14 ءساۋىر كۇنى ەلباسىنىڭ «بولاشاققا باعدار: رۋحاني جاڭعىرۋ» اتتى جولداۋ ماقالاسىنا بايلانىستى م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا  ۇجىمنىڭ  جانە ب ا ق وكىلدەرىنىڭ قاتىسۋىمەن  تالقىلاۋ جيىنى ءوتتى دەپ حابارلايدى قامشى اا تەاتردىڭ باسپا ءسوز قىزمەتىنە سىلتەمە جاساي وتىرىپ.

جيىن بارىسىندا تەاتر ديرەكتورى ەرلان ءبىلال ەل يگىلىگى ءۇشىن جاسالىپ وتىرعان جوبانىڭ حالىققا ۇسىنىلۋىمەن جينالعان قاۋىمدى قۇتتىقتادى.  تەاتر ارتىستەرى ماقالانىڭ ورىندى ۋاقىتتا جاريالانعانىن اتاپ ءوتىپ،ءوز ويلارىن ورتاعا سالدى:

ءاسانالى ءاشىموۆ:

ەلباسىمىزدىڭ جولداۋ ماقالاسىنداعى  رۋحاني جاڭعىرۋدى ءبىزدىڭ دامۋىمىزدىڭ ەڭ باستى بەلەستەرىنىڭ ءبىرى دەپ ەسەپتەيمىن. سەبەبى، رۋحى، سالت – ءداستۇرى، ءتىلى جوعالعان حالىقتى ەشكىم، ەشقاشان بىلمەك ەمەس. تاريحىن بويىنا ءسىڭىرىپ وسكەن ۇرپاق قانا مىقتى بولىپ، الەمگە قىراعى كوزبەن شولۋ جاساپ، قورىقپاي قانات قاعىپ،  قاجىرلى ەڭبەك ەتەتىنى ءسوزسىز! سوندىقتان، ەلباسىمىز بۇگىنگى كۇننىڭ  عانا مۇددەسىن ويلاپ قويماي، ۇرپاقتان – ۇرپاققا ساباقتاسىپ جاتاتىن، ساعىن سىندىرماي، بارىن بارىمتالاتپاي، باعىن بالتالاتپاي، ءوزىم دەگەندە وزەگىندە ار مەن نامىس بىتە قايناسىپ جاتاتىن ۇل مەن قىزدىڭ ءوسىپ – ونۋىنە جان – جاقتى جاعداي جاسالاتىن باعىت سىلتەپ وتىر.  ەندى،  ءبىز،  ءاربىر ساتتە جالعىز ماقساتقا جاپپاي قولداۋ ءبىلدىرىپ، جۇمىلا اتسالىسساق   جارقىن بولاشاققا قادام باسقان ءار پەرزەنتىمىزگە تابىستايتىن مۇرامىز دا جارقىن  بولادى.

ەرلان ءبىلال:

بۇگىنگى  ەلباسىمىز ن.ءا.نازاربايەۆتىڭ  «بولاشاققا باعدار: رۋحاني جاڭعىرۋ»  اتتى جولداۋ ماقالاسىندا ايتىلعان رۋحاني جاڭعىرۋ مەن  زاماناۋي ىلگەرىلەۋدىڭ  جۇگەنىن تارتىپ ۇستاسىپ، جۇگىن قاتار كوتەرىسەتىن ازامات، ازاماتشا تاربيەلەي الۋ مەن ءبىلىمدى، جان-جاقتى ۇرپاعى بار ەلدەردىڭ  كوشباسشىسى  بولۋ  قاي-قايسىمىزدىڭ دا كوكەيىمىزگە قونارى حاق! ەلباسىنىڭ «ماقساتقا جەتۋ ءۇشىن ءبىزدىڭ سانامىز  ىسىمىزدەن وزىپ ءجۇرۋى، ياعني ودان بۇرىن جاڭعىرىپ وتىرۋى ءتيىس» ، «جاڭعىرۋ ەلدىڭ ۇلتتىق -  رۋحاني تامىرىنان ءنار الۋى كەرەك» - دەگەن  سوزدەرىنىڭ استارىندا   ەل مۇددەسىن باستى قۇندىلىق دەپ باعالاۋ جاتىر. ەندەشە، بۇل سۇبەلى ويدى بارلىعىمىز دا قولداۋعا ءتيىستىمىز!

 جاسۇلان بايسالبەكوۆ:

 تاۋەلسىز قازاقستاننىڭ  كۇن سايىن عارىشتاپ دامۋى جولىنداعى باستى قاعيدالارىنىڭ  بەرىكتىگى  نەگىزىندە وتانىمىز تۇبەگەيلى جاڭعىرۋ مەن  جاڭا مۇمكىندىكتەرگە جول اشۋعا قابىلەتتى بولىپ وتىر. بارشا قازاقستاندىق جاستار  ەلباسىمىز نۇرسۇلتان ءابىش ۇلىنىڭ قۇندىلىعى زور ماقالاسىنان  ۇلكەن جىگەر، بولاشاققا دەگەن سەنىم الدى! ەلباسى سىناپتاي سىرعىعان ۋاقىت ەشكىمدى كۇتىپ تۇرمايدى، جاڭعىرۋ دا تاريحتىڭ ءوزى سياقتى جالعاسا بەرەتىن پروسەسس دەپ جاستاردى زامان تالابىنا ساي جان-جاقتى بولۋعا ۇندەدى. «بولاشاققا باعدار: رۋحاني جاڭعىرۋ» ماقالاسى  ارقىلى  ن.ءا.نازاربايەۆ دامىعان 30 ەلدىڭ قاتارىنا قوسىلۋ جولىندا جاستاردىڭ قوسار  ۇلەسى  وراسان زور  ماڭىزعا يە ەكەندىگىن باسا كورسەتتى. ءبىز ارتىلعان ءۇمىت پەن سەنىمدى اقتاۋعا ايانباي ەڭبەك ەتۋگە دايىنبىز!

سالتانات باقايەۆا:

زامانعا ساي بولۋ، الەمدىك سانا قاعيدالارىن قالىپتاستىرۋ،دامىعان ەلدەرمەن وتانىمىزدىڭ تەرەزەسى تەڭ تۇرۋدى باستى ماقسات ەتكەن ەلباسىمىز ن.ءا.نازاربايەۆتىڭ سىندارلى ساياساتى قازاقستاندىقتاردىڭ مۇددەسىنە باعىتتالعان، ۇلتتىق تاريح، بۇگىنىمىز بەن بولاشاعىمىز اراسىنداعى دانەكەرلەۋشى كوپىر ىسپەتتى. ءبىلىم سالاسى، تاربيە، وتباسى،ءار ادامنىڭ تۇلعالىق قالىپتاسۋى،ۇلتقا دەگەن شەكسىز ماحاببات قاشاندا جۇرەگىمىزدە ساقتالۋى كەرەك ەكەنى، اتامەكەن اۋىلىمىزدىڭ قادىر-قاسيەتىن دە ۇمىتپاۋعا شاقىرعان ەلباسىنىڭ «بولاشاققا باعدار: رۋحاني جاڭعىرۋ» ماقالاسى جان-جاقتى قامتىلىپ، ۇلتتىق مۇددەدە  بولۋى قۋانتادى!

     ەلباسى نۇرسۇلتان ءابىش ۇلى جولداعان «بولاشاققا باعدار: رۋحاني جاڭعىرۋ» ماقالاسى كەلەشەگىمىزگە نىق قادام جاساۋعا، باعىت-باعدارىمىزدى انىقتاپ، ناقتى ماقسات-مىندەت قويۋمىزعا ىقپال ەتەتىن جولداۋ بولدى. ۇلت كوشباسشىسى ايتقان ۇلتتىق سانا-سەزىمنىڭ كوكجيەگىن كەڭەيتۋ، ۇلتتىق كودتى ساقتاۋ ءۇشىن ءار سالا ماماندارى وزىنشە ىزدەنىپ، جوسپارلى ەڭبەك ەتۋى ءتيىس دەگەن  ەلباسى ماقالاسىنداعى قۇندى ۇسىنىستارعا اۋەزوۆ تەاترىنىڭ ۇجىمى ءبىر اۋىزدان قولداۋ تانىتاتىندارىن جەتكىزدى.