مۇنداي جاعداي ءالى كۇنگە دەيىن بولماعان. پوليسيا بولىمشەسىنە دالەل رەتىندە راديونوۆسك كوشەسىندە ورنالاسقان دۇكەننەن 50 كەلىلىك قانت جەتكىزىلدى. قانت تولى قاپتىڭ ىشىنەن «قۇتقارىڭىزدار، ءبىز قۇلدىقتامىز» دەپ جازىلعان قاعاز شىقتى، دەپ حابارلايدى kp.ru باسىلىمى. مالىمەتتىڭ قازاقشا نۇسقاسىن قامشى اقپاراتتىق اگەنتتىگى وقىرمان نازارىنا ۇسىنادى.

ءبىز دەگەنى كىمدەر؟ ناقتى قاي جەردە؟ بارلىعى بەلگىسىز، ەشقانداي ادامنىڭ تەگى، تەلەفون ءنومىرى كورسەتىلمەگەن. العاشىندا تەرگەۋشىلەر مۇنى بىرەۋدىڭ قالجىڭى دەپ ويلاعان. الايدا دۇكەن قىزمەتكەرلەرىنىڭ ايتۋىنشا، ونداعى ادامنىڭ ەشقايسى مۇنداي حابارلاما جازىپ، قاپقا سالماعان. كەيىننەن كۋرسك وبلىسىنداعى قانت جەتكىزۋشى ادامدارمەن حابارلاسىپ، مۇنداي قاعازدىڭ قاپتىڭ ىشىنە قالاي تۇسكەندىگى جايىندا انىق-قانىعىن بىلمەك بولعان.

بەلگىلى بولعانداي، دۇكەنگە قانتتى اپتاسىنا ءبىر رەت الىپ كەلەدى ەكەن. ونى كونديتەر سەحىندا ءتۇرلى ءتاتتى توقاشتار مەن تورتتاردى پىسىرۋگە پايدالانادى. 50 كەلىلىك ءبىر قاپ قانت بىتكەننەن سوڭ كونديتەر قىزمەتشىسى ەكىنشى قاپتى اشىپ، ىشىنەن سۇر ءتۇستى قاعازدى تاۋىپ العان. دۇكەن قىزمەتكەرلەرىنىڭ ايتۋىنشا، بۇل جەرگە جەتكىزىلەتىن قانتتىڭ سىرتىندا ۇنەمى اقپارات جازىلعان قاعاز بولاتىن، الايدا ءدال وسى قاپقا مۇنداي قاعازدى جابىستىرۋدى ۇمىتىپ كەتكەن ەكەن.

12 ءساۋىر كۇنى وقيعا ورىن العان جەرگە قۇقىق قورعاۋ ورگاندارى كەلىپ، تەرگەۋ جۇمىستارىن جۇرگىزىپتى. ءتارتىپ ساقتاۋ قىزمەتكەرلەرى «كوللەكتيۆيست» دەپ اتالاتىن قانت زاۋىتىنىڭ ۇجىمىن تەرگەپ، بارلىق قويمالاردى تەكسەرىپ، اينالانى تۇگەلىمەن شولىپ شىققان. دەگەنمەن، قۇلدىقتا جۇرگەن ەشبىر ادام تابىلماپتى. سونىمەن قاتار، بۇل جەردە جۇمىس ىستەيتىن ادامداردىڭ سانى دا از ەكەن.

«مۇندا قانت ءوندىرۋ جۇمىستارى مەرزىمدى بولىپ كەلەدى جانە زاۋىت قىزمەتكەرلەرى ونى قىستا توقتاتىپ قويعان، دەمەك بۇل ونىمدەردىڭ تۇرعانىنا ءبىر جىلداي ۋاقىت بولعان. سونىمەن قاتار، قانتتى بۇل جەرگە باسقا جەردەن دە الىپ كەلۋى ابدەن مۇمكىن، ال سىرتىنداعى جاپسىرما قاعازى كۋرسكتىكى. ال، ليۋبيموۆكادا ورانالسقان قانت زاۋىتىنا قاتىستى ايتاتىن بولساق، بۇل جەر بىرنەشە ۋاقىتتان بەرى جۇمىس ىستەپ كەلە جاتىر، ۇجىمى تۇراقتى، ولاردىڭ اراسىندا ەشقانداي دا كەلىمسەكتەر جوق، ءبارى دە جەرگىلىكتى تۇرعىندار. بۇل جەرگە جۇمىسقا كىرۋ سونشالىقتى وڭاي دا ەمەس»، - دەپ مالىمدەدى قۇقىق قورعاۋ ورگانى.

ەندىگى كەزەكتە، قۇقىق قورعاۋشىلار كومەك سۇراپ جازعان ادامنىڭ كىم ەكەنىن جانە قاشان تاراتقاندىعىن ىزدەستىرۋدە. حابارلامانىڭ جازىلعانىنا تىم ۇزاق ۋاقىت بولۋى دا ابدەن مۇمكىن.

«كوللەكتيۆيست» اتتى قانت زاۋىتى كۋرسك وبلىسى، بولشەسولدات اۋدانىنداعى ليۋبيموۆكا اۋىلىندا ورنالاسقان. جاقىندا عانا زاۋىتتىڭ باسشىلىعى اۋىسقان بولاتىن. ەكس-باسشىسى كۋرسك وبلىسىنىڭ ءىرى كاسىپكەرلەرىنىڭ ءبىرى بولاتىن، الايدا بىرنەشە كۇن بۇرىن «يۆولگا-سەنتر» كومپانياسى داعدارىسقا ۇشىراعان. بىرنەشە ميلليارد قارىزعا كىرگەن كومپانيا اقشانى رەسەيلىك بانكتەردەن جانە شوتلانديالىق Royal Bank of Scotland بانكىنەن العانى بەلگىلى بولدى.

«ءبىز پوليسياعا ارىز جازدىق. قانت سالىنعان قاپ دۇكەننەن تاركىلەنىپ، زەرتتەۋ جۇمىستارى باستالدى»، - دەپ مالىمدەدى دۇكەن باسشىلىعى.

اۋدارعان: نازەركە لابيحان