اقتوبە وبلىسىنىڭ 10 جاستاعى تۇرعىنى بيلىك وكىلدەرىنە ۇندەۋ ايتىپ، جانايقايىن جەتكىزگەن ۆيدەوسى جاريالانعان ەدى. كىشكەنتاي عانا قىزدىڭ ايانىشتى حالى قازاق جۇرتىن بەي-جاي قالدىرماسى انىق. كومەكتەسىپ، قول ۇشىن سوزعىسى كەلەتىندەر دە تابىلىپ جاتتى. سولاردىڭ ءبىرى تانىمال ءانشى مەرۋەرت تۇسىپبايەۆا بولدى، دەپ حابارلايدى قامشى اا. وقۋشى قىزدىڭ جانايقايىن ەستىگەن ءانشى بىردەن كومەكتىسكىسى كەلەتىنىن جەتكىزگەن. بۇل جايىندا ول فەيسبۋك پاراقشاسىندا جازدى.

جازباسىندا قىزعا جانى اشىعان ءانشىنىڭ كومەكتەسپەك بولعان تازا نيەتىن بايقايمىز: "كىتاپتارىم سۋعا كەتتى دەپ جىلاماشى، بوتاقان! ءبارىن ءوزىم اپەرەمىن" دەپ، تىلشىلەردەن قىزعا قاتىستى بارلىق اقپاراتتاردى مالىمدەۋىن سۇرايدى.

ەسكە سالا كەتەيىك، ماحامبەتوۆ اۋىلىندا تۇراتىن تۇرعانگۇل ەشىموۆا سۋ تاسقىنى سالدارىنان جالعىز ۇيلەرىنەن ايىرىلىپ قالدى. ايەلدىڭ ايتۋىنشا، جۇرەگى ناشار كۇيەۋى ءۇيىنىڭ قالاي قۇلاپ جاتقانىن ءوز كوزىمەن كورگەن.

ال، كىشى قىزدارى ماحاببات № 36 مەكتەپتىڭ 4-سىنىپ وقۋشىسى كىتاپتارسىز، كيىمدەرسىز قالدى. سۋ تاسقىنىنان جاپا شەككەن وتباسى ەستەرىن ءالى جيماعان. وسى جاعدايدى ەسكەرىپ، 10 جاستاعى ماحاببات بيلىككە ۇندەۋ ايتتى. جاپا شەككەندەرگە لايىقتى كومەك كورسەتپەگەن بيلىكتى ايىپتاپ، جانايقايىن ايتىپ سالدى.