بەتىنە شىققان جارا ۇلكەن ىسىككە اينالدى. دارىگەرلەر دياگنوز قويا الماعان، ال ەر ادام قالاي ءومىر سۇرەرىن دە بىلمەيدى. بۇل جايىندا «قوستاناي جاڭالىقتارى» باسىلىمى حابارلايدى.

اكەسىنىڭ بەلىگىسىز اۋرۋى جايىندا باسىلىمعا يرينا ۆاسيليەۆا حابارلاعان. سۋرەتتەرىن جىبەرىپ، مۇنداي ىسىكپەن ءومىر ءسۇرۋدىڭ مۇمكىن ەمەستىگىن ايتتى. ەر ادام بۇگىندە جۇمىسسىز، جۇمىس ىستەي الماس تا ەدى. ارقالىق قالاسىنىڭ ماڭىندا ورنالاسقان مولودەجنوە اۋلىنىڭ تۇرعىنى الەكساندر  ۆاسيليەۆ بۇل اۋرۋىمەن 7 جىل بويى كۇرەسىپ كەلەدى.

وتباسى مۇشەلەرىندە ورتالىقپەن بايلانىساتىنداي مۇمكىندىك بولماعان. ال ءقازىر قىزدارى ارقىلى جاعدايلارىن جەتكىزىپ وتىر.

«2010 جىلى اكەمنىڭ بەتىندە كىشىگىرىم ىسىك پايدا بولدى. قوستانايدا ەمدەلمەك بولىپ اناليز تاپسىرعان، ءبىراق دارىگەرلەر بۇرىن-سوڭدى مۇنداي دەرت كەزدەسپەگەن دەگەن سىلتاۋمەن ەشقانداي دياگنوز قويماعان. اكەم بەتىندەگى ىسىكپەن اۋىلعا قايتتى» دەيدى الەكساندردىڭ قىزى يرينا.

ونىڭ ۇستىنە، الەكسانداردىڭ باسى دا ءجيى اۋرادى، ءبىر كوزى مۇلدەم كورمەيدى.

«جاقىندا ارقالىققا ونكولوگ كەلگەن. اكەمدى تەكسەرىپ «ترامادول» دەگەن كۇشتى اسەرى بار اگالگەتيك جازىپ بەردى. دارىلەردى ءوز قاراجاتىمىزعا الامىز. انام كۇنى-تۇنى اكەمنىڭ جانىندا وتىرعاندىقتان جۇمىس ىستەمەيدى. اكەمنىڭ ۇكىمەت تاراپىنان جاردەماقى الاتىن مۇمكىندىگى بار ما؟» دەلىنگەن قىزى جىبەرگەن حابارلامادا.

ارقالىق اۋداندىق ەمحاناسىنىڭ مالىمەتىنشە، ونكولوگيالىق دياگنوز قويىلماعاندىقتان جاردەماقى دا تولەنبەيدى ەكەن. ەندى ۆاسيليەۆ وبلىستىق ونكوديسپانسەرگە بارىپ تەكسەرىلۋى قاجەت.