ءماجىلىس دەپۋتاتى بەكبولات تىلەۋحان ءبىلىم جانە عىلىم ءمينيسترى ەرلان ساعادييەۆكە دەپۋتاتتىق ساۋال جولداپ، ۇبت سۇراقتارىنا قاتىستى ەلدىڭ نارازىلىعىن جەتكىزدى، دەپ حابارلايدى قامشى اا Sputnik قازاقستان تىلشىسىنە سىلتەمەي جاساي وتىرىپ.

"جالپى، ۇبت فورماتىندا وڭ وزگەرىستەر بارشىلىق. ءبىراق باستى پروبلەما سۇراقتىڭ ساپاسىندا بولىپ وتىر. ءبىلىم سالاسىندا ءاربىر قادامنىڭ نەگىزگى كوزدەگەن ماقساتىنان تىس يدەولوگيالىق باعىتىن، رۋحاني جۇگىن ەشقاشان نازاردان تىس قالدىرۋعا بولمايدى. بۇل ماڭىزدى ماسەلە. بۇگىندە ءبىلىم سالاسىنىڭ ەكسپەريمەنت الاڭىنا اينالىپ كەتۋى وتە الاڭدارلىق قۇبىلىس. نەگىزى ءبىلىم سالاسىنا قاتىستى بىردە-بىر ماعلۇمات جاۋاپسىز جازىلۋعا ءتيىس ەمەس. ويتكەنى، ونىمەن سۋسىنداعان بالانىڭ ەرتەڭ ازاماتتىق پوزيسياسىنا، مەملەكەتشىلدىگىنە، ەلجاندىلىعىنا، تاريحي ساناسىنىڭ قالىپتاسۋىنا اسەر ەتەتىنىن ەرەكشە ەسكەرۋ كەرەك"، — دەيدى دەپۋتات.

سونىمەن، دەپۋتات ۇبت سۇراقتارىنا قاتىستى حالىقتىڭ پىكىرىن ءبىلىپ، ەلدىڭ كوكەيىندەگى دۇنيەنى مينيسترگە جەتكىزۋدى ءجون كورىپتى.

"گازەتتە ءبىرىنشى ناۋرىزدا جاريالانعان ۇبت سۇراقتارى قوعامنىڭ ايىرىقشا نارازىلىعىنا دۋشار بولعانىنا ءبارىمىز كۋامىز. تەست سۇراقتارىندا ەرمەك تۇرسىنوۆ، بايان ەسەنتايەۆا، نۇرتاس ادامباي سياقتى شوۋ-بيزنەس، ەسترادا وكىلدەرى ءجۇر. سپورتشىلاردان گولوۆكين بار. ەلدىڭ پىكىرىن الەۋمەتتىك جەلىلەردە بىلۋگە مۇمكىندىك بار. سودان بايقاعانىمىز، ەلدىڭ نارازىلىعى جويقىن. مىسالى، "نە ۇلگىسى، نە ونەگەسى جوق ەسەنتايەۆا مەن تۇرسىنوۆتى ۇرپاققا ۇلگى قىلۋدان نە ۇتامىز؟" دەيدى بىرەۋى. ەندى بىرەۋ "فرەددي روۋچ نە قىلىپ ءجۇر؟" دەپ تاڭ قالادى. شىنىندا دا، ول ءبىزدىڭ رۋحاني كودىمىزعا، بولاشاققا باعدارىمىزعا، رۋحاني جاڭعىرۋىمىزعا قاتىسى بار تۇلعا ما؟! "گولوۆكيندى ءبارىمىز جاقسى كورەمىز، ءبىراق ول وليمپيادا چەمپيونى ەمەس" دەپ تە جازىپتى. شيشيگينا مەن ساپييەۆتى دەپۋتات دەپ قوسپاي-اق قويسىن. ديما بالاندين مەن دانيار ەلەۋسىنوۆ وليمپيادا چەمپيونى عوي. فرەددي روۋچ، گونزالەس بۇل جەردە نە ىستەپ ءجۇر؟ كليچكونىڭ قاجەتى نە؟"، — دەيدى تىلەۋحان.

"جاقسى، شاكەن ايمانوۆ پەن سۇلتان حودجيكوۆتى ۇمىتسىن، قايتىس بولدى. ءاسانالى ءاشىموۆ پەن جولجاقسىنوۆتار قايدا؟ ولار، كارى شىعار، بالكي؟! ەشكى سۇيرەتىپ، ەلدى ماسقارالاعان ەرمەك تۇرسىنوۆ "جاۋجۇرەك مىڭ بالانى" تۇسىرگەن اقان ساتايەۆ پەن "قازاق حاندىعىن" تۇسىرگەن رۇستەم ابدىراشيەۆتان نەسىمەن وزدى؟! سارتاي باتىردان ەشكى، سابينكا كەلىن كەرەي مەن جانىبەكتەن ارتىق بولدى ما؟! "بۇل جەردە انا تىلىنە شورقاق ادامداردى ادەيى تاڭداي ما" دەيدى حالىق. ەلدىڭ كوزقاراسى وسىنداي"، — دەپ كەيىدى دەپۋتات.

ونىڭ ايتۋىنشا، كلاسسيكالىق نەگىز، اكادەميالىق نۇسقا دەگەن دۇنيە قاشاندا عىلىمعا ىرگەتاس بولعان. ال وسى كۇنى اكادەميالىق جازبالارعا سۇيەنبەي، ينتەرنەتتەن ماعلۇمات الا سالاتىن بولعان. "جالپى، بۇقارانىڭ سونشالىقتى نارازىلىعىنا سەبەپ بولعان جاۋاپتى تۇلعالار جاۋاپكەرشىلىككە تارتىلا ما؟ ۇبت-داعى وسىنداي ورەسكەل قاتەلىكتەر جىبەرگەن تەستولوگتار شەتتەتىلە مە؟ وسىنداي كەلەڭسىزدىكتەرگە نەگىزگى سەبەپ جۇيەدەن دەپ ويلايمىز. سوندىقتان، ءبىرىنشى، وقۋ باعدارلاماسى، وقۋلىقتار، ۇبت-نىڭ جۇيەسىندەگى ساباقتاستىقتى قالىپتاستىرۋ قاجەت. ەكىنشى، وسىنداي اسا جاۋاپتى دۇنيە قوعامدىق تالقىدان ءوتۋى كەرەك. ۇلتتىق كودىمىزعا، رۋحاني جاڭعىرۋىمىزعا قاتىستى تۇلعالار تۋرا وسى جەردە ورنەك تابۋعا ءتيىس"، — دەپ تۇيىندەدى ءسوزىن بەكبولات تىلەۋحان.