الماتىدا «جاستار ­جەمقورلىقتان تىس ۋنيۆەرسيتەتتەردى قولدايدى!» اتتى سىبايلاس جەمقورلىققا قارسى العاشقى ستۋدەنتتەر فورۋمى ءوتتى دەپ حابارلايدى قامشى اا قازۇۋ باسپا ءسوز قىزمەتىنە سىلتەمە جاساي وتىرىپ. شاراعا قالاداعى 38 جوعارى وقۋ ورنىنىڭ ستۋدەنتتەرى مەن جاستار ۇيىمدارىنىڭ وكىلدەرى قاتىستى. فورۋم ءال-فارابي اتىنداعى قازۇۋ-دىڭ جەتەكشىلىگىمەن  قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى مەن  الماتى قالاسى اكىمدىگىنىڭ جاستار ساياساتى ماسەلەلەرى جونىندەگى باسقارماسىمەن بىرگە ۇيىمداستىرىلدى.

شارا قاتىسۋشىلارى ستۋدەنت جاستاردى جەمقورلىققا بىرىگىپ قارسى شىعۋعا، اكادەميالىق شىنشىلدىق قاعيداسىن ۇستانۋعا جانە الەۋمەتتىك زۇلىمدىق – جەمقورلىققا قارسى كۇرەس جۇمىسىنا وزىندىك ۇلەس قوسۋعا شاقىردى.

ستۋدەنت جاستار جەمقورلىققا قارسى جۇمىستاعى تاجىريبەلەرىمەن، جوبالارىمەن جانە باستامالارىمەن كرەاتيۆتى تۇردە ءبولىسىپ، ءوزارا يدەيا الماستى، وي-پىكىرلەرى مەن ۇسىنىستارىن ءبىلدىردى.  قازاقستاندىق ەسترادا جۇلدىزدارى جارقىن ونەرلەرىمەن جاستاردى قولداپ،  ستۋدەنتتەر سارايىنىڭ ساحناسىندا جاستارمەن بىرگە «جەمقورلىققا جول جوق!» دەپ ۇراندادى.

فورۋم بارىسىندا قازۇۋ ستۋدەنتتەرى «جاستار – جەمقورلىقتان تىس ۋنيۆەرسيتەتتەردى قولدايدى!» قوزعالىسىن باستاپ بەردى. ولار جەمقورلىققا قارسى فورۋم ەستافەتاسىن الماتى قالاسى مەن رەسپۋبليكانىڭ 38 وقۋ ورنىنا سالتاناتتى تۇردە تابىستادى. جاستار ۇيىمدارى كوميتەتىنىڭ ءتورايىمى ايسۇلۋ ەرنيازوۆا جەمقورلىققا قارسى فورۋم قاتىسۋشىلارىنىڭ ۇندەۋىن وقىپ، ستۋدەنت جاستاردىڭ ازاماتتىق ۇستانىمى مەن ولاردىڭ جەمقورلىققا قارسى كۇرەستەگى ۇرانىن جەتكىزدى.

 «ءبىز ءوز بولاشاعىمىزدى زاڭ ۇستەمدىك ەتكەن قوعاممەن بايلانىستىرامىز. پاراساتتىلىق، ەڭبەكقورلىق پەن اقىل، تالانت پەن ىسكەرلىك قاسيەتتەرى جاستاردىڭ كەمەل كەلەشەگىنە،  سىي-قۇرمەت پەن باقۋاتتى ومىرگە جول اشادى. بىرلەسىپ ءبىز جەمقورلىقسىز ادىلەتتى قوعام ­– ماڭگىلىك ەل قۇرا الامىز»، – دەپ قازۇۋ ماگيسترانتى ايسۇلۋ ەرنيازوۆا فورۋم جۇمىسىن تۇجىرىمدادى.

 «جوعارى وقۋ ورىندارىنداعى جەمقورلىقپەن كۇرەس ەلدىڭ ۇلتتىق قاۋىپسىزدىگىن قامتاماسىز ەتۋدە ماڭىزدى باسىمدىققا يە جانە وندا ستۋدەنت جاستاردىڭ الار ورنى ەرەكشە. ءبىز سىزدەردىڭ بۇل باستامالارىڭىزدى قۇپتايمىز جانە سىزدەرمەن بىرگە جەمقورلىقتان تىس ۋنيۆەرسيتەتتەردى قولداۋعا كەلدىك. جەمقورلىقسىز مەملەكەت سىزدەردىڭ ءارقايسىلارىڭىزدان باستالادى. بولاشاق جاستاردىڭ قولىندا!» – دەپ قازۇۋ پرورەكتورى شولپان جامانبالايەۆا فورۋم قاتىسۋشىلارىنا ۇندەۋ تاستادى.

قازۇۋ بەلسەندىلەرى جينالعاندارعا «ۋنيۆەرسيتەت جەمقورلىقتان تىس» جوباسىنىڭ جۇزەگە اسىرىلۋى جايلى بايانداپ بەردى. وقۋ ورنىندا جەمقورلىققا قارسى مەحانيزمدەر مەن تەحنولوگيالاردىڭ ءبىرتۇتاس جيىنتىعى ەنگىزىلىپ، كەز كەلگەن جەمقورلىق ارەكەتىنە شىدامسىزدىق تانىتاتىن ورتا قۇرىلعان.

ۋنيۆەرسيتەتتە جوعارى ەتيكالىق تالاپتار مەن ءتارتىپ ستاندارتتارىنان تۇراتىن وقىتۋشىلار مەن قىزمەتكەرلەردىڭ كورپوراتيۆتى مادەنيەت كودەكسى، ستۋدەنتتەردىڭ ار-نامىس كودەكسى ەنگىزىلگەن. جەمقورلىققا قارسى ساياساتتى ۋنيۆەرسيتەتتە ۇنەمى جەتىلدىرىپ وتىرۋعا «كەرى بايلانىس» ارنالارى كومەگىن تيگىزۋدە. الەۋمەتتىك سەرىكتەستىك نەگىزىندە باسقارۋ شەشىمدەرىن قابىلداۋ ۇدەرىسىنە ستۋدەنتتەردى كوپتەپ تارتۋعا ۇلكەن ءمان بەرىلەدى. «كەرەمەت» ستۋدەنتتەرگە قىزمەت كورسەتۋ بىرەگەي ورتالىعىنىڭ اشىلۋى «ۋنيۆەرسيتەت-ستۋدەنت» ءوزارا ارەكەتتەسۋىندەگى بيۋروكراتيالىق كەدەرگىلەردى  جويۋعا مۇمكىندىك بەردى. مۇندا «ءبىر تەرەزە» قاعيداسى بويىنشا ستۋدەنتتەرگە 500-دەن استام اكىمشىلىك، ءبىلىم بەرۋ، مەديسينالىق، الەۋمەتتىك-تۇرمىستىق جانە كەڭەس بەرۋ قىزمەتتەرى كورسەتىلەدى.