جەرگىلىكتى اكىمدىكتەر استانادان كەلگەن قوناقتاردىڭ كوڭىلىنەن شىعۋعا بارىنشا تىرىسادى. مۇنداي پىكىردى ق ر پارلامەنتى سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتورايىمى داريعا نازاربايەۆا ءبىلدىردى، دەپ حابارلايدى قازاقپارات.

«ءبىز جەڭىلدىك شارتتارىمەن باسپانا ءبولۋدى، جالداۋ قۇنىن مىندەتتى تۇردە وتەۋدى، زەينەت جاسىنداعى مەملەكەتتىك قىزمەتشىلەرگە جەڭىلدىكتەر ۇسىنۋدى، بالالارىن كەزەكتەن تىس بالاباقشاعا ورنالاستىرۋدى ۇسىنامىز. مەملەكەتتىك ورگانداردى قامتاماسىز ەتۋگە ارنالعان شىعىستار قۇرامىندا وكىلدىكتىك شىعىنداردى قاراستىرۋ كەرەك. ورتالىق، وبلىستىق، اۋداندىق تاراپتان  كەز كەلگەن تەكسەرۋشىلەردى مىندەتتى تۇردە كۇتىپ الىپ، قانداي دا ءبىر سىيلىق بەرىپ جاتادى. مۇنىڭ ءبارىن جويۋ ءۇشىن وكىلدىكتىك شىعىنداردى قاراستىرعان ءجون»، - دەدى اتالعان كوميتەتتە وتكەن «قر-دا سىبايلاس جەمقورلىققا قارسى ءىس-قيمىل ماسەلەلەرى بويىنشا زاڭنامانى جەتىلدىرۋ» تاقىرىبىنداعى دوڭگەلەك ۇستەل بارىسىندا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى اليك شپەكبايەۆ.

وسى رەتتە داريعا نازاربايەۆا وكىلدىكتىك شىعىنداردى قاتاڭ رەگلامەنتتەۋ كەرەكتىگىن باسا ايتتى.

«بۇل پروسەدۋرانى نەمەسە وڭىرگە ساپارمەن كەلگەندەردى قابىلداۋ ءتارتىبىن قاتاڭ رەگلامەنتتەۋ قاجەت. بۇل جەردە دە قاتاڭ ءتارتىپتىڭ بولعانى ءجون. اكىمدىكتەر استانادان كەلگەن قوناقتاردىڭ كوڭىلىن تابۋعا بارىن سالىپ جاتادى»، - دەدى نازاربايەۆا.

اليك شپەكبايەۆتىڭ ايتۋىنشا، وڭىرلەرگە ىسساپارمەن بارعانداردىڭ پارا الۋ دەرەكتەرى ءجيى كەزدەسەتىندىگىن اتاپ ءوتتى.

«قارجى مينيسترلىگىنەن قاراعاندى وبلىسىنا تەكسەرىسپەن بارىپتى. اقشا قاراجاتتارىن العاندارىمەن قويماي سۋپەرماركەتتەردىڭ بىرىنە كىرگەن ولار باستان-اياق كيىنىپتى. اقىر اياعى ۇستالىپ، 10 جىلعا باس بوستاندىقتارىنان ايىرىلدى»، - دەدى ول.

داريعا نازاربايەۆا اگەنتتىك  ءتوراعاسىنىڭ ورىنباسارىنان اتالعان قىزمەتكەرلەردىڭ جەمقورلىققا قارسى ساياسات ماسەلەلەرىن بىلمەگەندىگىن سونداي قادامعا بارعان شىعار دەپ سۇرادى.

«مەنىڭشە، بۇگىنگى كۇنى باسشىلار جەمقورلىققا قارسى ساياساتتى، زاڭدارىمىزدى بىلەدى. ءبىز بارلىق دەرلىك مەملەكەتتىك ورگانداردا ءتۇسىندىرۋ جۇمىستارىن جۇرگىزىپ، ادەپ نورمالارىن بۇزۋ سالدارى بەينەلەنگەن ۆيدەولار كورسەتتىك. قالاي دەسەك تە تومەندە بار پسيحولوگيا وزگەرىپ كەلەدى. ءبىراق، مەنىڭشە ءبىر جىلدىڭ ىشىندە وزگەرە قويمايدى. وعان ۋاقىت كەرەك»، - دەدى شپەكبايەۆ.