قازاق مەملەكەتتىك قىزدار پەداگوگيكالىق ۋنيۆەرسيتەتى الەۋمەتتىك-گۋمانيتارلىق فاكۋلتەتىنىڭ قازاقستان تاريحى كافەدراسى الاش وردانىڭ 100 جىلدىعى اياسىندا الماتى قالاسىنداعى جوعارى وقۋ ورىندارىنىڭ ستۋدەنتتەرى اراسىندا «الاش قوزعالىسى: تاريحى مەن تاعلىمى» اتتى ينتەللەكتۋالدى وليمپيادا وتكىزدى دەپ حابارلايدى قامشى اقپاراتتىق اگەنتتىگى.
بۇل شارانىڭ نەگىزگى ماقساتى – ۇلتىنىڭ ازاتتىعى مەن تەڭدىگى ءۇشىن ايانباي قىزمەت ەتكەن الاش قايراتكەرلەرىنىڭ ونەگەلى ىستەرى مەن جالىنداعان عۇمىرلارىن ەلىنىڭ جارقىن بولاشاعىنا ارناعان ءومىر جولىن، جۇرەگى مەن اقىلىنان تۋعان كوركەم ويلارىن، دۇنيەتانىمىن، الاش قوزعالىسىنىڭ تاعىلىمىن ناسيحاتتاۋ. جاس ۇرپاققا الاش زيالىلارىنىڭ ازاتتىق ءۇشىن كۇرەسكەن جىلدارىنىڭ سالماعى مەن باعاسىن ۇعىنۋعا ىقپال جاساۋ ارقىلى تاۋەلسىزدىگىمىزدىڭ ءمانىن سەزىنۋگە تاربيەلەۋ، ستۋدەنتتەردىڭ ساناسىندا ءوز ەلىنە دەگەن ماقتانىش پەن پاتريوتتىق سەزىمدى قالىپتاستىرۋ.
وليمپيادانىڭ اشىلۋ راسىمىندە ءسوز العان الەۋمەتتىك-گۋمانيتارلىق فاكۋلتەتىنىڭ دەكانى، ت.ع.ك.، دوسەنت جامال اشىربەكوۆا ەل بولاشاعىنىڭ جارقىن بولۋى رۋحى اسقاق، ورەسى بيىك، ءبىلىمدى دە تالانتتى جاستاردىڭ قولىندا ەكەندىگىن باسا ءتۇسىندىرىپ ءوتتى. ۇيىمداستىرىلعان ءبىلىم دوداسى ستۋدەنت جاستاردىڭ ءوز ەلىنىڭ تاريحىنا قۇرمەتپەن قاراپ، وتانسۇيگىشتىك پەن ۇلتجاندىلىققا تاربيەلەيتىن شارالاردىڭ ءبىرى ەكەندىگىنە توقتالىپ، قاتىسۋشى توپتارعا تابىس پەن ساتتىلىك تىلەدى.
وليمپياداعا ءال-فارابي اتىنداعى قازاق ۇلتتىق ۋنيۆەرسيتەتى «الاش ۇرپاقتارى» كومانداسى، س.ج.اسفەندياروۆ اتىنداعى قازۇمۋ «يبن-سينا ءىزباسارلارى» كومانداسى، الماتى تەحنولوگيالىق ۋنيۆەرسيتەتى «الاش اماناتى» كومانداسى، الماتى ۋنيۆەرسيتەتىنىڭ «بايتەرەك» كومانداسى، قازاق باس ساۋلەت-قۇرىلىس اكادەمياسىنىڭ «نوماد» كومانداسى، قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ «اق تۇمار» كومانداسى قاتىستى.
ينتەللەكتۋالدى دودادا ب ا ق سىناسقان قاتىسۋشى توپتار بەس اينالىمنان تۇراتىن ارنايى سۇراقتار مەن تاپسىرمالارعا بەلسەنە جاۋاپ بەرىپ ءوز بىلىمدەرىن سىنادى.
ءى اينالىم – تانىستىرۋدا ءار كوماندا كاپيتانى ءوزىنىڭ ۋنيۆەرسيتەتى مەن مۇشەلەرىن تانىستىرىپ، كوماندانىڭ اتىن قورعاسا، ءىى «ۇياشىقتار قۇپياسى» اينالىمىندا ءار كوماندا ۇياشىقتاردا جاسىرىلعان الاش قايراتكەرلەرىنىڭ ءومىرى، قوعامدىق-ساياسي قىزمەتى مەن الاش پارتياسى تاريحىنىڭ نەگىزگى كەزەڭدەرىنە بايلانىستى سۇراقتارعا جاۋاپ بەردى. بەينە سۇراقتان تۇراتىن ءىىى اينالىمدا ەلىمىزگە تانىمال عالىمدار ۆيدەو فورماتىندا قاتىسۋشى توپتارعا «الاش قوزعالىسى: تاريحى مەن تاعلىمى» تاقىرىبىنا قاتىستى ارنايى ساۋالدار قويدى. ءىV «التىن قاقپا» اينالىمىندا ءار كوماندا الاش قايراتكەرلەرىنىڭ ءومىرى، قوعامدىق-ساياسي قىزمەتى مەن الاش پارتياسى جانە الاش وردا ۇكىمەتى تاريحىنا قاتىستى ءۇش دەڭگەيلى تاريحي تەرميندەرگە انىقتاما بەردى. 1-دەڭگەي «قولا قاقپا»، 2-دەڭگەي «كۇمىس قاقپا»، 3-دەڭگەي «التىن قاقپا» دەپ اتالدى. تولىق جاۋاپ بەرگەن كوماندا عانا قاقپادان ءوتۋ مۇمكىندىگىنە يە بولدى. ءۇشىنشى قاقپانىڭ سۇراعى اعىلشىن تىلىندە قويىلدى. بۇل سايىستا سايىسكەرلەردىڭ سويلەۋ مانەرى، شەشەندىگى، فاكتىلەردى قولدانۋى باستى نازارعا الىندى. ال، سوڭعى، V «وي تولعاۋ» اينالىمىندا كوماندا مۇشەلەرى ارنايى جاشىكتە نە جاسىرىلعانىن تاۋىپ، تاقىرىپقا قاتىستى ماعلۇمات بەردى.
الماتى قالاسىنداعى جوعارى وقۋ ورىندارىنىڭ ستۋدەنتتەرى اراسىندا وتكىزىلگەن ينتەللەكتۋالدى وليمپيادانىڭ قورىتىندىسى بويىنشا: س.ج.اسفەندياروۆ اتىنداعى قازۇمۋ «يبن-سينا ءىزباسارلارى» كومانداسى I ورىن، الماتى تەحنولوگيالىق ۋنيۆەرسيتەتى «الاش اماناتى» كومانداسى II ورىن، الماتى ۋنيۆەرسيتەتى «بايتەرەك» جانە قازاق باس ساۋلەت-قۇرىلىس اكادەمياسى «نوماد» كوماندالارى ءىىى ورىندى يەلەندى. بارلىق جەڭىمپازدار كوماندالار ماقتاۋ قاعازدارىمەن جانە ارنايى سىيلىقتارمەن ماراپاتتالدى.
قازاقستان تاريحى كافەدراسىنىڭ مەڭگەرۋشىسى، ت.ع.ك. ايناگۇل قايىپبايەۆا: «دانا حالقىمىز «قازاقستان تاريحى ءپانى بويىنشا وتكەن ءداستۇرلى ينتەللەكتۋالدى وليمپيادا بارىسىندا ستۋدەنت جاستار مىڭدى جىعار جان-جاقتى بىلىمدەرىمەن وسى قاناتتى ءسوزدىڭ تاريحي ماڭىزىن كورسەتە ءبىلدى»، دەپ اتاپ ءوتتى.
الماتى تەحنولوگيالىق ۋنيۆەرسيتەتى «الاش اماناتى» كومانداسىنىڭ جەتەكشىسى، ت.ع.ك.، دوسەنت ك.ب.احاتايەۆا ءبىلىم سايىسىنا قاتىسۋشى جاستاردىڭ ينتەللەكتەرىنىڭ جىلدان جىلعا ءوسىپ كەلە جاتقاندىڭىنىڭ كۋاسى بولىپ وتىرعاندىعىن ايتىپ، شارانىڭ ماڭىزدىلىعىن اشتى.
ۋنيۆەرسيتەت قابىرعاسىندا قازاقستان تاريحى ءپانى بويىنشا ءداستۇرلى تۇردە ۇيىمداستىرىلاتىن بۇل ءىس-شارا جاس ۇرپاقتىڭ پاتريوتتىق سەزىمدەرىن وياتىپ قانا قويماي، ەل تاريحىن ناسيحاتتاۋدا ۇلكەن ءرول اتقاراتىندىعىنا سەنىمىمىز مول.
