سەنات دەپۋتاتى ءبىرعانىم ايتىموۆا پرەزيدەنت نۇرسۇلتان نازاربايەۆتىڭ قازاقستاندىقتارعا قارا كيىمگە تىيىم سالۋعا قاتىستى ۇسىنىسىنا قاتىستى پىكىرىن ءبىلدىردى، - دەپ حابارلايى قامشى اا  Tengrinews.kz-كە سىلتەمە جاساي وتىرىپ.

"ادامداردىڭ ءدىني سەنىم بوستاندىعىنا دەگەن قۇقىعى ادامعا ماكسيمالدى، مۇمكىندىگىنشە جانە جان-جاقتى بەرىلەدى. سونداي-اق، كونستيتۋسيادا قازاقستان زايىرلى مەملەكەت رەتىندە كورسەتىلگەن، سوندىقتان زايىرلى مەملەكەتتىڭ ەرەجەلەرى مەن زاڭدارى بارلىعىنا بىردەي بولۋى ءتيىس. سول سەبەپتى بارلىق وتباسىعا جانە بالالارعا وسىنى ءتۇسىندىرۋ كەرەك. مەكتەپكە قالاي كيىنۋ كەرەكتىگىن بالالاردىڭ وزدەرى شەشپەيتىنى انىق"، - دەدى ايتىموۆا.

ونىڭ ايتۋىنشا، قازاقستان ءدىني مەملەكەتتەر سياقتى بولا المايدى، سەبەبى بىزدە اراب ەلدەرى مەن يزرايلمەن سالىستىرعاندا ءدىن مەن مەملەكەت ەكى بولەك. "ول ەلدەردە باسقا زاڭدار جۇزەگە اسىرىلادى. ءبىز باسقا ەلدى مىسال الا وتىرىپ، ءوز ەلىمىزدى تولىقتاي سولار سياقتى وزگەرتە المايمىز. ءبىز زايىرلى مەملەكەتتىڭ زاڭدارى بويىنشا ءومىر سۇرەمىز، سوندىقتان مۇمكىندىكتەردى بارىنشا قاراستىرۋ كەرەك"، - دەدى دەپۋتات.

ەسكە سالا كەتەيىك، وسىعان دەيىن مەملەكەت باسشىسى قىسقا بالاق پەن ساقال قويۋعا تىيىم سالۋ كەرەكتىگىن ايتقان ەدى. "ءدىني ساۋاتسىزدىعىنىڭ ناتيجەسىندە جاستارىمىز ساقال قويىپ، شالبارىنىڭ بالاقتارىن قىسقارتىپ تاستايدى. قارا كويلەك كيىپ، بەتى-اۋزىن تۇمشالاعان قىزدارىمىزدىڭ قاتارى كوبەيدى. بۇل ءبىزدىڭ داستۇرىمىزگە دە، حالقىمىزعا دا جات. بۇعان زاڭنامالىق دەڭگەيدە تىيىم سالۋ ماسەلەسىن پىسىقتاۋ كەرەك. قازاق قارا كيىمدى قارالى كەزدە عانا كيەدى"، - دەگەن ەدى نازاربايەۆ.