 جىلدارى ءال-فارابي اتىنداعى قازاق ۇلتتىق ۋنيۆەرسيتەتى، جۋرناليستيكا فاكۋلتەتىندە وقىدى. 

1996-1997 جىلدارى حالىقارالىق «زامان-قازاقستان» گازەتىندە، 1997-1998 جىلدارى «جاس الاش» رەسپۋبليكالىق گازەتىندە ءتىلشى، قوعام جانە ساياسات ءبولىمنىڭ مەڭگەرۋشىسى بولىپ قىزمەت ىستەدى. 1998-2004 جىلدار ارالىعىندا قازاقستان رەسپۋبليكاسىنىڭ اقپارات مينيسترلىگىندە، قازاقستان رەسپۋبليكاسىنىڭ مادەنيەت، اقپارات جانە قوعامدىق كەلىسىم مينيسترلىگىندە ءتۇرلى جاۋاپتى قىزمەتتەر اتقاردى. 2004-2005 جىلدار ارالىعىندا «جاس الاش» گازەتىنىڭ استاناداعى تىلشىلەر قوسىنىنىڭ جەتەكشىسى بولدى. 2005-2008 جىلدارى «جاس قازاق» رەسپۋبليكالىق قوعامدىق-ساياسي گازەتىنىڭ باس رەداكتورى قىزمەتىن اتقاردى. 2008-2009 جىلدارى ق ر پرەزيدەنتى اكىمشىلىگىنىڭ سەكتور مەڭگەرۋشىسى. 2009-2010 جىلدارى «نۇر وتان» پارتياسى ءتوراعاسىنىڭ ءبىرىنشى ورىنباسارىنىڭ كەڭەسشىسى بولدى. بۇعان دەيىن «سامۇرىق-قازىنا» ۇلتتىق ءال-اۋقات قورى» اكسيونەرلىك قوعامىندا باس مەنەدجەر بولىپ قىزمەت ەتكەن.

«شابىت» حالىقارالىق شىعارماشىلىق جاستار فەستيۆالىنىڭ «ادەبيەت»، «جۋرناليستيكا» نوميناسيالارى بويىنشا (1999 جىل، 2000 جىل) جەڭىمپازى. ج.ناجىمەدەنوۆ، ت.ايبەرگەنوۆ اتىنداعى سىيلىقتاردىڭ لاۋرەاتى. ق ر پرەزيدەنتى ستيپەندياسىنىڭ (1999 جىل)، «دارىن» مەملەكەتتىك جاستار سىيلىعىنىڭ يەگەرى (2006 جىل). «قازاقستان رەسپۋبليكاسىنىڭ تاۋەلسىزدىگىنە 10 جىل» مەدالىمەن، «اباي» حالىقارالىق مەدالىمەن ماراپاتتالعان.