44 جاستاعى امەريكا ازاماتشاسى ۇيىقتايتىن كيىممەن ەشقانداي قارۋسىز، ءبىر جاپىراق قاعازدىڭ كومەگىمەن بەس بىردەي بانكتى تونادى، دەپ حابارلايدى قامشى اقپاراتتىق اگەنتتىگى.

يۋتا شتاتىنىڭ پوليسياسى سولت-لەيك-سيتيدە التى بىردەي بانكتى توناماق بولعان 44 جاستاعى نانەتت لۋيس پەركينستى تۇتقىندادى.

قۇقىق قورعاۋ ورگاندارىنىڭ حابارلاۋىنشا، ۇرى ءتىپتى جاسىرىنۋعا تالپىنباعان. ونىڭ قانشا اقشا الىپ كەتكەندىگى، ولاردىڭ بانكتەرگە قايتارىلعانى حابارلانعان جوق. پەركينستى باقىلاۋ كامەرالارىنىڭ كومەگىمەن تاۋىپ العان.

بارلىق توناۋ ىسىنە ۇرى قارۋ قولدانباعان، بار بولعانى ءبىر جاپىراق قاعازدى كاسساعا بەرىپ، ناتيجەسىندە اقشا الىپ وتىرعان. بانكتەردىڭ بىرىندە كاسسير وعان اقشا بەرمەگەن. ول بولسا ەش قىمسىنۋسىز كەرى بۇرىلىپ، شىعىپ كەتكەن.

بارلىق ىستەرگە ول ۇيىقتايتىن كيىممەن بارعان. قارا كوزىلدىرىك پەن قارا بەتپەردە تاعىپ العان.