قحر ءتوراعاسى سي سزينپين استاناداعى ەكسپو كورمەسىنە كەلەدى. بۇل تۋرالى بۇگىن استانادا ىنتىماقتاستىق جونىندەگى قازاقستان-قىتاي كوميتەتىنىڭ 8-وتىرىسى بارىسىندا قحر مەملەكەتتىك كەڭەسى پرەمەرىنىڭ ورىنباسارى چجان گاولي ءمالىم ەتتى، دەپ حابارلايدى قازاقپارات.

«تاياۋ ەكى ايدىڭ ىشىندە ءبىزدىڭ مەملەكەت باسشىلارىمىزدىڭ كەزدەسۋى وتەدى دەپ كوزدەلگەن. سىزدەردىڭ پرەزيدەنتتەرىڭىز مامىر ايىنىڭ ورتاسىنا قاراي قىتايعا كەلەدى، وندا ول «ءبىر بەلدەۋ - ءبىر جول» اتتى حالىقارالىق فورۋمنىڭ جۇمىسىنا قاتىسادى. ءتوراعا سي سزينپين ماۋسىم ايىنىڭ باسىندا استاناعا ساپارلاپ، شىۇ سامميتىنە جانە ەكسپو-عا قاتىسادى. سوندىقتان ولاردىڭ اراسىندا وتە ماڭىزدى كەزدەسۋلەر وتەدى»، - دەدى چجان گاولي.

ەسكە سالا كەتەيىك، بۇنىڭ الدىندا قحر ءتوراعاسى استاناداعى ەكسپو كورمەسىنە قاتىساتىندىعى تۋرالى حابارلانعان بولاتىن.

قحر ۆيسە-پرەمەرى قازاقستان مەن جۇڭگو اراسىنداعى ىنتىماقتاستىقتىڭ ءساتتى دامۋىنا دا توقتالدى. قازىرگى ۋاقىتتا 3 جوبا ىسكە قوسىلدى، 5 جوبا قۇرىلىس ۇستىندە، تاعى 10 جوبا جاقىن ارادا پايدالانۋعا بەرىلەدى دەپ جوسپارلانعان. يندۋستريالاندىرۋ بويىنشا بىرلەسكەن قور قۇرىلدى، ماقساتتى نەسيە قاراجاتى ءبولىندى.