بريتاندىق دەپۋتاتتار سيريا پرەزيدەنتىنىڭ جارى اسما اسادتى بريتانيا ازاماتتاعىنان ايىرۋدى تالاپ ەتۋدە، دەپ حابارلايدى قامشى اقپاراتتىق اگەنتتىگى.

41 جاستاعى اسما اساد لوندوندا دۇنيەگە كەلىپ، ءبىلىم العان. 2000 جىلى ءوزىنىڭ تاريحي وتانىنا ورالىپ، باشار اسادقا تۇرمىسقا شىققان.

سيريانىڭ ءبىرىنشى حانىمىنىڭ الەۋمەتتىك جەلىلەردە اككاۋنتتارىندا مىڭداعان وقىرماندارى بار. ءوز جازبالارىندا ول جۇبايىنىڭ ىس-ارەكەتتەرىن جاقتايدى جانە باتىستىق ساياساتتى سىنعا الادى.

Telegraph گازەتىنىڭ جازۋى بويىنشا، بريتاندىق دەپۋتاتتار: «ەگەر اسما باشار اسادتىڭ ىس-ارەكەتىن جاقتاۋىن توقتاتپاسا، ۇكىمەت ونى بريتانيا ازاماتتىعىنان ايىرۋى كەرەك. نەمەسە ونىڭ جازبالارىنىڭ بىرىككەن كورولدىكتەرگە زيانى جوقتىعىن دالەلدەۋى كەرەك»، - دەپ مالىمدەگەن.

«بىزگە اسادتى جان-جاقتى قىسىمعا الاتىن ۋاقىت كەلدى. ءتىپتى ول ءۇشىن ونىڭ اينالاسىنداعى اسما سىندى ادامداردى پايدالانۋ كەرەك. سەبەبى ولاردا اسكەري قىلمىس جاساۋشى ماشينانىڭ ءبىر بولشەكتەرى»، - دەيدى ءوز سوزىندە كونسەرۆاتور ناديم زاحاۆي.

Telegraph گازەتىنىڭ حابارلاۋىنشا، ىشكى ىستەر مينيسترلىگى اسما اسادتى ەش قيىندىقسىز ازاماتتىعىنان ايىرا الادى. سەبەبى ونىڭ ەكى بىردەي ازاماتتىعى بار.

بريتانيا ىشكى ىستەر مينيسترلىگى مۇنداي جەكەلەگەن جاعدايلاردى قاراستىرمايتىندىعىن ايتقان.

ەۋرو وداق اسما اسادقا سانكسيا جاريالاعان بولاتىن. وعان ەو ايماعىنا كىرۋگە تىيىم سالىنعان جانە بارلىق قارجىلىق اكتيۆتەرى بۇعاتتالعان. بريتانيا ازاماتى بولعاندىقتان ول تەك وسى ەلگە ەمىن-ەركىن كىرە الادى.

بۇل تاقىرىپ 2012 جىلى دا كوتەرىلگەن بولاتىن. الايدا ىشكى ىستەر مينيسترلىگى ناقتى شەشىمگە كەلمەگەن.

4 ءساۋىر كۇنى حان-شەيحۋندە بولعان حيميالىق جارىلىس بۇل تاقىرىپتى قايتا قوزعاۋعا تۇرتكى بولىپ وتىر. سەبەبى بۇۇ 89 ادام قايتىس بولعان شابۋىلعا باشار اسادتى ايىپتاپ وتىر.